එක්සත් ජාතික පෙරමුණේ ජනාධිපති අපේක්ෂකත්වය රනිල් වික්‍රමසිංහ හට ලබා දිය යුතු බවට පක්ෂ ජ්‍යෙෂ්ඨයින් බහුතරයක් යෝජනා කර ඇතැයි යනුවෙන් පැතිර යන පුවත ගෝඨාභය රාජපක්ෂට හිතැති පිරිස් පැල කරන ලද පුවතක් බවට මුදල් අමාත්‍යවරයා චෝදනා කර තිබේ.
ජනාධිපති අපේක්ෂකත්වය රනිල් වික්‍රමසිංහටත්, අගමැති ධුර අපේක්ෂකත්වය සජිත් ප්‍රේමදාසටත් ලබාදිය යුතු බවට 06 සිකුරාදා රැස්වූ එම පක්ෂයේ ජ්‍යෙෂ්ඨයින් බහුතරයක් යෝජනා කර ඇති බවට මාධ්‍ය විසින් වාර්තා කර තිබුනි.
ගෝඨාභය රාජපක්ෂ ප්‍රෝඩාකාරයෙක් බව කී මංගල සමරවීර අමාත්‍යවරයා ඔහු ‘ප්‍රෝඩාභය’ ලෙස මාධ්‍ය ඉදිරියේ හඳුන්වන ලද්දේ 07 සෙනසුරාදා අගමැති රනිල් වික්‍රමසිංහගේ ප්‍රධානත්වයෙන් ආරම්භ කෙරෙන ‘එන්ටර්ප්‍රයිස් ශ්‍රී ලංකා’ යාපනය ප්‍රදර්ශනයේ මුලික වැඩකටයුතු නිරීක්ෂණයට පැමිණි අවස්ථාවේදීය.
“මම පැහැදිළිවම කියන්න ඕනේ, ‘ජනාධිපති අපේක්ෂකත්වය රනිල් වික්‍රමසිංහට’ වැනි ප්‍රකාශ අද පුවත්පත්වලත්, ඒ වගේම සමාජ මාධ්‍යවලත් ‘ප්ලාන්ට්’ කරලා තියෙන්නේ ප්‍රෝඩාභය රාජපක්ෂගේ ගොට්ටන්. මේවා ෆේක් නිව්ස්. මොකද ඇත්ත වශයෙන්ම ප්‍රෝඩාභය රාජපක්ෂ නොහොත් ගෝඨාභය කියන්නේ ප්‍රෝඩාවෙන්ම දේශපාලනය කරන කෙනෙක්. විශේෂයෙන්ම එක්සත් ජාතික පක්ෂයේ නැති ප්‍රශ්න නිර්මාණය කරලා පෙන්නන්න ගොට්ටන් කරපු තවත් අසාර්ථක උත්සායක්.”
පක්ෂයේ බහුතර මන්ත්‍රීවරුන් සජිත් ප්‍රේමදාස අමාත්‍යවරයා ජනාධිපතිවරණ තරඟකරු ලෙස යෝජනා කරන අවස්ථාවක මෙවැනි අභූත ප්‍රකාශයක් කිරීම තුළින් පෙනී යන්නේ ගෝඨාභය රාජපක්ෂගේ මැතිවරණ ප්‍රචාරණයේ කඩා වැටීම බව ද අමාත්‍ය මංගල සමරවීර වැඩි දුරටත් කියා සිටියේය.
Facebook Comments
