ගමින් ගමට ගොස් පාසලෙන් පාසලට ගොස් ප්‍රජාව වෙත සමීප වෙමින් ළමයින්ගේ ආරක්ෂාව වෙනුවෙන් කටයුතු කළ යුතු බව මෙන්ම 2018 වර්ෂය ළමා ආරක්ෂාවේ වසර කරගත යුතු බවට ජාතික ළමා ආරක්ෂක අධිකාරියේ සභාපතිවරයා පවසා තිබේ.
“2018 වර්ෂය ළමා ආරක්ෂාවේ වසර කරගත යුතු බව මාගේ අපේක්ෂාවයි. ගමින් ගමට ගොස් පාසලෙන් පාසලට ගොස් ප්‍රජාව වෙත සමීප වෙමින් ළමයින්ගේ ආරක්ෂාව වෙනුවෙන් කටයුතු කළ යුතුය. දරුවන්ගේ ලෝකය වඩාත් සුරක්ෂිත කිරීම අප සියළු දෙනාගේම වගකීමක් වන අතර, එම භාරදූර වගකීම පැහැරහරින සෑම අවස්ථාවකදීම ළමයා ශාරීරිකවත්, මානසිකවත් පීඩාවට පත්වීම වැළැක්විය නොහැකිය. එම නිසා මෙම නව වසර තුළදී සියළුදෙනාම දරුවන්ගේ ආරක්ෂාව වෙනුවෙන් කැපවිය යුතු” යැයි නීතීඥ මරිනි ද ලිවේරා අවධාරණය කරන්නේ ජනවාරි මස 04 වැනිදාට යෙදෙන ළමා හිංසනයට එරෙහි ජාතික දිනය නිමිත්තෙන් නිවේදනයක් නිකුත් කරමිනි.
දරුවන් ළමා හිංසනය ඇතුළු සියලු අපයෝජනයන්ගෙන් ආරක්ෂා කර ගනිමින් ඔවුන්ට වඩාත් සුරක්ෂිත හෙට දිනක් උරුම කර දීම සඳහා සියලු පාර්ශවයන් එකට එක්ව කටයුතු කළ බවටයි ඇය විශ්වාසය පල කරන්නේ.
මෙරට වැඩිහිටි පුරවැසියන් වන සෑම විටම ළමයා, ළමයෙකු බව වටහා ගනිමින් ඔවුන්ට දයාව, කරුණාව හා සැලකිල්ල, ආරක්ෂාව හැකි උපරිමයෙන් ලබාදෙමින්, ඔවුන්ගේ ලෝකය වඩාත් යහපත් කරලීමට කටයුතු කල යුතු බව පෙන්වා දෙන සභාපතිවරිය ඉන් මනා පෞරුෂයන්ගෙන් හෙබි අනාගත පුරවැසියන්ගෙන් අභිමානවත් වූ සමාජයක් බිහිකිරීමටත් පිටුවහලක් වන බව සිය නිවේදනයේ සඳහන් කර ඇත.
2008.12.26 වැනි සිකුරාදා නිකුත් කළ ගැසට් පත්‍රය මඟින් සෑම වර්ෂයකම ජනවාරි 04 වැනිදා ළමා හිංසනයට එරෙහි ජාතික දිනය ලෙස ප්‍රකාශයට පත් කර ඇති අතර එම දිනය ප්‍රකාශයට පත්කර ඇත්තේ ළමාහිංසනටය එරෙහිව ක්‍රියාත්මක වීම මෙන්ම ළමා අයිතිවාසිකම් සුරක්ෂිත කිරීම අරමුණු කර ගනිමිනි.
Facebook Comments
