දස වසරකට ඉහත දී සන්ඩේ ලීඩර් පුවත්පතේ ආරම්භක කතෘ ලසන්ත වික්‍රමතුංග ඝාතනයට යුක්තිය ඉටු කිරිමට ආණ්ඩුවේ ප්‍රභූවරුන් හරස් වී ඇති බවට රජයේ ඇමැතිවරයෙකු ප්‍රකාශ කර තිබේ.
හිටපු කතෘවරයාගේ ඝාතකයන් මේ වන විට හඳුනාගෙන අවසන් බව පවසන මහාමාර්ග හා මාර්ග සංවර්ධන රාජ්‍ය අමාත්‍ය රන්ජන් රාමනායක වත්මන් ආණ්ඩුවේ සහ පෙර රජයේ ප්‍රබලයන් මෙම සිද්ධිය යට ගසමින් සිටන බවට ප්‍රකාශ කළේය.
හිටපු ආරක්ෂක ලේකම් ගෝඨාභය රාජපක්ෂ මාධ්‍යවේදී ලසන්ත වික්‍රමතුංග ඝාතනයට සෘජුව සම්බන්ධ බව ලසන්ත වික්‍රමතුංග මරා දමා දශකයක් ගතවීම වෙනුවෙන් පැවති අනුස්මරණය අවසානයේ ඇමැතිවරයා මාධ්‍ය වෙත පැවසීය.
“ලසන්නත වික්‍රමතුංගව ඝාතනය කරන්න සෘජුව සම්බන්ධ ආරක්ෂක ලේකම් හිටපු ජනාධිපති අපේක්ෂක ගෝඨාභය රාජපක්ෂ මහත්තයා කියන එක මම පැහැදිලිව කියනවා. ඒක ලංකාවේ බහුතරයක් ජනතාව පිළිගන්නවා.” යැයි රන්ජන් රාමනායක රාජ්‍ය ඇමැතිවරයා කියා සිටියේය.
අද වන විට ජනමාධ්‍යවේදීන් ඝාතනය නොවන සමාජයක් බිහි වී ඇති බව පෙන්වා දෙන මුදල් හා ජනමාධ්‍ය අමාත්‍ය මංගල සමරවීර ප්‍රමාද වී ඇති ලසන්ත වික්‍රමතුංග ඝාතකයන්ට දඬුවම් දීම වැඩි කල් නොගොස් සිදු වනු ඇති බවට විශ්වාසය පළ කළේය.
හිටපු කතෘවරයාගේ ඝාතනයට දස වසරක් ගතව ඇතත් යුක්තිය ඉටු නොවීම පිළිබඳව මාධ්‍යවේදීන් ඇමැතිවරයාගෙන් ප්‍රශ්න කල අතර “මේ වගේ මිනීමැරුම් වලදි අපි ලෝකයේ දැකල තියෙනවා අවුරුදු දහය නෙමේ අවුරුදු පහළොව විස්ස ගියපු වෙලාවලුත් තියෙනවා.” යි වැඩි දුරටත් කියා සිටියේය.
Facebook Comments
