ඉඩම් අත්පත් කර ගැනීමට මුලතිව් වට්ටුවාහල් හමුදා රැකවල් දැඩි කෙරේ

මුලතිව් වට්ටුවාකල් ගෝඨාභය නාවික හමුදා කඳවුර සඳහා බලහත්කාරයෙන් ඉඩම් අත්පත් කර ගැනීමට හමුදා රැකවල් දැඩි කොට තිබේ.

පළාත් බද වාර්තා කරුවන් පවසන්නේ හමුදා සන්නද්ධ රථ යොදා ගනිමින් නාවික හමුදා කඳවුර අසල හමුදා හා පොලිස් භටයෝ රැකවල් ලා සිටින අතර වට්ටුවාහල් ප්‍රදේශයේ විශේෂ මාර්ග බාධක යොදා ගනිමින් මාර්ග මුර සංචාර දැඩි කර ඇති බවය.

බලහත්කාරයෙන් අත්පත් කරගත් ඉඩම් වලට නීතියානුකුල බවක් ලබා දීමේ මුලතිව් දිසාපති වරයාගේ ඉඩම් මැනීමේ ක්‍රියාවට එරෙහිව අද [29] දිනයේ ව්ට්ටුවාකල් ගෝඨාභය කඳවුර අසළ උද්ඝෝෂණයක් පැවැත්වීමට කටයුතු යොදා ඇති බව හිටපු පාර්ලිමේන්තු මන්ත්‍රී කේ. සිවාජිලිංගම් පවසයි.

‘’බලහත්කාරයෙන් අත්පත් කරගත් අක්කර 200 ක කොටසක හිමිකරුවන්ට විතරක් හෙට කැඳවා තියෙනවා. තමන්ගේ ඉඩම් වල මායිම් පෙන්වන්න මැනුම් දෙපාර්තමේන්තුවෙන් එනවා කියලා. මේ හදන්නේ ඉඩම් අයිතිකරුවන්ට වන්දියක් දීලා බලහත්කාරයෙන් ගත්තු ඉඩම් නිතියානුකුල කරන්න’’ ඊට එරෙහිව හෙට දිනයේ පැවත්වෙන විරෝධතාවය වෙනුවෙන් මානව හිමිකම් ගරු කරන සියලු දෙනාගේ සහාය ලබා දිය යුතු බව ද හිටපු පාර්ලිමේන්තු මන්ත්‍රී වරයා කියා සිටී.

කේ,සිවාජිලිංගම් පවසන්නේ වට්ටුවාහල් ගෝඨාභය නාවික කඳවුර ඉඳී කිරීමට අති විශේෂ ගැසට් නිවේදනයක් මගින් ඉඩම් පවරා ගත් අතර 2018 ෆෙබරවාරි 22 වැනිදා ඊට එරෙහිව උද්ඝෝෂණය කළ උතුරු පළාත් සභාවේ මන්ත්‍රීවරයෙක් ව සිටි තුරෙරාසා රවිහරන්, පීටර් ඉලන්ජිලියන්, මුලතිව් ධිවර සංගමයේ සභාපති සහ තමන් අත් අඩංගුවට ගෙන නඩු පවරා ඉඩම් බලහත්කාරයෙන් අත්පත් කරගත් බවය.

ඊට අදාළ නඩු විභාගය ලබන ඔක්තෝම්බර් මස 12 වැනිදා මුලතිව් අධිකරණය මගින් කැඳවා තිබේ.

මුලින් අක්කර 617 ක් ගෝඨාභය නාවික හමුදා කඳවුර වෙත පවරා ගෙන තිබුන ද අද වන විට එම කඳවුර විසින් අත්පත් කරගෙන ඇති මුළු ඉඩම් ප්‍රමාණය අක්කර 670 යි රූට් 3 යි පර්චර්ස් 10 ක් බව උතුරු පළාත් සභාවේ හිටපු මන්ත්‍රී තුරේරාසා රවිහරන් මාධ්‍ය වෙත ප්‍රකාශ කර තිබිණි.

“මුලතිව් දිස්ත්‍රික්කයේ මුළු භුමි ප්‍රමාණය අක්කර 627,917 ක්. යුද්ධයට කලින් අක්කර 21,017 ක ඉඩම් ප්‍රමාණයක් මුලතිව් ජනයා සතුව තිබුණා. දැන් ඒ ප්‍රමාණය අක්කර 16,025 ක් දක්වා අඩුවෙලා තියෙනවා. කැළෑ ප්‍රදේශ ලෙස වෙන්කරලා තියෙන අක්කර 420,300 ක් හැරුණම ඉතිරි සියල්ලම මේ වෙනකොට ආණ්ඩුව විසින් අත්පත් කරගත් ඉඩම්’ යැයි පෙන්වා දෙන ඔහු පවසන්නේ

“හමුදාව විතරක් නොවෙයි, රජයට අයත් පුරාවිද්‍යා, වන ජීවි, වන සංරක්ෂණ හා මහවැලිය ඇතුළු ආයතන රැසක් බලහත්කාරී ගැසට් නිවේදන මගින් ඉඩම් අත්පත් කරගැනීම් සිදුකරනවා.’’ බවය.