යුද සමයේත්, ඉන් පසුවත් බලහත්කාරයෙන් අතුරුදහන් කරන ලද සිය සමීපතමයන් සොයා ගැනීම සදහා ගෙන යන ශ්‍රී ලංකාවේ දීර්ඝතම අඛණ්ඩ අරගලයට නායකත්වය දෙන නැගෙනහිර පළාතේ දෙමළ මාතාවක් පොලිසියට කැඳවා එල්.ටී.ටී.ඊ සංවිධානය නැවත ගොඩ නැගීමේ චෝදනාවක් යටතේ ප්‍රශ්න කර තිබේ.
ත්‍රස්ත මර්දන හා විමර්ශන කොට්ඨාශයේ අම්පාර ඒකකය විසින් සිදු කරනු ලබන විමර්ශනයකට අදාලව ප්‍රකාශයක් ලබා ගැනීම සදහා බව දැනුම් දෙමින්, අම්පාර දිස්ත්‍රික්කයේ බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ සභාපතිනි තම්බිරාසා සෙල්වරානි, ඔක්තෝබර් 8 වැනිදා කැඳවා ඇත්තේ තිරුක්කෝවිල් පොලිස් ස්ථානයේ ළමා හා කාන්තා අංශයටය.
ඇයගෙන් පැය දෙකකට ආසන්න කාලයක් ප්‍රශ්න කළ පොලිස් නිලධාරියා දැනුම් දී ඇත්තේ නාවික හමුදාව සහ යුද හමුදාව ත්‍රස්ත මර්දන හා විමර්ශන කොට්ඨාශයේ මුලස්ථානයෙන් කළ ඉල්ලිමකට අනුව මෙම විමර්ශනය සිදු කරන බවයි.
තමාගේ පුද්ගලික විස්තර වාර්තාවක් නිල ඇදුමින් සිටි එම පොලිස් නිලධාරියා අත තිබු බවත්, ඇසිය යුතු ප්‍රශ්න එම නිලධාරියා වෙත ත්‍රස්ත මර්දන හා විමර්ශන කොට්ඨාශය විසින් සපයා තිබු බවත් තම්බිරාසා සෙල්වරානි මාධ්‍යවේදීන් සමග පවසා ඇත.
උතුරු සහ නැගෙනහිර බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ ලේකම් ද වන තම්බිරාසා සෙල්වරානි පවසන්නේ තමන් වසර කීයක් විමුක්ති කොටි සංවිධානයේ සිටියාදැයි ප්‍රශ්න කළ පොලිස් නිලධාරියා ඒ කාලය තුළ යුද හමුදාවේ කී දෙනෙක් ඝාතනය කර තිබේදැයි ප්‍රශ්න කළ බවයි.
පහලොස් වසරකට ඉහතදී අවසන් කළ බවට ශ්‍රී ලංකා රජය නිවේදනය කළ විමුක්ති කොටි සංවිධානය ඉන්දියාවේ සහ ප්‍රංශයේ නැවත ගොඩ නැගීමට උත්සාහයක් පවතින බවට ආරංචියක් පවතින බවට සඳහන් කරමින් පොලිස් නිලධාරියා ඇයගෙන් ප්‍රශ්න කර ඇත්තේ ඇය ශ්‍රී ලංකාවේ සිට එයට නායකත්වය සපයනවාද යන්නයි.
“මට දැන් වයස අවුරුදු 53 යි. ලබන දෙසැම්බර් මාසේට අවුරුදු 54 යි. මට ඇවිදින්නවත් මගේ වැඩ ටික කරගන්නවත් ශක්තියක් නැහැ. එහෙම තියෙද්දී මම කොහොමද ?” යැයි ප්‍රතිචාර දුන් ඇය තව දුරටත් විමසා ඇත්තේ “ඔයාලානේ නැති කරලා දැම්මා, විනාශ කරලා දැම්මා කියලා කියන්නේ? ” යනුවෙනි.
