මලය කඳුරට ජනතා අරගලයට ‘සාධනීය ප්‍රතිචාර’

ලක්දිවට පා තබා වසර 200 ක් ගතවීමෙන් අනතුරුව මෙරට ජීවත් වන මලය රටේ දෙමළ ජනතාව වෙනම ජාතිකත්වයක් සහිත ප්‍රජාවක් ලෙස පිළිගැනීමට බලධාරීන් එකඟ වී තිබේ.

ශ්‍රී ලංකාවේ නිදහස් හා සමාන පුරවැසියන් ලෙස පිළිගන්නා ලෙස ඉල්ලා වසරකට ඉහතදී දියත් කළ පා ගමනේ දහයකට වැඩි මුලික ඉල්ලීම් අතරින් ඉල්ලිම් දෙකක් සම්බන්ධයෙන් සාධනීය ප්‍රතිචාර ලැබී ඇති බව එහි සංවිධාකයෝ පවසති.

මාන්බුමිගු මලෛයහ සිවිල් සංවිධාන එකමුතුවේ කැදවුම්කරු ඇන්තනී ජේසුදාසන් පවසන්නේ මලෛයහ දෙමළ ප්‍රජාවගේ අනන්‍යතාව තහවුරු කිරීම සම්බන්ධයෙන් ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජෙනරාල්වරයාගෙන් කළ ඉල්ලීමට ඔහු එකඟතාව පළ කළ බවයි.

“මාන්බුමිගු මලෛයහ පා ගමනේ දී අපි ඉල්ලීම් 11 ක් ඉදිරිපත් කරලා තිබුනා. ඒකෙන් දෙකක් ඉටු වෙලා තියනවා කියලා කියන්න පුළුවන්. මලෛයහ ජනතාව ජාතික, ජාතියක් ලෙස පිළිගෙන පොදුවේ සෑම තැනකම මලෛයහ ජනතාව ලෙස හඳුන්වන ලෙස අපි ඉල්ලා සිටියා. ඒය සාර්ථක වී තිබෙනවා. සංගණනයේදී මලෛයහ දෙමළ ජාතිකයන් ලෙස සඳහන් කිරීමට අවස්ථාවක් ලබාදෙන ලෙස අපි ඉල්ලා තිබුණා. එබැවින් ඉන්දියානු දෙමළ හෝ විකල්ප වශයෙන් මලෛයහ දෙමළ ලෙස හැඳින්වීමට අවස්ථාව තිබෙනවා.”

සියවස් දෙකක කාලයක සිට මෙරට ආර්ථිකයට දැවැන්ත ශක්තියක් වී සිටින මලය රටේ දෙමළ ජනතාව ශ්‍රී ලංකාවේ නිදහස් හා සමාන පුරවැසියන් ලෙස පිළිගන්නා මෙන් ඉල්ලමින් 2023 වසරේ තලෙයිමන්නාරම සිට මාතලේ දක්වා ගමන් ගත් දෙසතියක පා ගමනට 2024 ජුලි 28 දාට වසරක් සපිරීම නිමිත්තෙන් තලෙයි මන්නාරම, උර් මනෙයි ගම්මානයේ ස්ථාපිත කර තිබෙන ස්මාරකය අසලදි පාසල් සිසුන් ඇතුළු පිරිසකගේ සහභාගීත්වයෙන් සිදු කළ අනුස්මරණයට එක්වෙමින් ඇන්තනී ජේසුදාසන් තව දුරටත් සදහන් කළේ මලෛයහ ජනතාවට ලිපිනයක් ලබා දීම සම්බන්ධයෙන් අධිකරණය ලබා දුන් තීන්දුවද සුවිශේෂී වන බවයි.

“මලෛයහ ජනතාවට වෙනම නිවෙස් ලිපිනයක් ලබාදීම සම්බන්ධයෙන් අධිකරණය ලබාදුන් තීන්දුවද මෙහිදී සුවිශේෂී වෙනවා. කඳුකර ජනතාවට ලබා දෙන ඉඩම් අයිතිය පිළිබඳ ගැටලූව සම්බන්ධයෙන් පාර්ලිමේන්තුව තුළ සහ පොදු අවකාශය තුළ සාධනීය සාකච්ඡා සිදුවෙමින් පවතිනවා.”

