මේ ආණ්ඩුව යටතේ හෝ ජෝසප් පරරාජසිංගම් ඝාතනයට යුක්තිය ඉටුවේද?

පළමු රාජපක්ෂ පාලනයේ මුල් සමයේදීම ඝාතනයට ලක් වු නැගෙනහිර පළාතේ දෙමළ ජනතා නියෝජිතයකුට, වත්මන් පාලනය යටතේ හෝ යුක්තිය ඉටු වෙතැයි ජනතාව අපේක්ෂා කරන බව එම පළාතේම මන්ත්‍රීවරයෙක් පවසා තිබේ.

ගෙවීගිය කාලය තුළ රටේ විධායක පුටුවේ සිටි කිසිදු පාලකයකු ඝාතනයට ලක්වු ජෝසප් පරරාජසිංගම් වෙනුවෙන් යුක්තිය ඉටු නොකළ බවයි ඉලංගෙයි තමිල් අරසු කච්චි (ITAK) මඩකලපුව දිස්ත්‍රික් පාර්ලිමේන්තු මන්ත්‍රී ඥානමුත්තු ශ්‍රීනේෂන් පවසන්නේ.

“මහින්ද රාජපක්ෂ යුගයේදී ඝාතනයට ලක්වූයේ ජෝසප් අයියා විතරක් නෙමෙයි. මාධ්‍යවේදීන්, දේශපාලන නායකයන් සහ බුද්ධිමතුන් රැසක් ඝාතනයට ලක්උනා. ඔහුගේ කාලයේ යුක්තිය ලැබුනේ නැ. ඊට පස්සේ මෛත්‍රී-රනිල් බලයට ආවා. ඒ අයගේ කාලයේත් අපිට යුක්තිය ඉටු වුණේ නැහැ. මීළඟට බලයට පත් වූ ගෝඨාභය රාජපක්ෂ මහතාගේ පාලන කාලය තුළ යුක්තිය ඉටු නොවන බව අපි දන්නවා. දැන්, අනුර කුමාර දිසානායක නීතියේ අධිපත්‍ය රකිනවා, අපරාධකරුවන්ට දඬුවම් කරනවා කියලා, කියලා තියනවා. ඒ නිසා මේ කාලය තුළ අනිවාර්යයෙන්ම යුක්තිය ඉටු වෙතැයි ජනතාව සිතනවා. ”

ඉලංගෙයි තමිල් අරසු කච්චි (ITAK) පාර්ලිමේන්තු මන්ත්‍රීවරයා ඒ බව පවසා තිබුනේ මඩකලපුව ශාන්ත මරියා දෙව්මැදුරේ නත්තල් පූජාවට සහභාගි වෙමිින් සිටියදී 2005.12.25 දින ඝාතනය කළ පාර්ලිමේන්තු මන්ත්‍රී ජෝසප් පරරාජසිංගම්ගේ 19 වැනි වාර්ෂික අනුස්මරණයට එක්වෙමිනි.

ජෝසප් පරරාජසිංගම්ගේ ඝාතනයට යුක්තිය ඉල්ලා දෙසැම්බර් 26 වැනි බ්‍රහස්පතින්දා මඩකලපුව පොලිස්ථානය ඉදිරිපිටින් ආරම්භ කළ විරෝධතා පෙළපාලියකින් මඩකලපුව වේදනායගම් ශාලාව වෙත පැමිණි පිරිස එහිදී හිටපු ජනතා නියෝජිතයා අනුස්මරණය කිරීමට කටයුතු කර තිබේ. එම අනුස්මරණය සංවිධානය කළේ ඉලංගෙයි තමිල් අරසු කච්චි (ITAK) තරුණ පෙරමුණ විසින් බවයි පළාත් බද වාර්තාකරුවන් පවසන්නේ.

මඩකලපුව දිස්ත්‍රික් පාර්ලිමේන්තු මන්ත්‍රී ඥානමුත්තු ශ්‍රීනේෂන් එහිදි තව දුරටත් පවසා තිබුනේ “රතු” පාලනයක් යටතේ හෝ තමන්ට යුක්තිය ඉටු වු බවට යම් තාක් දුරට හෝ දෙමළ ජනතාවට හිත සන්සුන් කරගැනීමේ අවස්තාවක් ලබා දීමට වත්මන් පාලකයන් මෙය අවස්ථාවක් කර ගත යුතු බවයි.

“යුක්තිය ප්‍රමාද වීම යුක්තිය නැතිවීමක් බව කියනවා. ඉතින් මේ යුක්තිය එළියට ගෙන ඒම තුළින් මේ රතු පාලනයේදී හෝ මේ වාමාංශික පාලනයේදී තමන්ට අහිමි වූ යුක්තිය තමන්ට ලැබුණු බව දෙමළ ජනතාව යම්තාක් දුරට හිත සන්සුන් කර ගැනීමට මේ අවස්ථාව යොදා ගත යුතුයි. ”

යුක්තිය ඉටු කිරිම ප්‍රමාද වීම තුළ සිංහල නායකයන් සියල්ලන්ම එක හා සමානයැයි දෙමළ ජනතාව තුළ වැටහීමක් ඇතිවිමේ හැකියාව ගැනත් මන්ත්‍රීවරයා එහිදී අනතුරු අගවා තිබුනි.