“එහෙම දෙයක් නැහැ. බොරු කතා. එහෙම හැසිරෙන්නේ නැහැ. එහෙම දෙයක් නැහැ.” යනුවෙන් පොලිස් නිලධාරියාට පිළිතුරු දුන් ඇය මාධ්‍යවේදීන් සමග පවසා ඇත්තේ පොලීසිය තමාගේ අතීත ක්‍රියාකාරකම් ගැන ප්‍රශ්න කරමින් ඒවා මතක් කිරීම තමන්ට දැඩි මානසික පිඩනයක් බවයි.
බලහත්කාරයෙන් අතුරුදහන් කරන ලද අය බව පවසමින් සොයමින් සිටින්නේ හිටපු විමුක්ති කොටි සාමාජිකයන් නේදැයි ද පොලිස් නිලධාරියා ප්‍රශ්න කර තිබේ.
ඇගේ පිළිතුර වී ඇත්තේ, “එයාලා වෙනයි. එයාලා දැන් දොවියෝ වෙලා. අපි හොයන්නේ ආරක්ෂක අංශ වලට අපිම බාර දීපු අය. බාර වෙච්ච අය. ඒ වගේම අපි බාර දුන් ළමයි තමයි අපි හොයන්නේ,” යන්නයි.
බලහත්කාරයෙන් අතුරුදහන් කළ අය සෙවීමේ පරමාර්ථය කුමක්දැයි පොලිස් නිලධාරියා විමසු විට ඇය පවසා ඇත්තේ සිය සමීපතමයන්ට අත් වු ඉරණම කුමක්දැයි දැන ගැනීම වෙනුවෙන් එය සිදු කරන බවයි.
එම අරගලය අතුරුදහන් වු සිංහල, දෙමළ, මුස්ලිම් සියල්ලන් වෙනුවෙන්දැයි පොලිස් නිලධාරියා ප්‍රශ්න කළ අවස්ථාවේ උතුරු සහ නැගෙනහිර බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ ලේකම් ද වන තම්බිරාසා සෙල්වරානි පවසා ඇත්තේ ඒ සැමට අත්වූ ඉරණම ගැන සත්‍යය හෙළි කරගැනීම තම අරමුණ බවයි..
“ඔව්. කවුරු උනත් මිනිස්සුනේ. එයාලා ඔක්කෝටම මොකක්ද උනේ කියලා දැන ගන්න ඕනේ.”
අතුරුදහන් පිරිස නැවත හමු වූවහොත් ඔවුන් අතුරුදහන් කළේ කවුරුන් විසින්දැයි ඔවුන් විසින් හෙළි කරන බැවින් ඊට වගකිවයුතු අයට දඩුවම් ලබා දිය යුතුදැයි පොලිස් නිලධාරියා තම්බිරාසා සෙල්වරානිගෙන් විමසා තිබේ.
ඇය පවසා ඇත්තේ වරදකරුවන් ඝාතනය නොකළ යුතු නමුත් නීතිය මාර්ගයෙන් ඔවුන්ට දඩුවම් පැමිණවිය යුතු බවයි.
“ඔව්. අනිවාර්යෙන් කරන්න ඕන. ඒ ගොල්ලන්ට දඩුවම් කරන්න ඕන. මරලා දාන්න ඕන නෑ. හිරේ දෙන දඩුවම මොන වගේද කියලා එයාලා දැන ගන්න ඕන.”
බලහත්කාරයෙන් අතුරුදහන් කර සිටින සිය ඥාතීන් සොයා ගැනීම වෙනුවෙන් තමන් ජිනීවා මානව හිමිකම් සමුළුව ඇතුළුව දෙස්, විදෙස් වශයෙන් සිදු කළ අරගලයන්හි ඡායාරූපද තමාගෙන් ප්‍රශ්න කළ පොලිස් නිලධාරියාගේ ලිපිගොනුවේ තිබු බව තම්බිරාසා සෙල්වරානි මාධ්‍යවේදීන් සමග පවසා තිබේ.
Facebook Comments
