බෞද්ධ දර්ශනය ශ්‍රී ලංකාවට පමණක් ආවේණික නොවන විශ්වයටම අදාළ එකක් බැවින් එය ආගමක් ලෙස හැඳින්වීමට මුදල් අමාත්‍යවරයා සිය විරෝධය ප්‍රකාශ කර තිබේ.
“බෞද්ධ දර්ශනය විශ්වයට ම අදාළ ය. එය දිව්‍ය ලෝකයට සේම නරකාදියටත් අදාළ ය. එහෙත් ඇතැම් චීවරධාරීහු මෙය ආගමක් බවට පත් කර ගනිමින් එය විකුණාගෙන කෑමට උත්සහ දරමින් ඉන්නවා.” යි මංගල සමරවීර අමාත්‍යවරයා පැවසීය.
එදා පාර්ලිමේන්තුවේ විපක්ෂ නායකවරයාව සිටි අමිර්තලිංගම් වැනි දෙමළ නායකයන් පාර්ලිමේන්තුවෙන් ඉවත් කරමින් එදා රට ජාතිවාදය කරා ගමන් කරවූ ආකාරයටම ඇතැම් පිරිස් මුස්ලිම් නායකයන් පාර්ලිමේන්තුවෙන් ඉවත් කිරීමට උත්සහ දරමින් සිටින බවට ද අමාත්‍යවරයා 22 බදාදා රාදේශීය සංවර්ධන බැංකුවේ අභ්‍යාසලාභී සංවර්ධන නිලධාරීන් 304 දෙනෙකුට පත්වීම් ලිපි ප්‍රදානය කිරීමේ අවස්ථාවට එක්වෙමින් චෝදනා කළේය.
“එදා අමිර්තලිංගම් පාර්ලිමේන්තුවෙන් නෙරපා හැර රට මහත් විනාශයකට ගමන් කරවූ වරද අද යළිත් සිදු කරමින් මුස්ලිම් නායකයන් පාර්ලිමේන්තුවෙන් ඉවත් කිරීමේ කටයුත්තකට මුල පුරමින් සිටියි. අමාත්‍ය රිසාද් බදියුදීන් ඇතුළු පිරිසට ඇත්තේ දේශපාලන චෝදනා මිස නීතිමය චෝදනා නොවේ.”
පාස්කු ඉරිදා ප්‍රහාරය දඩමීමා කරගනිමින් තමන්ගේ පටු දේශපාලන වාසි තකා රට තුළ ජාතිවාදය ඉස්මතු කිරීමේ අපේක්ෂාවෙන් ඇතැමි පිරිස් කටයුතු කරන බවට චෝදනා කළ ඇමැති මංගල ඔවුන් සියලුම මුස්ලිම්වරුන් ත්‍රස්තවාදීන් ලෙස හුවා දක්වමින් ආණ්ඩු පෙරළියක් බවට පත් කර ගැනීමේ ක්‍රියාවලියකට අවශ්‍ය පසුබිම නිර්මාණය කරමින් සිටින බවට අනතුරු ඇඟවීය.
රටේ වෙසෙන මුස්ලිම්වරු 99.9%ක් ජාතිවාදීහු නොවන බව පෙන්වා දෙන අමාත්‍යවරයා එයට උදාහරණ ලෙස තත්ත්වය පාලනය කිරීම සඳහා මුස්ලිම් ජනතාව දැක්වූ සහාය වැඩි දුරටත් සිහිපත් කළේය.
Facebook Comments
