වසංගත තත්වය හේතුවෙන් රජය විසින් තාවකාලිකව වසා දමන ලද රූපලාවන්‍යාගාර නැවත විවෘත කිරිමට අදාලව දේශපාලන අධිකාරිය සහ සෞඛ්‍ය බලධාරීන් විසින් ලබාදුන් උපදෙස් වල පරස්පරයක් මතුව තිබේ.
සෞඛ්‍ය අමාත්‍යාංශය මගින් ලබා දෙනු ලබන සෞඛ්‍ය ආරක්ෂිත ක්‍රමවේද අකුරටම අනුගමනය කරමින් සේවා සැපයීමට කටයුතු කරන ලෙසට සෞඛ්‍ය අමාත්‍යවරිය විසින් රූපලාවන්‍ය ක්ෂේත්‍රයේ ප්‍රවීණයන්ට උපදෙස් ලබා දී තිබුනත් සෞඛ්‍ය සේවා අධ්‍යක්ෂ ජනරාල්වරයා පවසන්නේ දැනට එම ආයතන යලි විවෘත කිරීමේ අවසරයක් නොමැති බවයි.
දෛනිකව සේවා සැපයීමේ දී සෞඛ්‍ය අමාත්‍යංශය විසින් උපදෙස් ලබා දෙනු ලැබු කොණ්ඩා කැපීම ඇතුලු අත්‍යාවශ්‍ය සේවා පමණක් ලබාදීමට කටයුතු කරන ලෙස සෞඛ්‍ය හා දේශීය වෛද්‍ය අමාත්‍ය පවිත්‍රා වන්නිආරච්චි විසින් රූපලාවන්‍ය ක්ෂේත්‍රයේ ප්‍රවීණයන්ට උපදෙස් ලබා දුන් බව සෞඛ්‍ය හා දේශීය වෛද්‍ය සේවා කාන්තා සහ ළමා කටයුතු, සහ සමාජ ආරක්ෂණ අමාත්‍යාංශය ප්‍රකාශ කර තිබුණි.
“එමෙන්ම ඉදිරියේ දී රුපලාවන්‍යාගාර සේවා ක්‍රමවත්ව පවත්වාගෙන යාමට අදාලව පිළිපැදිය යුතු උපදෙස් ඇතුලත් මාර්ගෝපදේශණයක් ඉදිරිපත් කිරීමට සෞඛ්‍ය අමාත්‍යාංශය කටයුතු සැළසුම් කොට ඇති බවත්, සෞඛ්‍ය වෛද්‍ය නිලධාරි කාර්යාල හරහා එම කටයුතු නිරීක්ෂණය කිරීමට ද කටයුතු කරන බව ද දන්වන ලදී,” යනුවෙන් අමාත්‍යාංශයේ මාධ්‍ය ලේකම් විරාජ් අබේසිංහගේ අත්සනින් යුතුව නිකුත් කර තිබෙන නිවේදනයක දැක්වේ.
කෙසේ වෙතත්, රූපලාවන්‍යාගාර, කොණ්ඩා කපන ස්ථාන විවෘත කිරීමට අවස්ථාවක් ලබාදී නොමැති බව සෞඛ්‍ය සේවා අධ්‍යක්ෂ ජනරාල් වරයා නිවේදනය කර තිබේ.
“දැනට පොදු මහජනතාව වෙත ලබා දී ඇති සෞඛ්‍ය උපදෙස් අනුව කටයුතු කරමින් පමණක් කිසිසේත්ම ඉහතින් සඳහන් කරන ලද ආයතන යලි විවෘත කිරීමේ අවස්ථාවක් ලබා දී නොමැත. රූපලාවන්‍යාගාර, කොණ්ඩා කපන ස්ථාන සෞඛ්‍ය ආරක්ෂිත ක්‍රමවේද අනුව යළි විවෘත කිරීමට අදාලව උපදේශන මාලාව සෞඛ්‍ය සේවා අධ්‍යක්ෂ ජනරාල්වරයාගේ අත්සනින් කඩිනමින් නිකුත් වීමට නියමිතය”
අදාළ වෙළෙඳ ව්‍යාපාර විවෘත කළ හැකි වන්නේ එකී උපදේශන නිකුත් කළ පසුවය.
“එය නිකුත් කල පසු රූපලාවන්‍යාගාර, කොණ්ඩා කපන ස්ථාන පවත්වාගෙන යන පුද්ගලයන් තම ආයතනය පිහිටා තිබෙන ප්‍රදේශය අයත් සෞඛ්‍ය වෛද්‍ය නිලධාරී කාර්යාල බල ප්‍රදේශයේ සෞඛ්‍ය වෛද්‍ය නිලධාරීවරයාගෙන් උපදෙස් මාලාව ලබාගෙන ඒ අනුව තම ආයතනයේ සේවා ලබාදීමට හැකිවන පරිදි ව්‍යුහය සහ පහසුකම් සකස් කල යුතුය.”
සොඛ්‍ය බලධාරීන්ගේ උපදේශන මාලාව අනුව පවත්වාගෙන යනු ඇති බව තහවුරු කෙරුණු රූපලාවන්‍යාගාර හා කොණ්ඩා කපන ස්ථාන යලි විවෘත කිරීමට අදාල අනුමැතිය ලබාදෙන සහතිකය සෞඛ්‍ය වෛද්‍ය නිලධාරී විසින් නිකුත් කරනු ඇති අතර එම සහතිකය ලබා ගන්නා තෙක් දිවයිනේ කිසිදු රූපලාවන්‍යාගාරයක්, කොණ්ඩා කපන ස්ථානයක් යළි විවෘත කිරීමට උත්සාහ නොකළ යුතු බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ අවධාරණය කර සිටී.
Facebook Comments
