තමන් ‘ද්‍රෝහියකු’ බවට පරුෂ ලෙස චෝදනා කරමින් ප්‍රචණ්ඩ ලෙස පහර දුන් පුද්ගලයකු අත් අඩංගුවට ගෙන ඇප මත මුදා හැර ඇති බව පවසන නව සම සමාජ පක්ෂයේ නායකයා පොලිසිය නීතිය ක්‍රියාත්මක කිරීමෙන් පමණක් රට තුල ෆැසිස්ට් බලවේග මර්දනය කළ නොහැකි නොහැකි බවට අනතුරු අඟවයි.
නව සම සමාජ පක්ෂයේ ප්‍රධාන ලේකම් ආචාර්ය වික්‍රමබාහු කරුණාරත්නට මරණීය තර්ජන එල්ල කළ මනෝජ් බුද්ධික හේමචන්ද්‍ර රුපියල් ලක්ෂ දෙකක ශරීර ඇප මත මුදා හැරීමට කඩුවෙල අධිකරණය 30 බදාදා නියෝග කර තිබේ.
මහින්ද රාජපක්ෂ ගේ නායකත්වයෙන් යුත් ජාතිවාදී විසකුරු බලවේග පරාජය කිරීම ජනතාව පෙළ ගැස්වීමෙන් තොරව සිදු කළ නොහැකි බව අධිකරණ තීන්දුවෙන් පසුදා නසසප නායකයා මාධ්‍යවේදීන් හමුවේ කියා සිටියේය.
ශාරිරික හානියක් නෑ
තමන් විසින් ලියු ‘යථාවාදී විමසුම’ කෘතිය නොවැම්බර් 24 වන බ්‍රහස්පතින්දා කොළඹ 07,ආනන්ද කුමාරස්වාමි මාවතේ පිහිටි මහවැලි කේන්ද්‍ර ශ්‍රවණාගාරයේ දී එළිදැක්වීමෙන් පසු රාත්‍රි ආහාර සඳහා තලවතුගොඩ පිහිටි ආපන ශාලාවකට ගොස් සිටියදී මෙලෙස මරණීය තර්ජනයක් සහිත ප්‍රහාරයක් එල්ල වු බව ඔහු සදහන් කර සිටියේ 01 බ්‍රහස්පතින්දා කොළඹදී පැවැති මාධ්‍ය හමුවකදීය.
තමන්ට මරණීය තර්ජන එල්ල කර මනෝජ් බුද්ධික හේමචන්ද්‍ර දුන් ප්‍රහාර මිතුරන් දෙදෙනා විසින් ආවරණය කිරීම නිසා තමන්ට ශාරීරික හානියක් නොවු බවයි ආචාර්ය වික්‍රමබාහු පවසන්නේ.
මෙවැනි ප්‍රහාර එල්ල වීම විශාල ප්‍රශ්නයක් බව පෙන්වා දෙන ඔහු අවධාරණය කරන්නේ මහින්ද රාජපක්ෂ ඇතුලු ඔහුගේ කණ්ඩායමේ ගෙනගිය විසකුරු වැඩපිලිවෙල ජනතාව අතරට ගොස් එය සංවිධානාත්මක තත්වයකට පත්ව මෙලෙස පහර දීම් දක්වා වර්ධනය වී ඇති බවයි.
එල්ල වු ප්‍රහාරය සම්බන්ධයෙන් ආරක්ෂක ලේකම්වරයාද දැනුවත් කර ඇති බව පවසන ආචාර්ය වික්‍රමබාහු කරුණාරත්න මාධ්‍ය හමුවේදී වැඩි දුරටත් අවධාරණය කර සිටියේ එම නඩුව සමථයකට පත් කිරීමට තමන් කිසිසේත් සුදානම් නොමැති බවත් ජාතිවාදය සහ ආගම්වාදය පදනම් කොටගෙන ප්‍රචණ්ඩ ක්‍රියා සිදු කිරීමට එරෙහි නීතිය යටතේ මෙම නඩුව ඉදිරියට ගෙන යන බවයි.
(Radio gagana)
Facebook Comments
