බැඳුම්කර කොමිසම් වාර්තාව මෙන්ම, දශක කිහිපයක් තිස්සේ රාජ්‍ය විසින් කරන ලද අපරාධ සම්බන්ධයෙන් සොයා බැලීමට පත් කරන ලද කොමිසම් වාර්තා හෙළිදරව් කරන ලෙසට පිටුවහලේ ජීවත් වන ජ්‍යෙෂ්ඨ මාධ්‍යවේදියෙක් යහපාලන රජයට අභියෝග කර සිටී.
පසුගිය දශක දෙක තුළ රාජ්‍යය විසින් සිදුකර තියෙන සාහසික අපරාධ සම්බන්ධ වාර්තා අදටත් අප්‍රකට, රහස්‍ය වාර්තා බවටයි ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානයේ රෝහිත භාෂණ චෝදනා කරන්නේ.
“පසුගිය දශක දෙක තුළ රාජ්‍යය විසින් සිදුකරලා තියෙන සාහසික අපරාධ ගැන උනන්දු නැත්තේ ඇයි? උදාහරණයක් විදියට, එවකට ජනාධිපති චන්ද්‍රිකා කුමාරණතුංග විසින් 1995 සිට 2000 අවුරුද්ද වෙනකම් විමර්ශන කටයුතු සිදුකිරීමට පත්කරපු අතුරුදහන්වීම් පිළිබඳ කලාප කොමිෂන් සභා තුනක් සහ ජාතික මට්ටමින් විමර්ශනය කළ කොමිෂන් සභාවක් විසින් හෙළිකර මෘග රාජ්‍ය අපරාධ සම්බන්ධ වාර්තා ගැන මේ හා සමාන උනන්දුවක් කවදාවත් මතුව ආවාද?” යි භාෂණ ප්‍රශ්න කරයි.
රූපවාහිනී සංවාද
දකුණේ සහ උතුරේ දස දහස් සංඛ්‍යාත අතුරුදහන්වීම් ගැන හෝ ඒවාට වගකිව යුතු දේශපාලකයන් හා හමුදා නිලධාරීන් ගැනත්, රාජ්‍ය වධකාගාර හා වධකයන් ගැන හෙළිකළ එම වාර්තා පිළිබඳව කිසිඳු රූපවාහිනී සංවාදයක් තමන් කිසි දිනක දැක නැති බවයි ඔහු පවසන්නේ.
පාලකයන් විසින් සපයන මාතෘකා යටතේ සංවාද කිරීම සාමාන්‍යයෙන් මෙරට ප්‍රජාතන්ත්‍රවාදයේ සීමාව බවට චෝදනා කරන රෝහිත භාෂණ එමඟින් සිදු වන්නේ කතා කළ හැකි සහ නොහැකි දේවල විෂය සීමාව ලකුණු කර “පාලිත සංවාද දිරිගැන්වීම.” පමණක් බවද සිලෝන් ජර්නල්ස් වෙත කියා සිටියේය.
ප්‍රජාතන්ත්‍රවාදී ආකල්පය නොවේ
දැවන්ත වංචා දූෂණ හෙළිකරන කොමිෂන් වාර්තා ගැන උනන්දුව මතු වෙන්නේ දේශපාලන පක්ෂපාතීත්වයන්ගේ පදනම් මත මිසක් දූෂණ හා වංචා පිළිබඳ පොදු සදාචාර හෝ මූලධාර්මික පදනමක් මත නොවන බවටයි ඔහු පවසන්නේ.
එය සමාජයේ දූෂණ විරෝධී සාමූහික ප්‍රජාතන්ත්‍රවාදී ආකල්පය පෙන්නුම් කරන්නක් නොවන බවට පෙන්වා දෙන ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ JDS සංවිධානයේ රෝහිත භාෂණ “පොදු විපක්ෂයේ ආධාරකරුවන්ට මේ වාර්තාවෙන් හෙළිවෙන්නේ වත්මන් ආණ්ඩුවේ දූෂිතකමයි. ආණ්ඩුවේ ආධාරකරුවන්ට මේ වාර්තාවෙන් හෙළිවන්නේ ආණ්ඩුවේ යහපාලන පිළිවෙත,” යැයි වැඩි දුරටත් සිලොන් ජර්නල්ස් හා කියා සිටියේය.
Facebook Comments
