නැවත යුද්ධයක් ඇතිවීම වළක්වා සියලු ජනතාවට සහෝදරත්වයෙන් ජීවත්විය හැකි රටක් ගොඩනැඟීමේ වගකීම අද තමා ප‍්‍රමුඛ වත්මන් රජය ඉටු කරමින් සිටින බව ජනාධිපති මෛත්‍රිපාල සිරිසේන පවසයි.
වසර දෙකකට පෙර තමා මේ රටේ ජනාධිපතිවරයා ලෙස තෝරාපත් කරගත්තේ රටේ සිංහල, දෙමළ, මුස්ලිම් සියලු ජනතාව එක්ව බව ජනාධිපතිවරයා කියා සිටියේ මුස්ලිම් ආගමික කටයුතු හා සංස්කෘතික දෙපාර්තමේන්තුවට අයත් නව මුස්ලිම් සංස්කෘතික මධ්‍යස්ථානය විවෘත කිරීමේ අවස්ථාවට ඊයේ (17) එක්වෙමිනි.
ජාතික නිදහස් අරගලයේදී මේ රටේ සිංහල, මුස්ලිම්, ද්‍රවිඩ සියලු නායකයින් සහෝදරත්වයෙන් කටයුතු කරමින් තම යුග මෙහෙවර ඉටු කළා සේම අද දවසේ රට සංවර්ධනය කරා ගෙන යමින් රට ගොඩනැගීමේ යුග මෙහෙවර ඉටුකිරීම සඳහා ද සියලු දෙනා සහෝදරත්වයෙන් එක්විය යුතු බවටයි ජනාධිපති සිරිසේන පෙන්වා දෙන්නේ.
ආණ්ඩුවට විරුද්ධ බලවේග විසින් වැරදි අර්ථකථන ලබාදෙමින් ජාතීන් අතර අසමගිය වැපිරවීමට කටයුතු කරන බව පැවසූ ජනාධිපතිතුමා මෙම අන්තවාදී බලවේගයන්ට ඉඩ නොතබා රටේ ජාතික සමගිය ආරක්ෂා කර ගැනීමට සියලු ආගමික නායකයින් අවබෝධයෙන් කටයුතු කළ යුතු බව ද අවධාරණය කළේය.
Facebook Comments