“මලෛයහ තමිළර් ජනයාගේ අනන්‍යතාව තහවුරු කිරීම සම්බන්ධව” මැයෙන් පුද්ගලයන් 338 දෙනකුගේ සහ සංවිධාන 60 ක නම් සහිතව 2024 පෙබරවාරි 15 වැනිදා ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජෙනරාල් වෙත යොමු කළ ලිපියක් මගින් ඔවුන් පෙන්වා දී තිබුනේ අද වන විට ජනාධිපතිතුමාගේ නිල ප්‍රකාශ, රජයේ පත්වීම් සහ කැබිනට් තිරණ වලදී මලෛයහ තමිලර් අනන්‍යතාව පිලිගෙන ඇති බව පිළිබිඹු කරන බවයි.

“මෙවන් පසුබිමක් තුළ මොවුනට ශ්‍රී ලංකාව තුළ සුවිශේෂි අනන්‍යතාවයක් තහවුරු කරණු පිනිස මෙවර සංගණනයේ දී ජන වර්ගය යන p8 කොටස තුළ ” මලෛයහ තමිළර් ” ලෙස නිල වශයෙන් පිලිගැනීමට කරනු ලබන ඉල්ලීම, පහත අත්සන් කරන අපි මුළුමනින්ම අනුමත කරන්නෙමු,” යි ඔවුහු ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජෙනරාල්වරයාගෙන් ලිඛිතවම ඉල්ලා තිබුනහ.

මේ වසර සදහා ලේඛන සකස් කිරීමේදී මලය රටේ දෙමළ පුද්ගලයන් ඉන්දියානු දෙමළ හෝ විකල්ප වශයෙන් මලෛයහ දෙමළ ලෙස හෝ හැඳින්වීමට එහිදී ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්ෂ ජෙනරාල්වරයා එක වු බවයි මාන්බුමිගු මලෛයහ සිවිල් සංවිධාන එකමුතුවේ කැදවුම්කරු ඇන්තනී ජේසුදාසන් පවසන්නේ.

තැපැල් ලිපිනයක්

මාවතගම “මුවන් කන්ද” වතුයායේ වෙසෙන වතු කම්කරු ප්‍රජාව සඳහා තැපැල් ලිපින ලබා දීමට පියවර ගෙන ඇතැයි නීතිපතිවරයා විසින් 2023 වසරේ දෙසැම්බර් 4 වැනිදා ශ්‍රේෂ්ඨාධිකරණයට දැනුම් දී තිබුනි.

නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් කණිෂ්කා ද සිල්වා විසින් ඒ බව අධිකරණයට දැනුම් දී තිබුනේ වතු කම්කරු ප්‍රජාව සඳහා තැපැල් ලිපින ලබා දෙන ලෙස රජය වෙත නියෝගයක් නිකුත් කරන්නැයි ඉල්ලමින් මාවතගම “මුවන් කන්ද” වතුයායේ පදිංචි ජීවරත්නම් සුරේෂ් කුමාර් විසින් ඉදිරිපත් කළ මූලික අයිතිවාසිකම් පෙත්සම අද කැඳවනු ලැබූ අවස්ථාවේදීය.

එම පෙත්සම කැදවා තිබුනේ අගවිනිසුරු ජයන්ත ජයසූරිය, ඒ.එච්.එම්.ඩී නවාස් සහ අර්ජුන ඔබේසේකර යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේය.

එහිදී පෙත්සම්කාර පාර්ශ්වය වෙනුවෙන් පෙනී සිටි නීතිඥ ලක්ෂාන් ඩයස් අධිකරණය හමුවේ කරුණු දක්වමින් සදහන් කර තිබුනේ තම සේවාදායකයා මෙම පෙත්සම ඉදිරිපත් කිරීමේ අරමුණ වූයේ දිවයින පුරා වාසය කරන සමස්ත වතු ප්‍රජාවට තැපැල් ලිපින ලබා දීමට බවයි.

ඒ සඳහා සැලකිය යුතු කාලයක් ගත විය හැකි බව තමාද පිළිගන්නා බව නීතිඥවරයා තවදුරටත් පවසා තිබුනි.

දෙසතියක පා ගමන

ශ්‍රී ලංකාවේ අර්ථවත් පුරවැසියන් වීම සදහා රජයට ඉල්ලීම් 11 ක් ඉදිරිපත් කරමින් 2023 වසරේ ජුලි 28 වැනිදා තලෙයිමන්නාරමේදී සමාරම්භක උත්සවය පැවැත්වු මලෛයහ දෙමළ ජනයා ජුලි 29 වැනිදා උදෑසන තලෙයිමන්නාරමෙන් ආරම්භ කළ පා ගමන කිලෝ මීටර 300 ට ආසන්න දුරක් ගෙවා දමමින් මාතලේට පැමිණිමෙන් අනතුරුව නිමා කර තිබුනේ 2023 අගෝස්තු 12 වැනි දිනයි.

