දිවයිනේ මහ වැසි නිසා ඇතිවූ අනතුරු වලින් 24 බ්‍රහස්පතින්දා වනවිට අඩුම වශයෙන් දොලොස් දෙනකු මියගොස් ලක්ෂයකට වැඩි ජනකායක් පීඩාවට පත්ව සිටින බව ආපදා කළමනාකරණ බලධාරීහු පවසති.
දිස්ත්‍රික්ක 19 තුළ පවුල් 31,822 ක 124,733 ක් පීඩාවට පත්වී ඇති බවයි ආපදා කළමණාකරණ මධ්‍යස්ථානය නිවේදනය කරන්නේ.
ආපදා හේතුවෙන් නිවාස 43 ක පුර්ණ හානි සිදු වී ඇති අතර නිවාස 3,172 ක් අර්ධ වශයෙන් හානි වී ඇති බවට ගණන් බලා තිබේ.
අද උදෑසන9.00 ට වන විට පවුල් 14,500 ක 56472 දෙනෙකු ආරක්ෂිත මධ්‍යස්ථාන 246 ක තාවකාලිකව රදවා ඇත.
බස්නාහිර,දකුණු,සබරගමුව, මධ්‍යම සහ වයඹ පළාත්වල තවදුරටත් විටින් විට වැසි හෝ ගිගුරුම් සහිත වැසි ඇති වීමේ අවදානමක් ඇති බවට කාලගුණ විද්‍යා දෙපාර්තමේන්තුව අනතුරු අඟවයි.
එම ප්‍රදේශවල තාවකාලිකව තද සුළං ඇති විය හැකි බවට අනතුරු අඟවන කාලගුණ විද්‍යා දෙපාර්තමේන්තුව අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් ඉල්ලා සිටී.
රත්නපුර, කෑගල්ල, නුවරඑළිය, කඵතර හා ගාල්ල දිස්ත්‍රික්ක සඳහා නාය යෑම්, බෑම් කඩා වැටිම්, ගල් පෙරලීම් හා පස් කණ්ඩි කඩා වැටීමේ අවධානම තවදුරටත් පවතින බවයි ජාතික ගොඩනැගිලි පර්යේෂණ සංවිධානය පවසන්නේ.
එසේම බදුල්ල, කුරුණෑගල, කොළඹ හා ගම්පහ දිස්ත්‍රික්ක සඳහා නාය යෑම්, බෑවුම් කඩා වැටිම්, ගල් පෙරලීම් හා පස් කණ්ඩි කඩා වැටීමේ අවධානම පිළිබඳ විමසිලිමත් සිටින ලෙස බලධාරින් ජනතාවගෙන් ඉල්ලා සිටී.
Facebook Comments
