බ්‍රිගේඩියර් ප්‍රියංක ප්‍රනාන්දු “ශ්‍රී ලංකාවට අපකීර්තියක්, අවමානයක්” (VIDEO)

0

බ්‍රිතාන්‍යයේ ශ්‍රී ලංකා මහ කොමසාරිස් කාර්යාලය ඉදිරිපිට 2018 පෙබරවාරි 4 දා දෙමළ උද්ඝෝෂකයන් පිරිසකට මරණ තර්ජනයක් කිරීම සම්බන්ධයෙන් වරදකරු බවට පත්වූ හිටපු ආරක්ෂක උපදේශකයා ශ්‍රී ලංකාවට අපකීර්තියක් අත් කර දුන් බව ලන්ඩනයේ ප්‍රධාන මහේස්ත්‍රාත්වරිය ප්‍රකාශ කළාය.

බෙල්ල කපන බව අතින් පෙන්නුම් කළ බ්‍රිගේඩියර් ආඬිගේ ප්‍රියංක ඉඳුනිල් ප්‍රනාන්දු මහජන ආරක්ෂක පනත යටතේ වරදක් කළ බවට තීන්දු කළ වෙස්ට්මින්ස්ටර් අධිකරණය විසින් රුපියල් දශලක්ෂයකට අධික මුදලක් ගෙවන ලෙස ඔහුට නියෝග කරන ලදී.

අධිකරණයේ පෙනී නොසිටි වරදකාර යුද සෙන්පතියා විසින් බ්‍රිතාන්‍ය පවුම් 2000 ක දඩ මුදලක්, පවුම් 1824 ක උසාවි ගාස්තු වලට අමතරව පැමිණිලිකරුවන්ට වන්දි මුදලක්ද ගෙවිය යුතු වේ.

“බ්‍රිගේඩියර් ප්‍රනාන්දු විසින් දරන ලද වගකීම් සහගත තනතුර මගේ අවධානයට ලක්වෙයි,” යනුවෙන් තීන්දුව ප්‍රකාශයට පත් කරමින් ප්‍රධාන මහේස්ත්‍රාත් එමා ආර්බත්නොට් කියා සිටියාය.

“ඔහුගේ මෙම හැසිරීම සිදුකරන අවස්ථාවේ ඔහු සේවය කරමින් සිටියේ ජ්‍යෙෂ්ඨ තානාපති නිලධාරියකු ලෙසිනි. ඔහුගේ ඉහල නිලය සැලකිල්ලට ගත් කල ඔහු ශ්‍රී ලංකාවටත් යුද හමුදාවටත් අපකීර්තියක් හා අවමානයක් අත් කර දී තිබේ.”

තානාපති නිලධාරීන්ට හිමිවන රාජ්‍ය තාන්ත්‍රික මුක්තිය බ්‍රිගේඩියර් ප්‍රියංක ප්‍රනාන්දු කළ කටයුත්තට වලංගු නොවන බව අධිකරණය පසුගිය මාර්තු මාසයේ තීන්දු කර තිබුණි.

නඩුව පවරා තිබුනේ පල්ලියගුරුගේ විනෝද් ප්‍රියන්ත පෙරේරා, ගෝකුලක්‍රිෂ්ණන් නාරායනසාමි සහ මයුරන් සදානන්දන් විසිනි.

Facebook Comments