බලහත්කාරයෙන් අතුරුදහන් කරන ලද්දවුන්ගේ ඥාතීන්ට තර්ජන එල්ල නොකොට ඔවුන්ට සාධාරණයක් ඉටු කරන මෙන් ඥාතීහු ආණ්ඩුවෙන් ඉල්ලා සිටිති.
අතුරුදහන් කළවුන්ගේ ජාත්‍යන්තර දිනය වෙනුවෙන් පැවැත්වූ මාධ්‍ය සාකච්ජාවකදී අම්පාර දිස්ත්‍රික්කයේ අතුරුදහන් කළවුන්ගේ ඥාතීන්ගේ සංගමයේ උපදේශක තමෝදරන් ප්‍රදීපන් කියා සිටියේ “ අතුරුදහන් කලවුන්ට සහන සළසන්න පිහිටවපු අතුරුදහන් තැනැත්තන් පිලිබඳ කාර්යාලය ඒ ගැන වැඩ කරන එක අත් හැර දා , යුක්තිය පතා සටන් කරන ක්‍රියාධරයන් පසු පස ලුහු බදිනවා,“ යනුවෙනි.
යුක්තිය ඉල්ලා කෙරෙන උද්ඝෝෂණ කෝවිඩ් වසංගතය පැතිර යාම නිසා තාවකාලිකව නවතා ඇති මුත් සාධාරණයක් ඉටු කරන තෙක් එය අත්නොහැරීමට අතුරුදහන් කළවුන්ගේ ඥාතින් කටයුතු කරන බව ද කල්මුනේහි පැවති මාධ්‍ය හමුවේදී තමෝදරම් ප්‍රදීපන් පැවසීය.
මේ අතර අතුරුදහන් කළවුන්ගේ දිනය වෙනුවෙන් මාධ්‍ය වෙත අදහස් දක්වමින් පැහැරගෙන ගොස් අතුරුදහන් කළ මාධ්‍යවේදී ප්‍රගීත් එක්නැලිගොඩගේ බිරිඳ සන්ධ්‍යා එක්නැලිගොඩ ද කියා සිටියේ “ අපිට යුක්තියක් ඉටු වෙන්න තිබුණු අතුරුදහන්කළවුන්ගේ කාර්යාලයෙන් මට ලිපියක් එනවා අයි.සි.ආර්.සී එකට යු.එන් එකට යවපු ලිපි වල පිටපත් ඉල්ලා, මේ විදිහට අපෙන් තොරතුරු ඉල්ලන්නේ අපිව කරදරයට පත් කරන්න. නැවත නැවතත් හිංසනයට පත් කරන්න“ යනුවෙනි.
අතුරුදහන් කළ තැනැත්තන්ගේ කාර්යාලයේ ප්‍රධානියා ලෙස ජනධිපති ගෝඨාභය රාජපක්‍ෂ විසින් පත් කළ විශ්‍රාමික විනිසුරු උපාලි අබේරත්න යහපාලන සමයේ දේශපාලන පලිගැනීම් සොයා බැලීමට පත් කළ ජනාධිපති කොමිසමේ සභාපති ලෙස කටයුතු කළේය.
පුද්ගලයන් 11 දෙනෙකු පැහැරගෙන ගොස් අතුරුදහන් කිරීමට සම්බන්ධ හිටපු නාවික හමුදාපති ඇතුළු චුදිතයන් නිදහස් කරන ලෙස අබේරත්න කොමිසම විසින් නිර්දේශ කර තිබුණු අතර තවත් එවැනි නඩු ගණනාවක් සම්බන්ධයෙන් අදාල චුදිතයන්ව නිදහස් කරන ලෙස නිර්දේශ කර තිබේ.
එබැවින් අතුරුදහන් කළ තැනැත්තන් පිලිබඳ කාර්යාලය මගින් තමන්ට යුක්තිය ඉටු වෙනු ඇතැයි අතුරුදහන් කළ වුන්ගේ ඥාතීන්ගේ සංගම් අපේක්‍ෂා නොකරයි.
“යුද්දය අවසන් වෙලා අවුරුදු දොළහක් ගිහිල්ලත් අතුරුදහන්වුවන්ගේ පවුල් වලට කිසිම සෙතක් වෙලා නැහැ ,තවමත් ඔවුන් දුක් විඳිනවා “ යැයි පවසන අම්පාර දිස්ත්‍රික් අතුරුදන්කළවුන්ගේ ඥාතීන්ගේ සංගමයේ උපදේශක තමෝදරම් ප්‍රදීපන් ඉල්ලා සිටින්නේ “ අද වන විට එදා වේල සොයා ගැනීමට පවා නොහැකිව සිටින ඔවුන්ට යුක්තිය ඉටු කර ලීමට නම් ජාත්‍යන්තර මැදිහත් වීමක් අවශ්‍ය,“ බවය.
Facebook Comments
