අගනගරයේ ජනප්‍රිය පිරිමි පාසලක විදුහල්පතිවරයා අවිධිමත්ව ඉවත් කර ජනාධිපති කොමිසමක් හරහා විශ්‍රාමික විදුහල්පතිවරයකු පත්කිරීමේ කුමන්ත්‍රණයක් ක්‍රියාත්මක වන බවට දිවයිනේ ප්‍රමුඛතම ගුරු සංගමයක් චෝදනා කරයි.
කොළඹ රාජකීය විදුහලේ විදුහල්පති බී.ඒ. අබේරත්න එම පාසලෙන් ස්ව කැමැත්තෙන් ඉවත් වන බවට අධ්‍යාපන ලේකම්වරයා විසින් ලිපියක් ලබාගෙන ඇති අතර පසුව බී.ඒ. අබේරත්න විසින් ලබාදුන් එම ඉවත්වන බවට වූ ලිපිය ඔහු විසින් ම නැවත ඉල්ලා අස්කරගෙන තිබෙන බවයි ලංකා ගුරු සංගමය පවසන්නේ.
එසේ තිබියදී විදුහල්පති බී.ඒ. අබේරත්නට මේ වන විට අධ්‍යාපන රාජ්‍ය අමාත්‍යාංශයට ස්ථාන මාරු ලිපියක් නිකුත් කර තිබෙන බව පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කරන්නේ මෙය බරපතල දේශපාලන මැදිහත්වීමක් තුළ සිදු කරන ලද අනීතික ක්‍රියාවක් බවයි.
පෙබරවාරි 16 අගහරුවාදා නිකුත් කළ නිවේදනයක් මගින් ලංකා ගුරු සංගමය චෝදනා කරන්නේ විදුහල්පති බී.ඒ. අබේරත්න ඉවත් කිරීම සම්බන්ධයෙන් ප්‍රසිද්ධියේ ම මැදිහත්වූයේ ශ්‍රී ලංකා පොදුජන පෙරමුණේ ලේකම් ලෙස කටයුතු කරන නීතීඥ සාගර කාරියවසම් බවයි.
එම අවස්ථාවේදී පූජ්‍ය මුරුත්තෙට්ටුවේ ආනන්ද හිමි ප්‍රසිද්ධියේ මාධ්‍ය සාකච්ඡාවක පෙනී සිටිමින් සාගර කාරියවසම්ගේ එම මැදිහත්වීම විවේචනය කරමින් විදුහල්පති අබේරත්න රදවා ගැනීම වෙනුවෙන් ප්‍රබල ලෙස පෙනී සිටි බව ජ්‍යෙෂ්ඨ ගුරු සංගම් නායකයා අවධාරණය කරයි.
ළමුන් අට දහසකට වැඩි ප්‍රමාණයක් ඉගනුම ලබන ලංකාවේ ජනප්‍රියතම පාසලක විදුහල්පතිවරයකුගේ ඉවත් කිරීමක් හා රඳවා ගැනීමක් සඳහා මෙලෙස දේශපාලන මැදිහත්වීම් සිදුවීම අධ්‍යාපනයේ බරපතල පරිහානියක් බව ලංකා ගුරු සංගමය පෙන්වා දෙයි.
“ප්‍රධාන පාසල්වල මේ ආකාරයෙන් කටයුතු වන්නේ නම් පළාත් සභා පාසල්වල තත්වය මෙයින් පැහැදිලි වනු ඇත. විදුහල්පතිවරයාට චෝදනා ඇත්නම් සිදුවිය යුත්තේ විධිමත් පරීක්ෂණයක් කොට ඒ සම්බන්ධයෙන් නීත්‍යානුකූල පියවර ගැනීමයි. එසේ නොකොට අධ්‍යාපන ලේකම්වරයා විසින් මේ ආකාරයේ බලපෑම් කරමින් විදුහල්පතිවරයාගේ කැමැත්ත ලබාගෙන විදුහල්පතිවරු මාරු කිරීමට උත්සාහ කිරීම නිර්ලජ්ජිතව දේශපාලන උවමනාවක් ඉටු කිරීමකි.”
