දෙමළ උද්ඝෝෂකයන්ට මරණීය තර්ජනය කිරිම නිසාවෙන් විදේශ කටයුතු අමාත්‍යංශය සේවයෙන් පහ කරන ලද ශ්‍රී ලංකාවේ බ්‍රිතාන්‍ය මහ කොමසාරිස් කාර්යාලයේ ආරක්ෂක කටයුතු භාර තානාපති නිලධාරියා ජනපතිගේ නියෝග මත යළි සේවයේ පිහිටුවා තිබේ.
බ්‍රිගේඩියර් ආඬිගේ ප්‍රියංක ඉඳුනිල් ප්‍රනාන්දු නැවත සේවයේ පිහිටුවන ලෙස විදේශ කටයතු අමාත්‍යාංශය මහ කොමසාරිස් කාර්යාලයට දැනුම් දී ඇත්තේ ජනාධිපති හා ආරක්ෂක අමාත්‍ය මෛත්‍රිපාල සිරිසේන විසින් දෙන ලද නියෝගයක් පරිදිය.
ලන්ඩනයේ ශ්‍රී ලංකා තානාපති කාර්යාලය තුළ නිදහස් සමරු උත්සව පැවැත්වෙන අවස්ථාවේ ශ්‍රී ලංකාවේ දෙමළ ජනතාවට සිදුවන පීඩාවන්ට එරෙහි විරෝධය පාමින් එළියේ උද්ඝෝෂණයේ යෙදී සිටි සිය ගණනක් ඉදිරියට නිල ඇඳුමින් සැරසී යුද හමුදා නිලධාරියකු උගුර හරහා කිහිප වතාවක් දකුණතේ ඇඟිලි යවමින් ගෙල සිඳීම සංඥා කරන වීඩියෝ පට සමාජ ඡාලා ඔස්සේ හුවමාරු වී තිබු අතර එය කෙරෙහි අවධානය යොමු කල විදේශ කටයුතු අමාත්‍යංශය ඔහුගේ සේවය අත්හිටුවන ලදී.
එම අවස්ථාවේදි බ්‍රිගේඩියර් ආඬිගේ ප්‍රියංක ඉඳුනිල් ප්‍රනාන්දු ගේ හැසිරීම ආක්‍රමණකාරී බව මෙන්ම ශ්‍රී ලංකාවේ බලධාරින් ඒ පිළිබඳව දැඩි අවධානය යොමු කර ඇති බව විදේශ අමාත්‍යාංශය ඔහුගේ සේවය අත්හිටුවමින් නිවේදනය කර තිබුණි.
අදාළ සිද්ධිය පිළිබඳව කෙරෙන ඕනෑම පරීක්ෂණයකට යුද හමුදාවේ සහයෝගය ලබා දීමට සුදානම් නමුත් පරීක්ෂණයකින් තොරව ඔහුගේ සේවය අත්හිටුවීම පිලිගත නොහැකි බව යුද හමුදාපති වරයා පවසයි.
“සමාජ මාධ්‍ය ජාල වල වීඩියෝ තිබුනු පලියට හමුදා නිලධාරීන් තනතුරු වලින් ඉවත් නොකරන,” බව ලුතිනන් ජනරාල් මහේෂ් සේනානායක මාධ්‍යවේදීන්ට පවසා තිබුනි.
Facebook Comments
