ජනපති යටතේ ඇති ජාතික ඒකාග්‍රතා සහ සංහිඳියා අමාත්‍යංශය මගින් ක්‍රියාත්මක වන අතුරුදහන් වුවන් පිළිබද වු කාර්යාලය (OMP) සඳහා පත් කරන ලද කොමසාරිස් වෙත පත්විමේ ලිපි පිරිනමා තිබේ.
පාර්ලිමේන්තුව විසින් 2016 අගෝස්තු මස අතුරුදන්වූවන්ගේ කාර්යාල පනත සම්මත කරන ලද අතර 28 බදාදා කොමසාරිස්වරුන් පත්කිරීමත් සමග මෙම කාර්යාලය ක්‍රියාත්මක වීම ආරම්භ වන බව රජයේ ප්‍රවෘත්ති අධ්‍යක්ෂ ජනරාල් නීතිඥ සුදර්ශන ගුණවර්ධන මාර්තු 01 බ්‍රහස්පතින්දා නිකුත් කල නිවේදනයේ දැක්වේ.
ශ්‍රී ලංකාවේ අතුරුදන්වූවන්ට සිදුව ඇත්තේ කුමක්දැයි සොයා බලා ඔවුන්ගේ තත්ත්වය නීර්ණය කිරීම අතුරුදන්වූවන්ගේ කාර්යාලයට පැවරෙන වගකීම වන අතර දේශීය වශයෙන් නිර්මාණය කොට ක්‍රියාත්මක කරන සංහිඳියා යාන්ත්‍රණයන් හෙවත් සංක්‍රමණීය යුක්තිය පිළිබඳ යාන්ත්‍රණයන්හි පළමු පියවර මෙය බවයි එම නිවේදනයේ දැක්වෙන්නේ.
ජනාධිපති නීතිඥ සාලිය පීරිස්ගේ සභාපතිත්වයෙන් යුත් මෙම කාර්යාලයේ ජයදීපා පුණ්‍යමූර්ති, මේජර් ජෙනරාල් (විශ්‍රාමික ) මොහාන්ති ඇන්ටොනට් පීරිස්, ආචාර්ය ශ්‍රියානි නිමල්කා ප්‍රනාන්දු, මිරාක් රහීම්, සෝමසිරි කේ. ලියනගේ, සහ කණපතිපිල්ලෛ වේන්දන් සෙසු සාමාජිකයන් ලෙස කටයුතු කරයි.
කොමසාරිස්වරුන් පත් කර ඇත්තේ තුන් අවුරුද්දක කාල සීමවකට පමණක් බවයි රජයේ ප්‍රවෘත්ති අධ්‍යක්ෂ ජනරාල්වරයා පවසන්නේ.
රජය විසින් 2018 වසර සඳහා වූ අය- වැය යෝජනා මගින් අතුරුදන්වූවන්ගේ කාර්යාලය උදෙසා රුපියල් බිලියන 1.3 ක් හෙවත් රුපියල් කෝටි 130ක් වෙන් කරන ලදී.
“අතුරුදන්වූවන්ගේ කාර්යාලය පාර්ලිමේන්තුවට වගකියන ස්වාධීන ආයතනයක් වෙයි. ශ්‍රී ලංකාවේ අභ්‍යන්තර ඝට්ටනයන් හේතුවෙන් විපතට පත්වූ සහ දිවි ගලවාගත් පවුල්වල සාමාජිකයන් අස්වැසිල්ලක් ලබා දීමටත්, වින්දිතයන්ට සහ ඔවුන්ගේ පවුල්වල අයට තිරසර හානිපූරණයක් උදෙසා පදනම දැමීමත් මෙම අතුරුදන්වූවන්ගේ කාර්යාලය විසින් සිදු කරනු ඇතැයි අපේක්ෂා කෙරෙයි.” යන්න රජයේ ප්‍රවෘත්ති අධ්‍යක්ෂ ජනරාල් නීතිඥ සුදර්ශන ගුණවර්ධනගේ අත්සනින් යුතුව නිකුත් කල නිවේදනයේ වැඩි දුරටත් දක්වා ඇත.
Facebook Comments
