ත්‍රස්ත නීති යොදා සිරකළ මුස්ලිම් තරුණයා ගැන මානව හිමිකම් කොමිසමට ආයාචනයක්

ස්ටිකරයක් ඇලවීම නිසා අත් අඩංගුවට ගෙන මර්දනීය ත්‍රස්ත නීති යොදාගෙන දස දිනකට වැඩි කාලයක් රඳවාගෙන සිටින මුස්ලිම් තරුණයකුට එරෙහි චෝදනා පොලිසිය විසින් දැනුම් නොදීම නිසා ඔහුගේ පවුලේ සාමාජිකයෝ බියට පත්ව සිටිති.

ශ්‍රී ලංකා මානව හිමිකම් කොමිසමට බැගෑබර ආයාචනයක් කරන මොහමඩ් රුෂ්ඩිගේ මෑණියන් සැක කරන්නේ බලධාරීන් ඔහුට විරුද්ධව බොරු නඩුවක් ගොතනු ඇති බවටයි.

කොම්පඤ්ඤවීදිය පොලිසිය විසින් මාර්තු 22 දා අත් අඩංගුවට ගන්නා ලද 23 හැවිරිදි සුපිරි වෙළෙඳසල් සේවක මුස්ලිම් තරුණයා දින 90ක රැදවුම් නියෝගයක් යටතේ ත්‍රස්ත විමර්ශන කොට්ඨාසයේ (CTID) රඳවා සිටින බව පොලිසිය පවසයි. එම නියෝගයට අත්සන් කළ යුතුව ඇත්තේ ත්‍රස්තවාදය වැළක්වීමේ පනත (PTA) ප්‍රවේසමින් පරිහරණය කරන බව ප්‍රකාශයට පත්කර තිබෙන වර්තමාන ආණ්ඩුවේ ආරක්ෂක අමාත්‍යවරයා වන ජනාධිපති අනුර කුමාර දිසානායක විසිනි.

“අද වන තුරු ඔහුට විරුද්ධ නිශ්චිත චෝදනා අපට දැනුම් දී නැති පොලිසිය ඔහු රඳවා තබා ගැනීම සම්බන්ධයෙන් කිසිදු පැහැදිලි කිරීමක් ලබාදී නැතැ,” යි රුෂ්ඩි මාතාව ශ්‍රී ලංකා මානව හිමිකම් කොමිසමේ සභාපතිවරයාට මෙන්ම ආචාර්ය ගෙහාන් ගුණතිලක කොමසාරිස්වරයාට බදාදා (3) යොමු කළ ලිපියේ සඳහන් වෙයි.

“මගේ පුත්‍රයා රඳවා තබාගැනීම අත්වැරැද්දක් බව අප තදින්ම විශ්වාස කරන අතර බලධාරීන් ඔහුට විරුද්ධව බොරු චෝදනා ගොනු කිරීමට උත්සාහ දරනු ඇති බවට බිය මතුවෙමින් පවතී. ඔහු දැන් ඉන්නා තත්වය අපේ පවුලේ අයට මහත් පීඩාකාරීය. ඔහුගේ කඩිනම් නිදහස වෙනුවෙන් මැදිහත් වන ලෙස මානව හිමිකම් කොමිසමින් ගෞරවයෙන් ඉල්ලා සිටිමු,” යි එහි වැඩිදුරටත් සඳහන් වේ.

සිය පුත්‍රයා සිරගතව ඉන්නා තත්වයේ ගුණාගුණ සොයා බැලීම සඳහා මානව හිමිකම් කොමිසමේ නියෝජිතයකු ඔහු හමුවට යවන ලෙසද රුෂ්ඩි මෑණියෝ වැඩිදුරටත් ඉල්ලා සිටින්නීය.

