සේවක අර්ථසාධක මුදල මංකොල්ල කෑමට එරෙහිව හඬ නැඟු තම පුතුගේ මරණය ගැන සත්‍ය හෙළි කරන ලෙසට කටුනායකදී මරා දැමුනු රොෂේන් චානකගේ මව ඉල්ලා සිටිනවා.
කටුනායක කම්කරු ඝාතනය හා පහරදීම සම්බන්ධ සිද්ධිය සම්බන්ධ පරීක්ෂණයේ තොරතුරු ඇතුලත් මහානාම තිලකරත්න වාර්තාව හෙළි කරන ලෙස බල කරමින් අද (30) ජනාධිපති ලේකම් කාර්යාලය ඉදිරිපිට පැවති විරෝධතාවයකදී ඇය මේ බව පැවසීය.
තමන්ට වන්දි අවශ්‍ය නොවන බවත් සිද්ධියේ සත්‍ය දැන ගැනීමට හා පහර කෑමට ලක්වුවන්ට සාධාරණය ඉෂ්ඨ කරන ලෙසට පමණක් තමන් රජයෙන් ඉල්ලා සිටින බවයි රොෂේන්ගේ මව අවධාරණය කර සිටියේ.
තම පුතු මරා දැමීමට අණ දීම සම්බන්ධව හිටපු ජනපති,ආරක්ෂ ලේකම් හා හිටපු පොලිස්පති වගකිව යුතු බවට ඇය චෝදනා කළේය.
කටුනායක පහරදීම සම්බ්න්ධව වසර පහ මාරක් තිස්සේ යුක්තිය ලබා ගැනීමට තමන් ඇතුළු පිරිස සටන් කරන බවත් සිද්ධියේ පරීක්ෂයට අදාළ මහානාම තිලකරත්න වාර්තාව ප්‍රසිද්ධ කරන ලෙසටත් ඇය ඉල්ලා සිටියේය.
අම්මාගේ අයිතිය
රොෂේන් චානකගේ මව වසර පහ මාරක් තිස්සේ සටන් කරන්නේ තම දරුවා මරා දැමීමේ සිද්ධිය සම්බන්ධ වාර්තා ලබා ගැනීමට බවත් අම්ම කෙනෙක් ලෙස එය ඇයගේ අයිතියක් බව නිදහස් වෙළඳ කලාප සහයෝගීතාවයේ බ්‍රිටෝ ප්‍රනාන්දු පවසනවා.
මීට පෙරද මෙම වාර්තාව ලබා ගැනීමට විරෝධතා සිදු කලද පොලිසිය මැදිහත්ව ජනාධිපති ලේකම්වරුන් යැයි පවසමින් විවිධ පුද්ගලයන් මුණ ගැස්වීමට සැලැස්සු බවත් එයින් කිසිදු ප්‍රතිඵලයක් නොවුන බවටද ඔහු චෝදනා කළේය.
ආබාධිත රණවිරුවන්ට පහරදීමෙන් පසු ජනතා ප්‍රශ්න වලට ස්ථිර විසඳුමි දීමට පත් කරන ලද සුනන්ද කාරියප්පෙරුම නමා ජනාධිපති ලේකම්වරයෙක් හමුවු බවත් ඔහු සති 2 තුළ විසඳුමක් ලබා දීමට පොරොන්දු වු පවසන බ්‍රිටෝ ප්‍රනාන්දු අවධාරණය කර සිටියේ එම කාළය තුළ ස්ථිර විසඳුමක් නොලැබුණහොත් අඛණ්ඩ විරෝධතාවයක නිරත වන බවයි.
Facebook Comments
