කොරෝනා භීතිය මැද්දේ ජාතිවාදය අවුළුවන දෙදෙනෙක් අත් අඩංගුවට

0

කොරෝනා වෛරස් ව්‍යාප්තිය සීමා කිරීම සදහා රට තුළ ඇඳිරි නීතිය ක්‍රියාත්මක කර තිබියදී සමාජ මාධ්‍ය ජාලා ඔස්සේ අසත්‍ය තොරතුරු පල කිරීමේ චෝදනාවට තිදෙනකු අත් අඩංගුවට ගෙන තිබේ.

ජාතිවාදය ඉස්මතු වීමට රුකුල් දෙන අයුරින් ව්‍යාජ තොරතුරු අඩංගු වීඩියෝ පටයක් අන්තර්ජාලයට නිකුත් කිරීම සම්බන්ධයෙන් දෙදෙනකුද මවකට හා අලුත උපන් දරුවකුට කොරෝනා රෝගය වැළඳුනු බවට අසත්‍ය ප්‍රචාරයක් කිරීමේ චෝදනා ලබන හිටපු ජනාධිපතිවරයාගේ මාධ්‍ය අංශයේ නිලධාරියකුද මෙසේ අත් අඩංගුවට ගන්නා ලද බව පොලිසිය කියා සිටී.

මුස්ලිම් දේවස්ථානයක කලකට ඉහත පැවැති උත්සවයක වීඩියෝවක් කොරෝනා සමයේ නීති විරෝධී එකරාශිවීමක් ලෙස හුවා දක්වමින් සමාජ මාධ්‍ය ජාල වල ප්‍රචාරය කර තිබුනි.

එය බේරුවල ප්‍රදේශයේ මුස්ලිම් පල්ලියක කොරෝනා සමයේ පැවැති විශාල පිරිසක් සහභාගි වූ උත්සවයක වීඩියෝවක් ලෙසින් කර තිබූ ප්‍රචාරය අසත්‍යයක් බව හෙළිදරව් වීමෙන් අනතුරුව දෙදෙනකු අත් අඩංගුවට ගන්නා ලද බව කොවිඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ දී මාර්තු 29 ඉරිදා සන්ධ්‍යාවේ පැවැති මාධ්‍ය හමුවකදී පොලිස් ප්‍රකාශක අජිත් රෝහණ ප්‍රකාශ කළේය.

නිරෝධායන රීතීන්ට පටහැනිව පැවැත්වුන මේ උත්සවය සම්බන්ධයෙන් පොලීසිය නිසි ක්‍රියාමාර්ගයක් නොගත් බවට පොලීසියටත්, මෙවැනි උත්සව පැවැත්වීමට ඉඩ ලබා දීම යන්න සම්බන්ධයෙන්ද හා සෞඛ්‍ය බලධාරීන්ටත් එරෙහිව එම වීඩියෝවෙන් චෝදනා නගා තිබුණි.

අපරාධ පරීක්ෂණ දෙපාර්තමේන්තුව එම වීඩියෝව සම්බන්ධයෙන් විශේෂ පරීක්ෂණයක් පැවැත්වු අතර එම වීඩියෝ පටය මීට මාස ගණනාවකට ඉහත උත්සවයක වීඩියෝවක් බවට තහවුරු වු බැවින් අන්තර්ජාලයට එක් කර තිබු ප්‍රවෘත්තිය සම්පුර්ණයෙන්ම අසත්‍ය ප්‍රවෘත්තියක් බව අනාවරණය වු බවයි නියෝජ්‍ය පොලිස්පති වරයා සඳහන් කළේ.

ඒ අනුව සැකකරුවන් දෙදෙනා අත්අඩංගුවට ‌ෙගන ඇත.

ගිය ආණ්ඩුවේ ප්‍රබලයෙක්

පසුගියදා කොළඹ පෞද්ගලික රෝහලක දී බිහි කළ දරුවකුට සහ ඔහුගේ මවට කොරෝනා රෝගය වැළඳී ඇති බවට සමාජ මාධ්‍ය ජාලා ඔස්සේ කරන ලද ප්‍රචාරයක් අසත්‍ය බව හෙළිවීමෙන් අනතුරුව අත් අඩංගුවට ගෙන ඇත්තේ මෛත්‍රීපාල සිරිසේන ජනාධිපතිවරයා ගේ මාධ්‍ය ඒකකයේ සේවය කළ මාධ්‍යවේදියෙකි.

කොළඹ ප්‍රසිද්ධ පෞද්ගලික රෝහලක කොරෝනා ආසාදිත බිළිඳියක් සිටින බවට සිය FB පිටුවේ කළ සටහනක් සම්බන්ධයෙන් එම රෝහලේ බලධාරීන් විසින් කළ පැමිණිල්ලක් මත මාර්තු 28 දා නුවන් නිරෝධ මාධ්‍යවේදියා කුරුණෑගල උහුමීය ප්‍රදේශයේදී අත්අඩංගුවට ගත් බව නියෝජ්‍ය පොලිස්පතිවරයා එම මාධ්‍ය හමුවේදී අනාවරණය කළේය.

අපරාධ පරීක්ෂණ දෙපාර්තමේන්තු විසින් අත්අඩංගුවට ගත් නුවන් නිරෝධ මාර්තු 29 ඉරිදා අධිකරණය හමුවට ඉදිරිපත් කර ඇති අතර අධිකරණ නියෝගයක් මත ඔහු අප්‍රේල් 8 දක්වා රක්ෂිත බන්ධනාගාර ගත කළ බව නියෝජ්‍ය පොලිස්පති අජිත් රෝහන සදහන් කරයි.

එමෙන්ම ඔහුට එවැනි අසත්‍ය ප්‍රවෘත්තියක් නිර්මාණය කිරීම සදහා අනුබල දුන් පුද්ගලයන් සම්බන්ධයෙන්ද අපරාධ පරීක්ෂණ දෙපාර්තමේන්තුව පරීක්ෂණ සිදු කරන බව නියෝජ්‍ය පොලිස්පතිවරයා වැඩි දුරටත් සඳහන් කළේය.

මාර්තු 29 ඉරිදා රජයේ ප්‍රවෘත්ති දෙපාර්තමේන්තුවේ පැවැති විශේෂ මාධ්‍ය හමුවකට එක්වෙමින් පොලිස් මාධ්‍ය ප්‍රකාශක පොලිස් අධිකාරී ජාලිය සේනාරත්න සදහන් කර තිබුනේ කොරෝනා වෛරසය හේතුවෙන් රට තුළ උද්ගත ව ඇති තත්වය හමුවේ මහජනතාව කැළඹෙන ආකාරයෙන් අසත්‍ය ප්‍රචාර සමාජ මාධ්‍ය ජාලා ඔස්සේ නිකුත් කිරීම බරපතළ වරදක් බවයි.

සමාජ මාධ්‍ය ජාලා ඔස්සේ අසත්‍ය ප්‍රචාර සිදු කරන්නන් පනස් හත් දෙනකු සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනය කර ඇති බව මාධ්‍ය ප්‍රකාශකයා එහිදී වැඩි දුරටත් සදහන් කර තිබුනි.

Facebook Comments

wedding people