ජෙයකුමාරිට රහස් පොලිස් තහංචියක්

ත්‍රස්ත විමර්ශන ඒකකයෙන් කිලිනොච්චියේ සිට කොළඹට කැඳවා පැය හයක් තිස්සේ ප්‍රශ්න කරන ලද දෙමළ මාතාවකට ඒ සම්බන්ධයෙන් කිසිත් ප්‍රකාශ නොකරන සේ තහංචි පනවා තිබේ.

පසුගිය පාලනය යටතේ වසරක් තිස්සේ අත් අඩංගුවේ රඳවාගෙන සිට කිසිදු චෝදනාවකින් තොරව මාර්තුවේ නිදහස් කරන ලද බාලේන්ද්‍රන් ජෙයකුමාරිට අපරාධ පරීක්ෂණ දෙපාර්තමේන්තුව (CID) විසින් එම වාරණය පනවා ඇත්තේ 16 අඟහරුවාදා නැවතත් ප්‍රශ්න කිරීම සඳහා කැඳවීමෙන් අනතුරුවය.

ප්‍රශ්න කිරීමෙන් අනතුරුව පිටතට පැමිණි ජෙයකුමාරි මාධ්‍යවේදීන් හමු නොවීම පිටව යනු දක්නා ලදී.

පරීක්ෂණ හමාර නැතැයි කියමින් ඇයට 19 සිකුරාදා නැවත පැමිණෙන ලෙස නියෝග කොට ඇති රහස් පොලිසිය එතෙක් පොලිස් විමසීම් සම්බන්ධයෙන් කිසිත් එලි නොකරන ලෙස අණ කොට ඇති බවයි ඇය සමග TID වෙත පැමිණි නීතිවේදියා ප්‍රකාශ කළේ.

“ඇයටයි දුවටයි සාමාන්‍ය විදියට ජීවත් වීමට ඉඩ දෙන්නේ නැතිව හතරවැනි තට්ටුවටයි, දෙවැනි තට්ටුවටයි කැඳවමින් යහපාලන ආණ්ඩුවත් අඩන්තේට්ටම් කරනවා,” යි ඩොමිනික් ප්‍රේමානන්ද් නීතිඥවරයා මාධ්‍යවේදීන් අමතා ප්‍රකාශ කළේය.

කොළඹ සහ පදවිය අධිකරණ වල බාලේන්ද්‍රන් ජෙයකුමාරිට එරෙහිව නඩු පවරා ඇති බව නීතිඥ ප්‍රේමානන්ද් වැඩිදුරටත් ප්‍රකාශ කළේය.

අතුරුදහන්

පොලිසියට අවශ්‍ය සැක කරුවකුට රැකවරණ ලබා දුන් බවට චෝදනා නගා ත්‍රස්ත විමර්ශන ඒකකය මගින් 2014 මාර්තු 13 වැනිදා කිලිනොච්චියේදී දියණිය විභුශිකා සමග පළමු වරට අත්අඩංගුවට ගනු ලැබූ ජෙයකුමාරි නිදහස් කරනු ලැබුවේ වසරකට වැඩි කලකට පසුවය.

ජෙයකුමාරිගේ සැමියා පිළිකා රෝගයකින් මියගිය අතර ඇගේ වැඩිමහල් පුත්‍රයා බාලේන්දිරන් යොහාන් 2006 වසරේදී යුද්ධයෙන් මිය ගිය අතර යුද්ධයේ අවසන් දිනවල රජයේ හමුදා පාලන ප්‍රදේශය වෙත පැමිණෙමින් සිටියදී ඇගේ දෙවැනි පුත්‍රයා බාලේන්දිරන් කජීවන් ෂෙල් වෙඩි ප්‍රහාරයකට ලක්ව මියගියේය.

එදිනම රජයේ හමුදා වෙත මුල්ලිවයික්කාල්හි දී භාරවූ ඇගේ තෙවැනි පුත් බාලේන්ද්‍රන් මහේන්ද්‍රන් එතැන් පටන් ඔහු අතුරුදහන් වී සිටී.

(Radigagana)