රජය විසින් වී සඳහා ලබා දෙන සහතික මිලට වඩා වැඩි මිලක් පෞද්ගලික අංශය ගොවීන් වෙත ලබා දෙන බැවින් ගොවීන් වී අලෙවි මණ්ඩලය වෙත වී අලෙවි නොකරන මට්ටමක් පවතින බවට වී අලෙවි මණ්ඩලයේ සභාපතිවරයා අනතුරු අඟවයි.
එසේ වුවද ගොවීන් වී රැගෙන පැමිණෙන ඕනෑම අවස්ථාවකදී වී මිලදී ගැනීමට සුදානමින් සිටින ලෙස ග්‍රාමීය ආර්ථිකය පිළිබද අමාත්‍ය පී.හැරිසන් උපදෙස් ලබා දී ඇති බව වී අලෙවි මණ්ඩලයේ සභාපති එම්.බී.දිසානායක පවසයි.
මහ කන්නයේ වී අස්වැන්න මිළදී ගැනීම සඳහා වී අලෙවි මණ්ඩලය යටතේ පවතින වී ගබඩා 200 ක් සුදානමින් පවතින බව පෙන්වා දෙන සභාපතිවරයා නාඩු රුපියල් 38 ටද සම්බා රුපියල් 41 කටද මිලදී ගැනීමට රජය විසින් සහතික මිලක් නියම කර ඇති බවද කියා සිටී.
මාර්තු 14 දා වන විට නැගෙනහිර පළාත තුළ වී මෙට්‍රික් ටොන් 200 ක් වී අලෙවි මණ්ඩලය විසින් මිලදී ගත් බව කී වී අලෙවි මණඩලයේ සාමාන්‍යාධිකාරී සමන් පාලිත බණ්ඩාර මාර්තු 15 සිට දකුණු පළාත තුළද වී මිලදී ගැනීම ආරම්භ කළ හැකි බව ද සඳහන් කළේය.
මෙවර මහ කන්නය සදහා රජය වී අලෙවි මණ්ඩලය වෙත රුපියල් මිලියන 500 ක් වෙන් කර දී ඇති බවයි සභාපති එම්.බී.දිසානායක වැඩි දුරටත් පවසන්නේ.
Facebook Comments
