හදා වඩා ගැනීමට පිටරටට දරුවන් දුන් මව්වරුන්ට තම දරුවන් නැවත මුණ ගැස්වීම වෙනුවෙන් මෙරට ඉපිද පිටරට හැදී වැඩුනු තරුණියක් විසින් වැඩසටහනක් ආරම්භ කර තිබේ.
රාජගිරියේ මවකගේ කුසින් ඉපිද නෝර්වේ මව්පියන් සෙවනේ හැදී වැඩුන ප්‍රියංගිකා සමන්ති විසින් මෙම වැඩ සටහන ආරම්භ කර ඇත.
නෝර්වේ ඇතුලු යුරෝපා රටවල හදා ගැනීමට දුන් දරුවන්ගේ මව්වරුන් සොයා ගැනීමට එම දරුවන් වෙනුවෙන් මෙරටට පැමිණි ඇය අම්මාවරුන් සොයා ගැනීමට මහත් සේ වෙහෙසෙමින් සිටී.
තම දරුවන් පිටරටට හදා වඩා ගැනීමට දුන් මව්වරුන් සිටිනම් ඇය සම්බන්ධ කර ගන්නා ලෙස 05 බ්‍රහස්පතින්දා කොළඹ දී මාධ්‍ය හමුවක් පවත්වමින් ප්‍රියංගිකා ඉල්ලා සිටියාය.
“අවුරුදු 12 ක් තිස්සේ හොයාගෙන හොයාගෙන් ගිහින් 2013 දී මට මගේ අම්මා හමුවුනා,” යි ප්‍රියංගිකා සමන්ති හැඟුම්බරව කියා සිටියාය.
“ලෝකය පුරා ඉන්නා දරුකමට ගිය සිය ගණනක් තම්න්ගේ ජීව විද්‍යාත්මක අම්මා වරුන් මුණ ගැහෙන්න ආසාවෙන් ඉන්නවා. මම උත්සාහ කරන්නේ ඒ අයට උදව් කරන්නයි. මේක අතිශයින් පුද්ගලික කාරණයක් නිසා මම සංවිධාන එක්ක වැඩ කරන්න සුදානම් නෑ.”
තම දරුවන් පිටරටට දුන් මව්වරුන් පිළිබඳව යම් තොරතුරක් දන්නේ නම් 077 4289289 දුරකතන අංකයට විස්තර ලබා දෙන ලෙසයි ඇය වැඩි දුරටත් ඉල්ලා සිටින්නේ.
බේබි ෆාම්
ශ්‍රී ලංකාවේ ළදරුවන් දසදහස් ගණනක් හොර රහසේ විදේශ වලට අලෙවි කිරීමේ ජාවාරමක් පවත්වාගෙන යන ලද බව රජය විසින් පිළිගෙන තිබුණි.
1980 ගණන්වල ශ්‍රී ලංකාව තුල නීති විරෝධී “ළමා ගොවිපොළවල්” පැවති බව හිටපු අමාත්‍ය රාජිත සේනාරත්න සෙම්බ්ලා නෙදර්ලන්ත රූපවාහිනී වාර්තාමය වැඩසටහනකට හෙළි කර තිබු අතර එම කාල වකවානුවේ උපත ලැබූ බිලිඳුන් එකොලොස් දහසක් පමණ දරුකමට හදාවඩා ගැනීම සඳහා වංචනික ලෙස යුරෝපා රටවලට අලෙවි කිරීම සම්බන්ධයෙන් එම රූපවාහනි නාළිකාව කළ හෙලිදරව්වකින් පසුව විමර්ශනයක් ආරම්භ කිරීමට ශ්‍රී ලංකා රජය කටයුතු කරන බවද ඔහු ප්‍රකාශ කළේය.
ජේ.ආර් ජයවර්ධන පාලනය පැවති ඒ වකවානුව තුල “බේබි ෆාම්” පවත්වාගෙන ගිය බවට රජයේ ඉහල පෙලේ බලවතුන්ට චෝදනා එල්ල වී තිබුනි.
ඒ සම්බන්ධයෙන් මේතාක් කිසිදු පරීක්ෂණයක් සිදු කර නොමැත.
Facebook Comments
