දෙමළ ජනයාට එරෙහි නොනැවතුන යුද්ධය

ශ්‍රී ලංකාවේ දෙමළ බොහෝ දෙනාට තවමත් යුද්ධය හමාර වී නොමැති අතර නීතිවිරෝධි පැහැර ගැනීම්, රඳවා ගැනිම් සහ වධහිංසා දිගටම සිදුවන බව ජාත්‍යන්තර මාධ්‍ය ආයතනයක් හෙළි කර තිබේ.

යහපාලනය රජය යටතේද දෙමළ ජනයා වධහිංසාවට සහ පැහැර ගැනීමට ලක් වන බව ඇසෝසියේටඩ් ප්‍රෙස් (AP) පුවත් සේවය වාර්තා කරයි.

දේශපාලන රැකවරණ පතා යුරෝපයට ගොස් සිටින 50 දෙනෙකුට වැඩි පිරිසකගේ සම්මුඛ සාකච්ඡා ලබා ගත් බව පවසන AP පුවත් සේවය වධහිංසා සඳහා යොදා ගන්නා උපකරණ සහ ඒ සඳහා ඇති කාමර පිළිබඳව අනාවරණය කර ඇත.

තමන් 21 දිනක් අඳුරු කාමරයක් තුළ රඳවා සිටි බවට පවසා ඇති පිරිමි වින්දිතියෙකු එම කාලයේදී 21 වතාවක් අපයෝජනයට ලක් වු බවද AP පුවත් සේවයට පවසා තිබේ.

දරුණු වධහිංසා

වින්දිතයන් සමඟ සාකච්ඡා කරන ලද දකුණු අප්‍රිකානු මානව හිමිකම් ක්‍රියාධරයෙකු වන පියර්ස් පිගු වින්දිතයන් විඳි දුක් ගැහැට පිළිබඳ අසා මහත් කම්පනයටත් විශ්මයටත් පත් වු බව ප්‍රකාශ කර සිටි.

” වසර 40ක් පුරා මම වධහිංසාට ලක්වු අය සමඟ වැඩ කරලා තියෙනවා මීට පෙර මේතරම් දරුණු වධහිංසා පිළිබඳව මම කවදාවත් අහලා නැහැ ” යැයි ඔහු AP පුවත් සේවයට පවසා ඇත.

අපි දන්නෙ නැහැ

වධහිංසාව පිළිබඳව වන චෝදනා සම්පුර්ණ ප්‍රතික්ෂේප කර ඇති හමුදාපති මහේෂ් සේනානායක ” යුධ හමුදාව මෙවැනි දේට සම්බන්ධ නැහැ මට විශ්වාසයි පොලිසයත් මෙවැනි දේ කරන්නෙ නැහැ දැන් මෙහෙම කරන්න කිසිම අවශ්‍යතාවයක් නැහැ ” යි ඔහු ඇසෝසියේටඩ් ප්‍රෙස් (AP) පුවත් සේවයේ සම්මුඛ සාකච්ඡාවකට එක්වෙමින් කියා තිබේ.

රජය විසින් චෝදනා බැහැර කලද වින්දිතයන් හා මානව හිමිකම් ක්‍රියාධරයන් විසින් තවමත් ශ්‍රී ලංකාව තුල දෙමළ ජනයාට එරෙහිව වධහිංසා සහ පැහැර ගැනීම් සිදුවන බවට වැඩි දුරටත් ඇසෝසියේටඩ් ප්‍රෙස් (AP) පුවත් සේවය වාර්තා කරයි.