රාජපක්ෂ පාලන සමයේදී විශ්ව විද්‍යාල සිසුන්ට සහ විදුහල්පතිවරුන්ට ශ්‍රී ලංකා යුද හමුදාව විසින් ලබා දුන් නායකත්ව පුහුණු යහපාලන රජය යටතේ ආයුර්වේද වෛද්‍යවරුන්ට හා සමෘද්ධි නිලධාරින් වෙනුවෙන් යළි ක්‍රීයාත්මක කර තිබේ.
ඒ අනුව ආයුර්වේද දෙපාර්තමේන්තුවට අලුතෙන් බඳවා ගනු ලැබු ආයුර්වේද වෛද්‍යවරුන් 640 දෙනෙකු වෙනුවෙන් ‘නායකත්ව සංවර්ධනය පිළිබඳ’ සයදින නේවාසික පුහුණු වැඩසටහනක් යුද්ධ හමුදා පුහුණු පාසල් පහක දී ආරම්භ වු බව ශ්‍රී ලංකා යුද හමුදාව පවසයි.
‘න්‍යායාත්මක හා ප්‍රායෝගික පුහුණුව තුළින් නායකත්ව හැකියාව සහ ධනාත්මක ආකල්ප වර්ධනය’ යන තේමාව යටතේ දියතලාව, කලත්තෑව, මින්නේරිය, ඇඹිලිපිටිය සහ බූවැලිකඩ යන යුද්ධ හමුදා පුහුණු පාසල් වලදි මෙම පුහුණු වැඩසටහන 08 සඳුදා සිට ආරම්භ කරන ලදී.
සෞඛ්‍ය, පෝෂණ සහ දේශීය වෛද්‍ය අමාත්‍යංශය විසින් ආරක්ෂක අමාත්‍යංශය වෙතින් කරන ලද ඉල්ලීමකට ප්‍රතිචාර දක්වමින් යුද්ධ හමුදාධිපති ලුතිනන් ජෙනරාල් මහේෂ් සේනානායක මෙම නායකත්ව පුහුණු වැඩසටහන් සංවිධානය කරන ලෙස යුද්ධ හමුදා මුලස්ථාන පුහුණු අධ්‍යක්ෂ ජෙනරාල් වෙත උපදෙස් ලබාදී තිබේ.
මීට සති කිහිපයකට පෙර සමෘද්ධි නිලධාරින් වෙනුවෙන් ද මෙවැනිම පුහුණු ව්‍යාපෘතියක් යුද්ධ හමුදාව විසින් සාර්ථකව නිම කළ බව පවසන යුද හමුදා ජනාධිපති මෛත්‍රීපාල සිරිසේන ඔවුන්ට සුබ පැතූ බවද කියා සිටි.
රාජපක්ෂ පාලන සමයේදී විශ්ව විද්‍යාල සිසුන්ට සහ විදුහල්පතිවරුන්ට දුන් නායකත්ව පුහුණුව යහපාලන රජය බලයට පත් වු මුල් කාලයේම නවතා දමන ලදී.
Facebook Comments
