අතුරුදහන්වුවන් පිළිබඳ කාර්යාලය (OMP) සහ එහි කාර්යභාරය වෙනම අමාත්‍යංශයක් වෙත භාර නොදී ජනාධිපතිවරයා සන්තකයේ තබා ගැනීම ව්‍යවස්ථා විරෝධී බවට ජාත්‍යන්තර නීතිවේදී කොමිසම (ICJ) විසින් හෙලා දැක ඇත.
අතුරුදහන් පුද්ගලයන් පිලිබඳ සොයා බැලීම සඳහා වන ස්ථාවර වරමක් සහිත OMP වැනි වැදගත් කාර්යාලයක් පිහිටුවීම සඳහා අවශ්‍ය ආණ්ඩුක්‍රම ව්‍යවස්ථානුකුල විධිවිධාන අනුගමනය නොකිරීම නිසා එහි අනාගතය අවිනිශ්චිත වනු ඇති බවට ICJහි ආසියා ශාන්තිකර කලාපීය ප්‍රධානී ෆ්‍රෙඩ්රික් රෝව්ස්කි බිය පල කරයි.
පාර්ලිමේන්තුවේ අනුමැතිය ලබා අවුරුද්දක් ගතවීත් අතුරුදහන්වුවන් පිළිබඳ කාර්යාලය (OMP) පිහිටුවා නැතිවීම සම්බන්ධයෙන් බරපතල අවධානය යොමුකරන ජාත්‍යන්තර නීතිවේදී කොමිසම යුද පීඩිතයන්ට යුක්තිය ඉටු කිරීම සඳහා දුන් පොරොන්දු තවත් කල් නොයවා ඉටු කරන ලෙස ශ්‍රී ලංකාවේ ආණ්ඩුවට බලකර සිටී.
ආණ්ඩුව විසින් OMP කාර්යාලය ස්ථාපිත කිරීම සඳහා දීර්ඝ සහ අනවශ්‍ය ලෙස කල් ගැනීම තවදුරටත් පීඩිත ජනතාවට ඉවසා දරා ගත නොහැකි වනු ඇති බවටයි ICJ නිවේදනයක් නිකුත් කරමින් අනතුරු අඟවා සිටින්නේ.
දෙමළ ජනතාවගේ විශ්වාසය ගිලිහී යාම
අතුරුදහන් සිය සමීපතමයන් ගේ ඉරණම හෙළි කරන ලෙස රජයට බල කරමින් ඥාතීන් විසින් මාස 6 ක කාලයක සිට අඛණ්ඩව පවත්වාගෙන යනු ලබන විරෝධතා වලින් පෙන්නුම් කෙරෙන්නේ රජය කෙරේ මහත් විශ්වාසය තැබූ දෙමළ ජනතාවගේ නොසන්සුන්තාව බව ජාත්‍යන්තර නීතිවේදී කොමිසම අවධාරණය කරයි.
නීතිගත කොට ඇති OMP කාර්යාලය ක්‍රියාත්මක කිරීමේත්, යුද අපරාධ ඇතුළු ජාත්‍යන්තර පරිමානයේ අපරාධ සම්බන්ධයෙන් යුක්තිය ඉටු කිරීමේත් ප්‍රමාදය, වත්මන් රජය බලයට පත් කිරීමට බහුතර ඡන්දයක් ලබා දුන් දෙමළ ජනතාවගේ විශ්වාසය ගිලිහී යාමට හේතුවනු ඇති බවයි ජාත්‍යන්තර නීතිවේදී කොමිසම (ICJ) රජයට අනතුරු අඟවන්නේ.
යුද අපරාධ ඇතුළු මානව හිමිකම් උල්ලංඝන සම්බන්ධයෙන් යුක්තිය ඉටු කිරීමට මෛත්‍රී රනිල් පාලනය පොරොන්දු අතරින් එකක් වන අතුරුදහන් වුවන්ගේ කාර්යාලය පිහිටුවීම පිළිබඳ කෙටුම්පත පාර්ලිමේන්තුව විසින් අනුමත කරන ලද්දේ 2016 අගෝස්තු මසදීය.
Facebook Comments