“කාලය ගත වුවහොත් සිංහල නායකයන් සියල්ලෝම දෙමළ නායකයන්ගේ ඝාතන ගැන සැලකිල්ලක් නැතිව තමයි ඉන්නේ කියලා දෙමළ ජනතාව තේරුම් ගන්න පුළුවන් අවස්ථාවක් වෙනවා මේක. ඉතින් අපි පුන පුනා කියන්නේ අවුරුදු 19ක් තිස්සේ අපට යුක්තිය ඉටු වුණේ නැහැ. ඊළඟට 20 වැනි අවුරුද්ද. ඉතින් මේ කාලය තුලදී හෝ යුක්තිය ඉටු වීම හරහා රටේ නීතියේ ආධිපත්‍යය ක්‍රියාත්මක වෙනවා, අපරාධ කරුවන්ට දඩුවම් දෙනවා කියන පනිවිඩය මේ අලුත් ආණ්ඩුවත් දෙන්න ඕන කියලා බලාපොරොත්තු වෙනවා.”

ජෝසප් පරරාජසිංගම්ගේ 19 වැනි වාර්ෂික අනුස්මරණයට එක්ව සිටි ඉලංගෙයි තමිල් අරසු කච්චි (ITAK) මඩකලපුව දිස්ත්‍රික් පාර්ලිමේන්තු මන්ත්‍රී ශානක්කියන් රාසමානික්කම් එහිදි චෝදනා කර තිබුනේ වත්මන් ආණ්ඩුව පැරණි නඩු කිහිපයක් විමර්ශනය කරන බව පැවසුවද ජෝසප් පරරාජසිංගම්ගේ ඝාතනය එයට ඇතුලත් වී නොමැති බවයි.

“මේ ආණ්ඩුව බලයට ආවා. පසුගිය කාලයේ සිදු වූ බොහෝ දේවලට එරෙහිව අපි කටයුතු කරනවා කියලා කිව්වා. විශේෂයෙන්ම පාස්කු ප්‍රහාරය වගේ දේවල්. ඊට අමතරව නැගෙනහිර විශ්වවිද්‍යාලයේ හිටපු උපකුලපති රවීන්ද්‍රනාත් ඝාතනය, ත්‍රිකුණාමලය 5, ත්‍රිකුණාමලය 11, ලසන්ත වික්‍රමතුංග, එක්නැලිගොඩ, ඇතුළු ‘එම්බ්ලමැටික් කේසස් ’නමින්, නඩු කිහිපයක් විමර්ශනය කරමින් සිටින බවද ඔවුන් පැවසූවා. නමුත් ජෝශප් පරරාජසිංහ ඝාතනය එයට ඇතුල් වෙලා නැ. ”

තෝරා ගත් නඩු කිහිපයක් පමණක් සම්බන්ධයෙන් යළි පරීක්ෂණ ආරම්භ කිරීමට හේතු කවරේදැයි කැබිනට් තීරණ දැනුම් දීමේ මාධ්‍ය හමුවේදී පසුගිය ඔක්තෝබර් මාසයේදී මාධ්‍යවේදියෙකු එවකට කැබිනට් ප්‍රකාශක අමාත්‍ය විජිත හේරත් විමසු විට ඔහු පවසා තිබුනේ අනෙකුත් ඝාතන සිද්ධීන් පිළිබඳ විමර්ශන ද ඉදිරියේදී යළිත් වරක් ආරම්භ කරන බවයි.

“අපි මේ 7 ක් ගැන කිව්වේ දැනට වඩාත්ම තොරතුරු සහ ගොඩක් පරීක්ෂණ අවසන් වෙච්ච දේවල්. ඒවා ඉක්මනින් ඉවර කරන්න පුළුවන් දේවල් . එහෙම නැතුව ඒ 7 විතරක් කියන එක නෙමෙයි. එහෙම වැරදි අදහසක් ගන්න එපා. පසුගිය කාලය තුල වෙච්ච සියළුම ගණයේ ආර්ථික අපරාධ, ඒ වගේම මිනිස් ඝාතන, මාධ්‍යවේදීන් පැහැර ගැනීම්, ඝාතන, ඒ සියල්ල පිළිබද පරීක්ෂණ පවත්වලා ඒ පිළිබදව අදාල අයට නීතිය ක්‍රියාත්මක කරනවා. ඒක අපේ වගකීම. එහෙම නැතිව තෝරා ගත්ත කිහිපයක් පමණක් නෙමෙයි.

ද්‍රවිඩ ජාතික සංවිධානයේ හිටපු පාර්ලිමේන්තු මන්ත්‍රී ජෝසප් පරරාජසිංහම් ඝාතනය සම්බන්ධයෙන් සැකපිට 2015.10.09 දින අපරාධ පරීක්ෂණ දෙපාර්තමේන්තුව විසින් අත්අඩංගුවට ගන්නා ලද නැගෙනහිර පළාත් හිටපු ප්‍රධාන අමාත්‍යවරයකුද වන ශිවනේසතුරෙයි චන්ද්‍රකාන්තන් හෙවත් පිල්ලෙයාන් පාර්ලිමේන්තු මන්ත්‍රීවරයකුක් ලෙස පත්වීමෙන් පසු ඇපමත මුදාහැර තිබුනි.