ඉන්දීය හමුදා ප්‍රහාරයකින් යාපනයේදී මියගිය පිරිසක් සැමරේ

ඉන්දු ලංකා ගිවිසුමෙන් පසු උතුරු නැගෙනහිර පළාත් වලට කැඳවූ ඉන්දීය යුද හමුදාව විසින් මිට තිස් හත් වරකට පෙර මරා දැමුවන් යාපනය රෝහලේ දී අනුස්මරණය කර තිබේ.

ඉන්දීය සාම සාධක හමුදාවේ යාපන ශික්ෂණ රෝහල් සංහාරයේ 37 වැනි සමරුව ඔක්තෝබර් 21 වැනි සඳුදා රෝහලේදී පැවැත් වු අතර මිය ගිය පිරිස අනුස්මරණය කරමින් මලින් පහනින් ඔවුන්ට උපහාර දැක්වීමට කාර්ය මණ්ඩලය ඇතුළු පිරිස කටයුතු කර තිබේ.

ඝාතනයට ලක් වු නිරායුද වැසියන්ගේ පවුල් වල සාමාජිකයන් කිහිපදෙනකුද එම අවස්ථාවට එක්ව තිබුනේ හැඬු කඳුලින් යුතුවයි.

සාම සාධනය සඳහා යැයි රජයේ ආරාධනයෙන් පැමිණ උතුරේ වාඩිලා සිටි ඉන්දීය භටයන් විසින් සිදුකරන ලද සමූහ ඝාතන මාලාවක්ම සිදු කර ඇත්තේ 1987 ඔක්තෝබර් මාසයේය.

1987 ඔක්තෝබර් 21 වැනිදා ලුතිනන් ජෙනරාල් දිපේන්ද්‍ර සිං ගේ ප්‍රධානත්වයෙන් යුත් ඉන්දීය සාම සාධක හමුදා භට පිරිස් යාපනය ශික්ෂණ රෝහලට කඩා වැදී සිදු කළ වෙඩි ප්‍රහාරයෙන් රෝහල් කාර්ය මණ්ඩලයේ 21 ක් සහ ප්‍රතිකාර ලබමින් සිටී රෝගීන් 47 ක් ඇතුළු 68 දෙනකු මරා දැමිණි.

ඉන්දීය හමුදා විසින් මරා දැමුවන් අතර ඒ. සිවපාදසුන්දරම්, එම්.ජේ.ගනේෂරත්නම් සහ කේ. පරිමලර් වෛද්‍යවරු තිදෙනාත්, ආර්. රාමනාදන්, සිවපාතියම් සහ ලීලාවතී හෙදියන් තිදෙනාත්, දුරකථන ක්‍රියාකරු කනගලිංගම්, වැඩ සුපරික්ෂකයන් වූ ආර්.ක්‍රිෂ්නරාජ්, කේ. සෙල්වරාජ් සහ වී. ෂන්මුගලිංගම් නම් ගිලන් රථ රියදුරා ද වුහ.

රෝහල් ප්‍රහාරය ඇතුළු ඉන්දීය සමූහ ඝාතන සම්බන්ධයෙන් කිසිදු පරීක්ෂණයක් හෝ හානියට පත් වුවන්ට වන්දි ගෙවීමක් හෝ ගෙවී ගිය තිස් හත් වසර තුලදී පෝක් සමුද්‍ර සන්ධිය දෙපස කිසිදු ආණ්ඩුවකින් සිදුවී නැත.

ඉන්දීය මැදිහත් වීමෙන් බලය බෙදා හැරීමට විරුද්ධව දියත් කළ සන්නද්ධ අරගලයකින් පරාජය වූ ජනතා විමුක්ති පෙරමුනේ වත්මන් නායකයා ජාතික ජන බලවේගයේ ද සහායෙන් මේ වන විට මෙරට මුල් පුරවැසියා ලෙස ජනතා ඡන්දයෙන් පත්ව සිටී.