ලෝකයට ගැලපෙන ලෙස අධ්‍යාපනය නවීකරණය කරනවා – අගමැති

වත්මන් සමාජයට ගැලපෙන ආකාරයට සකස් කර තිබෙන ලෝකයේ දියුණු රටවල අධ්‍යාපන ක්‍රම අනුව යමින් මෙරට අධ්‍යාපනයේ විප්ලවකාරී පියවරකින් නවීකරණය කරන බව අග්‍රාමාත්‍යවරයා පවසා තිබේ.

ජපානය, කොරියාව, චීනය වැනි රටවල මෙන් ශ්‍රී ලංකාවේ ද 13 වසරක පාසල් අධ්‍යාපනය අනිවාර්ය කරමින් නූතන ආර්ථිකයට ගැලපෙන ආකාරයට රැකියා සහ ආදායම් මාර්ග ඇති කරන බව අගමැති රනිල් වික්‍රමසිංහ 21 බ්‍රහස්පතින්දා අරලියගහ මන්දිරයේ පැවැති දහතුන් වසරක සහතික කළ අධ්‍යාපන වැඩසටහන සිසුගත කිරීමේ උත්සවයේදී පැවසීය.

“ශ්‍රී ලංකාව පමණක් නොව, ඕනෑම රටක් දියුණු වීමට නම් එරට මිනිස් සම්පත දියුණු විය යුතුයි. ඉහළ අධ්‍යාපනයක් පවතින රටවල් දියුණු වනවා. මධ්‍යම යුරෝපයේ මුහුදු සීමාවල් අසල පිහිටා නොමැති රටවල් වන චෙක් සහ හංගේරියාව වැනි රටවල් චීනයේ පවතින ආකාරයේ දුම්රිය සේවා වැනි පහසුකම් ඇති කර තිබෙනවා. අද ලෝකයේ වැදගත්ම සාධකය වන්නේ දැනුමයි. අමෙරිකාව ලෝකයේ ප්‍රධානතම රට බවට පත්ව තිබෙන්නේ දැනුම නිසයි.”

“අප නිදහස් අධ්‍යාපනය ගැන කතා කරනවා. සාමාන්‍ය පෙළ පන්තිය දක්වා නිදහස් අධ්‍යාපනය කෙසේ හෝ රැගෙන යනවා. සාමාන්‍ය පෙළ විභාගයෙන් පසුව උසස් අධ්‍යාපනය සඳහා ඉතිරි වන්නේ එම වයස් සීමාවේ 50-55% ක පමණ කොටසක් පමණයි. ඇතැමුන් 8 ශ්‍රේණිය අසමත් වීම නිසා අධ්‍යාපනයෙන් ඉවත් වන අතර තවත් පිරිසක් සාමාන්‍ය පෙළින් පසු අධ්‍යාපනයෙන් ඉවත් වනවා. එතැන් සිට ඉදිරියට යන 50% න් විශ්ව විද්‍යාල වරම් ලබා ගන්නේ 5% ක කොටසක් පමණ වන අතර තවත් 10-15% ප්‍රමාණයක් වෙනත් උසස් අධ්‍යාපන ආයතන සඳහා ඇතුලූ වනවා.”

එමගින් සිදුවන්නේ මානව සම්පත් අපතේ යාම බව පෙන්වා දෙන අගමැතිවරයා වත්මන් සමාජයට ගැලපෙන ආකාරයට ශිෂ්‍ය ශිෂ්‍යාවන් පුරුදු පුහුණු කරමින් විශ්ව විද්‍යාල දැනුම පමණක් නොව, සමාජීය දැනුමත් ලබාදිය යුතු බව අවධාරණය කළේය.

රටේ සමාජය දියුණු කිරීමට නම් මහාචාර්යවරු මෙන්ම ජයග්‍රහණ ලැබිය හැකි ක්‍රීඩකයන් ද අවශ්‍ය බව පේනවා දුන් අගමැති රනිල් වික්‍රමසිංහ විශ්ව විද්‍යාල පිරිහීම විශාල ප්‍රශ්නයක් වනවා සේම ක්‍රිකට් තරග දිනා ගැනීමට නොහැකි වීමත් රට තුළ ඒ හා සමානව විශාල ප්‍රශ්නයක් බවට පත් ඇති බව කියා සි‍ටියේය.