පොලිසිය පවසන්නේ ‘යම් ආකාරයකින් ත්‍රස්තවාදී ක්‍රියාවක් කිරීමට ප්‍රවෙදිතාවයක් දක්වන පුද්ගලයකු බවට තිබු සාධාරණ සැකය මත’ මොහොමඩ් රුෂ්ඩි අත්අඩංගුවට ගන්නා ලද බවයි.

“මෙම සැකකරුගේ ක්‍රියා කලාපය සම්බන්ධව දීර්ඝ ලෙස විමර්ශන කරමින් පවතින අතර එහිදී හෙළිදරව් වූ කරුණු අනුව මොහු අන්තර්ජාලය භාවිත කරමින් සහ වෙනත් ක්‍රමවේද උපයෝගී කර ගැනීම හේතුවෙන් යම් මානසික අභිප්‍රේරණයකට ලක්වී ඇති පුද්ගලයෙකු බවට නිරීක්ෂණය වී ඇති බැවින්, එම මානසික තත්ත්වය මත ආගමික අන්තවාදී ක්‍රියාවක් සිදුකිරීමට ඔහුට ඇති ප්‍රවේදීතාවය පිළිබඳව වැඩිදුර විමර්ශන කටයුතු සිදු කරමින් පවතියි,” යනුවෙන් පොලිසිය නිකුත් කළ නිවේදනයක සඳහන් වේ.

අත් අඩංගුවට ගන්නා ලද තරුණයා උලමා සභාව වෙත ඉදිරිපත් කරන ලදුව ‘මුස්ලිම් ජාතිකයෙකුට එහා ගිය තත්ත්වයක් තිබෙන’ රුෂ්ඩි පුනරුත්ථාපනය කළ යුතු බව එම සභාව ප්‍රකාශ කළේ යයි පොලිස් ප්‍රකාශක ජ්‍යෙෂ්ට පොලිස් අධිකාරි බුද්ධික මනතුංග පවසයි.

පොලිසියේ ප්‍රකාශය සනාථ නොකරන සමස්ත ලංකා ජමියතුල් උලමා සභාව (ACJU) ප්‍රකාශනයේ නිදහසට හානි පමුනුවමින් පුද්ගලයන් අත් අඩංගුවට ගැනීම දැඩි ලෙස හෙලා දැක තිබේ.

“අප විසින් කරන ලද විමසීමකදී පොලිසියේ බලධාරීන් අපේ නියෝජිතයන්ට දැනුම් දුන්නේ අත් අඩංගුවට ගැනීමේ හේතුව ස්ටිකරය පමණක් නොව වෙනත් නිශ්චිතව සඳහන් නොකළ කාරනා හා සම්බන්ධ බවයි. චෝදනා සවිස්තරව දැක්වෙන ලිපි ලේඛන ලබාදෙන ලෙස ACJU නිල වශයෙන් ඉල්ලා තිබේ,” යි උලමා සභාව නිකුත් කළ නිවේදනයක දැක්වේ.

නිදහස් හා ස්වාධීන පලස්තීන රාජ්‍යයකට සහාය පල කරන උලමා සභා නිවේදනය ඒ දේශයේ සිදුකෙරෙන අනීතික වර්ග සංහාරය දැඩි ලෙස හෙලා දැක තිබේ.

අත් අඩංගුවට ගන්නා ලද තරුණයා විසින් අලවන ලද ස්ටිකරයේ පලස්තීනයට ප්‍රහාර එල්ල කරන ඊශ්‍රායලයට ‘කෙලවේවා’ යනුවෙන් ඉංග්‍රීසියෙන් සඳහන් කරන ලද පාඨයක් වූ බව පොලිස් ප්‍රකාශකයා පවසයි.

මොහමඩ් රුෂ්ඩිගේ පරිගණක දෘඩාංග, තොරතුරු තාක්ෂණික මෘදුකාංග සහ ජංගම දුරකතන සම්බන්ධයෙන් වෝහාරික විමර්ශනයක් සිදුකෙරෙන බව පොලිසිය වැඩිදුරටත් කියා සිටී.