නීතිඥවරියට කළ මරණ තර්ජන විභාග නොකර නාවික සෙබලුන්ට ඇප

0

තරුණයන් 11 දෙනෙකු අතුරුදන් කිරීමේ සිද්ධිය සම්බන්ධයෙන් චෝදනා ලබා සිටින සැකකාර නාවික සෙබලුන් හට ඇප ලබා දෙනු ලැබුවේ ඒ සම්බන්ධව විමර්ශනය කරන නිලධාරින්ට සාක්ෂිකරුවන්ට සහ තමන් හට ජිවිත තර්ජන තිබියදී බවට අතුරුදහන් වු තරුණයන් වෙනුවෙන් පෙනී සිටින නිතිඥවරිය පවසයි.

“මාස 06 විතර කලින් සැකකරායෝ බන්ධනාගාරේ ඉඳලා දුරකතනයෙන් කතා කරල මට තර්ජනය කරා ඒවා ගැන පැමිණිලි කරල තියෙන් ඒත් තවම පියවරක් අරගෙන නැහැ සිද්ධිය ගැන විමර්ශනය කරන නිලධාරින්ට සාක්ෂිකරුවන්ට සැකකාරයින්ගෙන් තර්ජන තියෙනවා” යි නීතිඥ අචලා සෙනවිරත්න සිලෝන් ජර්නල් හා කියා සිටියාය.

සිද්ධියට සැක පිට අත්අඩංගුවට ගෙන හය මාසයකට වැඩි කාලයක් රක්ෂිත බන්ධනාගාර ගත කර සිටි නාවික හමුදාවේ හිටපු බුද්ධි අංශ ප්‍රධානී කොමදෝරු ඩී.කේ.පී දසනායක ඇතුළු නාවික සෙබළුන් හය දෙනා හට 09 අඟහරුවාදා කොළඹ මහාධිකරණය විසින් ඇප ලබා දුනි.

කොළඹ මහාධිකරණ විනිසුරු මනිලාල් වෛද්‍යතිලක මෙම ඇප ලබාදීමේ නියෝගය නිකුත් කළ අතර එක් අයකුට රුපියල් ලක්ෂය බැගින් වූ මුදල් ඇප හා රුපියල් ලක්ෂ 10 බැගින් වන ශරීර ඇප දෙකක් මත පිරිස මුදා හැරීම සිදුකර ඇත.

සැකකරුවන් හට සෑම මසකට වරක්ම අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසටද නියෝග කළේය.

රජිව් නාගනාදන්, ප්‍රදීප් විශ්වනාදන්,මොහොමඩ් ඩිලාන්, මොහොමඩ් සජිත්, තිලකේෂ්වරම් රාමලිංගම්, තාග්‍යරාජා ප්‍රභාකරන්, සුසේයි පුල්ලේ අමලන් ලියෝන්, සුසෙයි පුල්ලේ රෝෂාන් ලියෝන්, කස්තුරි ආරච්චිලාගේ ජෝන් රිඩ්, කස්තුරි ආරච්චිලාගේ ඇන්ටනි සහ අලි අන්වර් 2008-2009 කාලවකවානුවේදී පැහැරගෙන ගොස් අතුරුදහන් කොට තිබුනි.

අපරාධ පරීක්ෂණ දෙපාර්තමේන්තුව විසින් අධිකරණය හමුවේ ගොනු කොට ඇති වාර්තාව උපුටා දක්වන ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) පවසන්නේ පැහැරගෙන යනු ලැබූ මේ තරුණයන් ත්‍රිකුණාමලය ගන්සයිඩ් භූගත සිර මැදිරියේ සිරකොට තිබු බවයි.

Facebook Comments