නීතිඥයෙකු වීමට අපේක්ෂාවෙන් පසුවන හිටපු අමාත්‍ය රන්ජන් රාමනායක පොලිසිය විසින් අත් අඩංගුවට ගෙන තිබේ.
රජය විසින් ලබා දී ඇති ගිනි අවියේ බලපත්‍ර අලුත් නොකිරිමේ වරදට හිටපු අමාත්‍යවරයා අත් අඩංගුවට ගත් බවයි පොලිසිය පවසන්නේ.
අත් අඩංගුවට ගැනීමට පෙර නුගේගොඩ අධිකරණයෙන් ලබා ගත් සෝදිසි වරෙන්තුවක් මත 04 සෙනසුරාදා පොලිසිය විසින් මාදිවෙල පිහිටි ඔහුගේ නිවස පැය 4කට වැඩි කාලයක් පොලිස් පරික්ෂාවට ලක් විය.
රන්ජන් රාමනායක අත් අඩංගුවට ගත් අවස්ථාවේදී ඔහුට විලංගු දැමීමට යන පොලිස් නිලධාරියාව වැළඳගන්නා අයුරු දැක ගැනීමට හැකි විය.
මන්ත්‍රීවරයා හෙට දිනයේදී නුගේගොඩ මහේස්ත්‍රාත් අධිකරණයට ඉදිරිපත් කිරීමට නියමිත බවයි වාර්තා වන්නේ.
රජය අපහසුතාවයට පත්වන අන්දමේ ප්‍රකාශ, දුරකතන සංවාද හා ඡායාරූප ඇතුළත් දෘඩ තැටියක් (Hard Disk) හමුවීමේ සිද්ධියක් සම්බන්ධයෙන් රන්ජන් රාමනායක මන්ත්‍රීවරයාගේ නිවස පරීක්ෂා කරන බවට පොලිසිය සඳහන් කළ ද අවසානයේ ඔහු අත් අඩංගුවට ගනු ලැබුවේ ගිනි අවි බලපත්‍ර අලුත් නොකිරීමේ චෝදනා යටතේය.
Facebook Comments
