ඉදිරි ජනාධිපතිවරණයට තමන් ඉදිරිපත් වන බවට පල වන මාධ්‍ය වාර්තා පවුලේ ආරාවුල් ඇති කිරීම උදෙසා පල කර ඇති බව පවසන ගෝඨාභය රාජපක්ෂ මීළඟ ජනාධිපති අපේක්ෂකත්වයට බැසිල් රාජපක්ෂ හට ලබා දීමට මනාපය පළ කර තිබේ.
හිටපු ජනපති මහින්ද රාජපක්ෂ, බැසිල් රාජපක්ෂ ඉදිරියට ගෙන ඒමේ සුදානමක් සම්බන්ධ පුවත් පත් වාර්තාවක් පදනම් කර ගනිමින් මාධ්‍යවේදියකු නැඟු ප්‍රශ්නකට පිළිතුරු දෙමින් හිටපු ආරක්ෂක ලේකම්වරයා 9 අඟහරුවාදා නඩු විභාගයකින් අනතුරුව ස්ථීර ත්‍රිපුද්ගල මහාධිකරණයෙන් පිටව යන අවස්ථාවේ දී කියා සිටියේය.
“ඒවා ඉතින් පවුලේ ආරවුල් ඇති කරන්න කරන දේවල්නේ. තාම මහින්ද ජනාධිපතිතුමා කවුද ඉදිරිපත් වෙන්නෙ කියලා තීරණය කරල නැහැ. මම යෝජනා කරනවා නම් යෝජනා කරන්නෙ බැසිල් රාජපක්ෂ මහත්තයව,” යැයි හිටපු ආරක්ෂක ලේකම් ගෝඨාබය රාජපක්ෂ පැවසීය.
කෙසේ වෙතත් ගෝඨාභය රාජපක්ෂ ඉදිරි ජනාධිපතිවරණ අපේක්ෂකත්වයට නම් කිරීමට වාසුදේව නානායක්කාර, කුමාර වෙල්ගම වැනි රාජපක්ෂ වාදී මන්ත්‍රීවරුන් සිය නොකැමැත්ත මේ වන විටත් පළ කර ඇත.
මේ අතර රුපියල් මිලියන 33 ක රාජ්‍ය මුදලක් අවභාවිත කරමින් වීරකැටිය ප්‍රදේශයේ අදාළ කෞතුකාගාරය ඉදිකිරීම සම්බන්ධයෙනුයි ගෝඨාභය රාජපක්ෂ ඇතුලු විත්තිකරුවන් 7 දෙනෙකුට එරෙහි නඩු විභාගය දෙසැම්බර් 4 වනදා සිට දිනපතා විභාග කිරීමට විශේෂ ත්‍රිපුද්ගල මහාධිකරණය තීරණය කර ඇත.
නඩු විභාගය සම්පත් අබේකෝන්, සම්පත් විජේරත්න සහ චම්පා ජානකී රාජරත්න යන ත්‍රිපුද්ගල විනිසුරු මඩුල්ල ඉදිරියේ විභාග වු අතර නඩුව ලබන 19 වනදා යළි කැඳවීමට නියෝග කළේය.
Facebook Comments