ලංකා ගුරු සංගමය රාජ්‍ය සේවා කොමිසමෙන් ඉල්ලා සිටින්නේ ශ්‍රී ලංකා අධ්‍යාපන පරිපාලන සේවයේ පළමු පන්තියේ නිලධාරීන් ස්ථාන මාරු කිරීමේදී මෙවැනි මැදිහත්වීම් සිදුවීම පිළිබඳව විශේෂ අවධානයක් යොමු කොට වහාම එම ක්‍රියාව නතර කිරීමට මැදිහත් වන ලෙසයි.
ඉහත පසුබිම තුළ මේ වන විට සමාජයේ බරපතල කතිකාවකට ලක්ව ඇති හිටපු විනිසුරු උපාලි අබේරත්නගේ ප්‍රධානත්වයෙන් ජනාධිපතිවරයා විසින් පත් කරන ලද දේශපාලන පලිගැනීම් කමිටුවෙන් රාජකීය විද්‍යාලයේ විදුහල්පති තනතුර සම්බන්ධයෙන් පිළිකුල් සහගත නිර්දේශයක් ලබා දී තිබෙන බවටත් ලංකා ගුරු සංගමය චෝදනා කරයි.
“මේ වන විට ප්‍රසිද්ධ කොට නැති එම පලිගැනීම් කමිටු වාර්තාවේ අඩංගු පක්ෂග්‍රාහී නිර්දේශ මාධ්‍යවල එළි දැක්වෙමින් තිබේ. එවැනි නිර්දේශයක් වන්නේ රාජකීය විදුහලේ හිටපු විදුහල්පති උපාලි ගුණසේකර මහතා වයස අවුරුදු 55 න් විශ්‍රාම ගොස් ඇත්තේ දේශපාලන පලිගැනීමක් සිදු වූ නිසා බැවින් ඔහු නැවත සේවයේ පිහිටුවා වසර 3 කට රාජකීය විදුහලේ විදුහල්පති තනතුර ලබාදිය යුතු බවයි. විශ්‍රාම ගිය පුද්ගලයෙකුට මේ ආකාරයෙන් විදුහල්පති තනතුරක් ලබාදීමට නිර්දේශ කිරීම බරපතල විහිළුවකි.”
ජ්‍යෙෂ්ඨ වෘත්තිය සමිති නායක ජෝසප් ස්ටාලින් සිය නිවේදනය මගින් වැඩි දුරටත් පෙන්වා දී ඇත්තේ හිටපු විදුහල්පති විශ්‍රාමික උපාලි ගුණසේකරට එරෙහිව විනය පරීක්ෂණයක් සිදුවෙමින් තිබියදී ඔහු විශ්‍රාම වැටුප් ව්‍යවස්ථා සංග්‍රහයේ 12 වගන්තියට අනුව විශ්‍රාම යාමෙන් පසු පෞද්ගලික පාසලක විදුහල්පතිවරයකු ලෙස කටයුතු කරමින් සිටින බවයි.
පසුගිය මැතිවරණවලදී ඔහු විවිධ සංවිධාන ගොඩනංවමින් දේශපාලන කටයුතුවල ද නිරත වෙමින් සිටි බවට චෝදනා කරන ලංකා ගුරු සංගමය අවධාරණය කරන්නේ එවැනි පසුබිමක ඔහු නැවත රාජකීය විද්‍යාලයේ විදුහල්පති තනතුරට නිර්දේශ කිරීමත්, වර්තමාන විදුහල්පතිවරයා අවිධිමත්ව ඉවත් කිරීමට කුමන්ත්‍රණ සිදුවීමත් අතර අන්තර් සම්බන්ධයක් පවතින බවට සැකයක් පවතින බවයි.
ඉහත තත්වය අනුව රාජකීය විද්‍යාලයේ විදුහල්පති තනතුර දේශපාලනීකරණය වීම තුළ රටේ අධ්‍යාපනය බරපතල ලෙස හෑල්ලුවට ලක්වීම නොවැළැක්විය හැකි බව ජෝසප් ස්ටාලින් ගුරු සංගම් නායකයා වැඩි දුරටත් පෙන්වා දී තිබේ.
Facebook Comments
