විල්පත්තු අභය භූමිය ආශ්‍රිත වනාන්තරය එළිපෙහෙලි කර මුස්ලිම් ජනතාව පදිංචි කිරිම සම්බන්ධයෙන් තමාට එරෙහිව ගොණු කර ඇති නඩුවේ චෝදනාවලින් නිදහස් කරන ලෙස අමාත්‍ය රිෂාඩ් බදියුදීන් සිදු කළ ඉල්ලීම් අභියාචනාධිකරණය ප්‍රතික්ෂේප කර තිබේ.
නීතිඥ නාගානන්ද කොඩිතුවක්කු සහ මාධ්‍යවේදී මාලින්ද සෙනෙවිරත්න යන අය විසින් අමාත්‍ය රිෂාඩ් බදියුදීන් ඇතුලු 07 දෙනෙකුට එරෙහිව අභියාචනාධිකරණය හමුවේ මෙම නඩුව ගොණුකර ඇත.
අමාත්‍යවරයා විසින් දිවුරුම් ප්‍රකාශයක් මඟින් සිදු කළ ඉල්ලීම අභියාචනාධිකරණයේ සභාපති විනිසුරු ප්‍රිති පද්මන් සූරසේන සහ අර්ජුන ඔබේසේකර යන විනිසුරු මඩුල්ල මෙලෙස ප්‍රතික්ෂේප කර තිබේ.
රිෂාඩ් බදියුදීන් ඇමැතිවරයා සිය දිවුරුම් ප්‍රකාශය මඟින් අධිකරණයට පෙන්වා දී තිබුණේ එළිපෙහෙලි කරමින් පවතින විල්පත්තු අභය භුමිය ආශ්‍රිත ප්‍රදේශය 1999 වසර දක්වා ජනපදයක්ව පැවැති බවයි.
එල්.ටී.ටී.ඊ තර්ජන හේතුවෙන් එම ප්‍රදේශයෙන් ඉවත්ව සිටි ජනතාව යලි එහි පදිංචි විමට උත්සහ දරණ අතර එය රක්ෂිතය විනාශ කිරිමක් නොවන බව රිෂාඩ් බදියුදින් සිය දිවුරුම් ප්‍රකාශය මගින් පෙන්වා දී තිබේ.
කෙසේ වෙතත් අමාත්‍යවරයා විසින් පෙන්වා දී ඇති එම කරුණු ඉතා අසත්‍ය බව චන්ද්‍රිකා තාක්ෂණය ඔස්සේ ලබාගත් දර්ශන සහ රජයේ මිනින්දෝරු දෙපාර්තමේන්තුව විසින් නිකුත් කළ භූමි සිතියම් ඉදිරිපත් කරමින් පෙත්සම්කාර පාර්ශවය අභියාචනාධිකරණයට පෙන්වා දුන්නේය.
ඉද්රිපත් වු කරුණු සැලකිල්ලට ගත් අභියාචනාධිකරණය රිෂාඩ් බදියුදීන් අමාත්‍යවරයාගේ ඉල්ලීම් ප්‍රතික්ෂේප කළ අතර අදාළ නඩුව නොවැම්බර් මස 12 වනදා විභාගයට ගැනිමට ද තීරණය කළේය.
Facebook Comments
