විල්පත්තුව අවට කෙරෙන තවත් වැනසීමක් ගැන හෙළිදරව්වක්

දේශපාලනඥයන්ගේ සහාය ඇතිව විල්පත්තු ජාතික වනෝද්‍යානයේ ප්‍රේරණ කලාපය තවදුරටත් විනාශ කරමින් පවතින බවට පරිසර සංවිධානයක් චෝදනා කරයි.

පරිසර හා සොබාදහම් අධ්‍යයන මධ්‍යස්ථානය පවසන්නේ කෝමාරිකා වගාව වෙනුවෙන් විල්පත්තු ජාතික වනෝද්‍යානයේ ප්‍රේරණ කලාපය තවදුරටත් විනාශ කෙරෙමින් පවතින බවයි.

නිවේදනයක් නිකුත් කරමින් සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙන්නේ පසුගිය වසරේද සිය සංවිධානය පෙන්වා දුන් පරිදි විල්පත්තුව ජාතික වනොද්‍යානයේ ප්‍රේරණ කලාපය, රාජාංගනය යාය 18 ගම්මානය අවසානයේ ඇති කෑලෑ මෙලෙස එළි කරන්නේ අවුරා ලංකා පුද්ගලික සමාගම විසින් බවයි.

දැනට ප්‍රේරණ කලාපයේ එළි කර ඇති ප්‍රදේශය අක්කර 1300 ආසන්නය බව ඔහු තව දුරටත් පෙන්වා දෙයි.

“කෝමාරිකා වගාවක්, පර්යේෂණා ගාරයක්, විශාල ක්‍රීඩ පිටියක්, පැලතවානක් හා කර්මාන්ත ශාලාවක් වෙනුවෙන් මෙලෙස විල්පත්තුව ජාතික වනෝද්‍යානයේ ප්‍රේරණ කලාපය එළි පෙහෙලි කර ඇත.”

පරිසරවේදියා තව දුරටත් පෙන්වා දෙන්නේ නීති විරෝධි ලෙස පසුගිය වසර වන විට ජාතික වනෝද්‍යානයේ ප්‍රේරණ කලාපය විනාශ කර වැවක්ද නිර්මාණය කර තිබු බවයි.

එයට අමතරව අද වන විට තව දුරටත් ජාතික වනෝද්‍යානයේ ප්‍රේරණ කලාපය වන සංහාරයට ලක්කරමින් කෝමාරිකා වගාව වෙනුවෙන් එළිපෙහෙලි කරමින් ඇති අයුරු පෙබරවාරි 19 දින පරිසර හා සොබාදහම් අධ්‍යයන මධ්‍යස්ථානයේ නිරික්ෂණ කණ්ඩායමක් විසින් නිරික්ෂණයට ලක්ව ඇති බව ඔහු පෙන්වා දෙයි.

සොබාදහම් අධ්‍යයන මධ්‍යස්ථානය පෙන්වා දෙන්නේ ජාතික වනෝද්‍යානයක ප්‍රේරණ කලාපයක් වැනසීම වනසත්ව හා වෘක්ෂලතා ආඥාපනතට අනව දඩුවම් ලැබිය හැකි වරදක් වුවත් දේශපාලකයන්ගේ සහය ඇතිව අදටත් විල්පත්තු ජාතික වනෝද්‍යානය වනසමින් පවතින බවයි.

පරිසරවේදී රවීන්ද්‍ර කාරියවසම් පවසන පරිදි මෙම ව්‍යාපෘතිය දියත් කෙරෙන විල්පත්තුව වනාන්තරය හා ඒ අවට ප්‍රදේශය ජෛව විවිධත්වය අතින් ඉතාමත් පොහොසත් ප්‍රදේශයකි.

දැනට සිදුකර ඇති විද්‍යාත්මක පර්යේෂණ මගින් ක්ෂරපායි විශේෂ 41″ මත්ස්‍ය විශේෂ 29″ මැඩියන් හා ගෙමිබන් විශේෂ 17″ කුරල්ලන් විශේෂ 149″ වාර්ථා වී ඇති බව ඔහු පෙන්වා දෙයි.

කෝමාරිකා වගා ව්‍යාපෘතිය සිදු කරන ප්‍රදේශය අලි ඇතුන්ගේ මෙන්ම අනිකුත් සතුන්ගේ වාසභුමයක් බව පරිසර හා සොබාදහම් අධ්‍යයන මධ්‍යස්ථානය සදහන් කරයි.

“අලි ඇතුන් ජීවත්වන මෙම ප්‍රදේශයේ . රාජාංගනය යායා 18 ගම්මාන වලට ඉහත්තැවෙන් ඇති අලිමංකඩ වනසා මෙලෙස වගා බිම සදහා යොදා ගැනීම ඇලි ඇතුන්ගේ පැවැත්මට බරපතල ලෙස බාධා කිරීමක් මෙන්ම මේ අවට ගම්මාන වල මිනිසුන්ගේ ජීවිත අනතුරේ හෙළිමකි.”

පරිසරවේදී රවීන්ද්‍ර කාරියවසම් තව දුරටත් චෝදනා කරන්නේ වන ජීවි සංරක්ෂණ දෙපාර්තමේන්තුවේ ඇසට වැලි ගසා විල්පත්තු ජාතික වනෝද්‍යානයේ ජලපෝෂණ ප්‍රදේශ වලින් හා වැසි ජලයෙන් පෝෂණය වන පනන්කානි ඇල හරස් කොට බැම්මක් බැද එහි ජලය මෙම කොමාරිකා වගා ව්‍යාපෘතියේ ඉදි කළ වැව වෙත ජලය ගැනීමට මේ වන විට උත්සහ ගනිමින් පවතින බවයි.

විල්පත්තු ජාතික වනෝද්‍යානයේ ප්‍රේරණ කලාපය විනාශ කරමින් වසර ගණනාවක් තිස්සේ අවුරා ලංකා සමාගම විසින් සිදුකරන මෙම ක්‍රීයාවලිය මෙරට පරිසර නීතිය බරපතල ලෙස උල්ලංඝණය කිරීමක් ලෙසින් පරිසර හා සොබාදහම් අධ්‍යයන මධ්‍යස්ථානය පෙන්වා දෙයි.

පරිසර නීතියට හා රටේ පොදු නීතියට වැලි ගසා විල්පත්තු ජාතික වනෝද්‍යානය වනසන මෙම පිරිස එයින්ද නොනැවති ඉතාමත් අසාධාරණ ලෙස ජනතාවගේ ඉඩම් කොල්ලා කෑම සිදුකළද බලධාරීන් නිහඩ බවයි රවීන්ද්‍ර කාරියවසම් පරිසරවේදියා වැඩි දුරටත් පෙන්වා දෙන්නේ.