යහපාලන සමයේ සිදුවු මහ බැංකු බැඳුම්කර වංචාව පිළිබඳව හා ඉන් පසුව එය වසන් කරන ලද ආකාරය ගැන හිටපු මහ බැංකු අධිපතිවරකු පොතක් එළි දක්වා තිබේ.
The Great Bond Scam Cover Up කෘතිය හරහා මහ බැංකු බැඳුම්කර වංචාව වසර පහක් සඟවා සිටි ආකාරය හෙළිදරව් කර ඇති බවයි හිටපු මහ බැංකු අධිපති වත්මන් අග්‍රාමාත්‍ය ජ්‍යෙෂ්ඨ ආර්ථික උපදේශක අජිත් නිවාඩ් කබ්රාල් පෙන්වා දෙන්නේ.
“මේ පොත ලිවිමේ මුලික අරමුණ තමයි මේ වංචාව වසන් කරපු ක්‍රමවේදය මම එළිදැක්වුවා. වංචාවක් සිදුවුන බව හැමෝම දන්වා. ඒ වංචාවෙන් සිදුවුන පාඩු ගැන, ඒ වැරැද්ද ගැන හොඳ විග්‍රහයක් කරලා තියෙනවා ඒ උනාට කවුරුත් පෙන්නලා දීලා තිබුනේ නැහැ අවුරුදු පහක් තිස්සේ මේ ඇද්ද ක්‍රමය.” යැයි කෘතිය එළිදැක්වීමෙන් අනතුරුව ඔහු මාධ්‍ය වෙත කියා සිටියේය.
හිටපු අගමැති රනිල් වික්‍රමසිංහගේ අනුදැනුම මත මෙම වංචාව සිදුවු බවට චෝදනා කරන අග්‍රාමාත්‍ය ජ්‍යෙෂ්ඨ ආර්ථික උපදේශක අජිත් නිවාඩ් කබ්රාල් ඔහුගේ බලය හිමි කාලය තුළ එය වසන් කර ගැනීමටද සමත් වු බව සඳහන් කළේය.
වත්මන් ජනාධිපතිවරයා හා අගමැතිවරයා එම වැරැද්ද නිවැරදි කරනු ඇති බවට විශ්වාසය පළ කළ හිටපු මහ බැංකු අධිපතිවරයා එයට උපකාරයක් ලෙස මෙම ග්‍රන්ථය රචනා කළ බවට මාධ්‍යවේදියෙකු නැගු ප්‍රශ්නයකට පිළිතුරු දෙමින් පැවසීය.
අජිත් නිවාඩ් කබ්රාල් මහ බැංකු අධිපති ධුරය දරන සමයේද මහ බැංකු බැඳුම්කර වංචා සිදුවු බවට එජාපය නඟන චෝදනා සම්බන්ධව මාධ්‍යවේදීන් ප්‍රශ්න කළ බවක් හෝ අග්‍රාමාත්‍ය ජ්‍යෙෂ්ඨ ආර්ථික උපදේශකවරයා කිසිවක් ප්‍රකාශ කළ වගක් දැන ගන්නට නැත.
Facebook Comments
