මහ බැංකු බැඳුම්කර නිකුත් කිරිමේදී සිදුව් ඇති වංචා සම්බන්ධයෙන් හිටපු මුදල් අමාත්‍ය රවී කරුණානායක හට එක එල්ලේ චෝදනා කල නොහැකි මුත් ඔහු මිලදී ගත් නිවස සම්බන්ධයෙන් අල්ලස් කොමිසම හරහා පරීක්ෂණයක් සිදු කල යුතු බවට මහ බැංකු බැඳුම්කර වංචාව පිළිබඳව සොයා බැලීමට පත් කල ජනාධිපති කොමිසම නිර්දේශ කර තිබේ.
බැඳුම්කර නිකුතුවේදී හිටපු මහ බැංකු අධිපති අර්ජුන් මහේන්ද්‍රන් සිය බලය අනිසි ලෙස භාවිතා කර ඇති බව මෙන්ම ඔහු එම ධුරයට පත් කිරිම සම්බන්ධව අගමැති රනිල් වික්‍රසිංහ විධිමත් වගකීමට යටත් වන බව ද සිය වාර්තාව හරහා එම කොමිසම පෙන්වා දී ඇති බව දේශපාලන ආරංචි මාර්ග පවසයි.
2015 වසරේදී බැඳුම්කර නිකුත් කිරීමේදී සිදු වු වංචාව හරහා පර්පෙචුවල් ට්‍රෙෂරීස් සමාගම අයතා ලෙස රුපියල් බිලියන 11 ක මුදලක් උපයා ගෙන ඇති බව එම කොමිසම් වාර්තාවේ සඳහන් ඇති බව ජනාධිපති කාර්යාල ආරංචි මාර්ග කියා සිටි.
සිදුව ඇති පාඩුව නැවත අය කර ගැනීමට මෙන්ම එම වංචාවට අදාළ පුද්ගලයන් හට නීතිමය ක්‍රීයා මාර්ග ගත යුතු බවටද මහ බැංකු බැඳුම්කර වංචාව පිළිබඳව සොයා බැලීමට පත් කල ජනාධිපති කොමිසම සිය වාර්තාව හරහා නිර්දේශ කර ඇති බවයි දේශපාලන ආරංචි මාර්ග වැඩි දුරටත් පවසන්නේ.
කෙසේ වෙතත් ජනාධිපතිවරයා විසින් කොමිසම් වාර්තාව සම්බන්ධයෙන් කරන ලද ප්‍රකාශය මේ වන විට පටිගත කර ඇති අතර එය 03 බදාදා සවස වන විට මාධ්‍ය වෙත නිකුත් කෙරෙණු ඇත.
මහ බැංකු බැඳුම්කර සිදුවීම පිළිබඳව නැගී ඇති චෝදනා සම්බන්ධයෙන් විමර්ශන හා පරීක්ෂණ සිදුකර වාර්තා කිරීමට ජනාධිපතිවරයා විසින් 2017 ජනවාරි මාසයේදී ශ්‍රේෂ්ඨාධිකරණ විනිසුරු කංකානි තන්ත්‍රි චිත්‍රසිරි, ශ්‍රේෂ්ඨාධිකරණ විනිසුරු ප්‍රසන්න සුජීව ජයවර්ධන සහ විශ්‍රාමික නියෝජ්‍ය විගණකාධිපති කන්දසාමි වේලුපිල්ලේ යුත් කොමිසම පත් කළේය.
Facebook Comments