වසර 200 ට ඉහත දී සිය මුතුන් මිත්තන් ඉන්දියාවේ ධනුෂ්කොඩි සිට ශ්‍රී ලංකාවේ තලෙයිමන්නාරමට පැමිණ අනේක වු දුෂ්කරතා මධ්‍යයේ පා ගමනින්ම මාතලේට ළඟා වූ ගමන් මාර්ගයම මෙම පා ගමන සදහා තෝරා ගත් බැවින් ඔවුන් එය නම් කර තිබුනේ “මුලයන් සොයමින් අයිතීන් දිනාගැනීමට” මැයෙනි.

මලය කඳුරට දෙමළ ප්‍රජාවගේ ඉතිහාසය, අරගල, ජයග්‍රහණ, ඔවුන්ගේ දායකත්වය, වත්මන් සමාජ-ආර්ථික හා දේශපාලන තත්ත්වය සහ අභිලාෂයන් පිළිිබව සිංහල, ශ්‍රී ලාංකික දෙමළ, මුස්ලිම් සහ අනෙකුත් සහෝදර ජනතාව අතර මුුලික අවබෝධයක් ඇති කිරීම ද මෙම පා ගමනේ අරමුණු වී තිබුනි.

මන්නාරම සිට මාතලේ දක්වා වන පාගමන සහ වැඩසටහන් සංවිධානය කර තිබුනේ ශ්‍රී ලංකා ජාතික ක්‍රිස්තියානි මණ්ඩලය සහ පුළුල් සිවිල් සමාජ සංවිධාන සමුහයක් හා මලෛයහ ප්‍රජාවට අයත් සහ/හෝ ඔවුන් සමඟ කටයුතු කරන පුද්ගලයන්ගෙන් සමන්විත ‘මාන්බූමිගු මලෛයහ මක්කල් සාමුහිකය’ විසිනි.

ශ්‍රී ලංකාවේ විශාලතම සමූහ සුසාන හමුවූ දිස්ත්‍රික්ක දෙක වන්නේද මන්නාරම හා මාතලේයි.

ඉල්ලීම් මොනවාද?

මෙරටට පැමිණ වසර 200 ක් සම්පුර්ණ වී ඇතත් ශ්‍රී ලංකාවේ අර්ථවත් පුරවැසියන් වීම සදහා මලෛයහ දෙමළ ජනතාව ඉල්ලා සිටින ඉල්ලීම් පහතින්;

01. සිය ඉතිහාසය, අරගලය සහ දායකත්වය පිළි ගැනීම,

02. අනෙකුත් ප්‍රධාන ප්‍රජාවන් හා සමානව වෙනමම අනන්‍යතාව සහිත, නිදහස් ශ්‍රී ලංකාවේ ජන කොටසක් ලෙස පිළි ගැනීම,

03. ජාතික මට්ටමේ සාමාන්‍යය හා සමාන මට්ටමක් ළඟාකර ගැනීමට අධ්‍යාපනය, සෞඛ්‍යය සහ සමාජ ආරක්ෂණයන් සම්බන්ධ සාධනීය ක්‍රියාමාර්ග,

04. ජීවත්වීමට සරිලන වැටුපක්, ගෞරවනීය රැකියා, නෛතික ආරක්ෂාව සහ පිරිමි හා කාන්තා කම්කරුවන්ට සමාන වැටුප්,

05. නිවාස සහ ජීවනෝපාය සඳහා සුරක්ෂිත හිමිකමක් සහිත ඉඩම්,

06. දෙමළ භාෂාව සමාන ලෙස භාවිතය සහ ඒ සඳහා සමාන තත්වයක්,

07‍. රාජ්‍ය සේවා වෙත සමාන ප්‍රවේශය,

08. වැවිලි අංශයේ ජනාවාස නව ගම්මාන ලෙස සීමා නීර්ණය කිරීම,

09. ගෘහස්ථ සේවකයන් ආරක්ෂා කිරීම,

10. මලෛයහ සංස්කෘතිය සංරක්ෂණය හා ප්‍රවර්ධනය කිරීම,

11. රාජ්‍ය පාලනයේ සෑම මට්ටමකදීම අර්ථවත් පාලන කාර්යභාරයක් හිමිවන පරිදි සමානාත්මතාව සහිත සහ අන්තර්කරණය වූ මැතිවරණ ක්‍රමයක් සහ බලය බෙදීමක්.