කොරෝනා ආසාදනයෙන් රට මුදා ගැනීමට පුද්ගලික රෝහල් රජයට පවරා ගන්නා ලෙස රටේ ප්‍රමුඛතම විශ්ව විද්‍යාල ශිෂ්‍ය සංගමය රජයෙන් ඉල්ලා තිබේ.
අගමැති මහින්ද රාජපක්ෂ හට ලිපියක් යොමු කරන අන්තර් විශ්ව විද්‍යාල ශිෂ්‍ය බල මණ්ඩලය යෝජනා කර ඇත්තේ එම රෝහල් රජයට පවරා ගෙන කොරෝනා රෝග පරීක්ෂණ සිදු කිරීමට, රෝගීන්ට ප්‍රතිකාර කිරීමට සහ නිරෝධායන කටයුතු සඳහා යොදා ගන්නා ලෙසයි.
කොරෝනා රෝගය වැලදී ඇති ගැබිණි මව්වරුන් හට ප්‍රතිකාර කටයුතු කිරීමට යොදා ගෙන ඇති නෙවිල් ප්‍රනාන්දු රෝහල සම්පුර්ණ වශයෙන්ම රජයට ගෙන කොවිඩි 19 රෝගීන් හට ප්‍රතිකාර කිරීමට යොදා ගන්නා ලෙස ද අන්තරේ කැඳවුම්කාර රත්කරව්වේ ජිනානන්ද හිමිගේ අත්සනින් යොමු කර ඇති ලිපියේ සඳහන් වන්නේ.
සෞඛ්‍ය සේවය සඳහා වෙන් කරන ප්‍රතිපාදන ප්‍රමාණවත් පරිදි වැඩි කළ යුතු අතර රජයේ රෝහල් තුළ ඖෂධ, රසායනාගාර, වාට්ටු, හදිසි ප්‍රතිකාර ඒකක වැනි අත්‍යවශ්‍ය පහසුකම් වැඩි දියුණු කිරීම කළ යුතු බවත් අන්තර් විශ්ව විද්‍යාලීය ශිෂ්‍ය බල මණ්ඩලයේ තවත් යෝජනා දෙකකි.
ඒ සඳහා රාජ්‍ය භාණ්ඩාගාරයේ මුදල් නොමැති නම් පෞද්ගලික අංශ්‍ය සතුව පවතින ලාභයෙන් කොටසක් හදිසි අවශ්‍යතාවක් සේ සලකා රජය යටතට ගැනීම සිදු කළ යුතු බවද අන්තර් විශ්ව විද්‍යාලීය ශිෂ්‍ය බල මණ්ඩලය සිය ලිපියෙන් අවධාරණය කර ඇත.
මේ අතර පෞද්ගලික අංශය සතු රසායනාගාර යොදා ගනිමින් කොරෝනා රෝගීන් හඳුනා ගැනීමේ පරීක්ෂණ සිදු කරන්නැයි පසුගියදා පැවති පක්ෂ නායක හමුවේදී එක්සත් ජාතික පක්ෂ නායක රනිල් වික්‍රමසිංහ ඉල්ලා තිබේ.
ආහාර බෙදීම සඳහා දිස්ත්‍රික්ක මට්ටමින් නියෝජිත හමුවක් බැසිල් රාජපක්ෂගේ ප්‍රධානත්වයෙන් පවත්වන ලෙසට ද රනිල් වික්‍රමසිංහ එහිදී වැඩි දුරටත් යෝජනා කර ඇත.
Facebook Comments
