තවත් බාල ළමා දුෂක සැකකාරයකු අල්ලා ගනී

බාල වයස්කාර තවත් දැරියක් දුෂණය කළ බවට චෝදනා ලබන වැඩිහිටියකු අත්අඩංගුවට ගත් බව ජාතික ළමා ආරක්ෂක අධිකාරිය පවසයි.

මෙම අත් අඩංගුවට ගැනීම සිදුකර ඇත්තේ පහළොස් හැවිරිදි දැරියක් අපයෝජනය කිරීම සම්බන්ධයෙන් අත් අඩංගුවට ගන්නා ලද ජාතික හා ජාත්‍යන්තර සැකකාර සමූහය අතරට පොලිස් නිලධාරියකු සහ හිටපු බැංකු කළමනාකරුවකුද රිමාන්ඩ් භාරයට පත් කිරීම සමගිනි.

කොළඔ දිස්ත්‍රික්කයේ පදිංචි වයස අවුරුදු 14 ක දැරියක් ස්ත්‍රී දූෂණයට ලක් කිරීමක් සම්බන්ධයෙන් ජාතික ළමා ආරක්ෂක අධිකාරියේ විශේෂ පොලිස් විමර්ශන ඒකකයට ලැබුණූ පැමිණිල්ලකට අනුව සැකකාර පුද්ගලයා ජුලි 10 වැනි දින අත්අඩංගුවට ගෙන කොළඔ ප්‍රධාන මහේස්ත්‍රාත් අධිකරණය වෙත ඉදිරිපත් කළ බවයි එම අධිකාරිය පවසන්නේ.

මෙසේ අත්අඩංගුවට ගෙන ඇත්තේ, වින්දිත දැරියගේ වයස අවුරුදු 37 ක් වූ මස්සිනා (අක්කාගේ ස්වාමිපුරුෂයා) වන අතර කොළඔ ප්‍රධාන මහේස්ත්‍රාත් අධිකරණය විසින් සැකකරු බාල වයස්කාර දැරියව ස්ත්‍රී දූෂණයට ලක් කිරීම (ද.නි.ස. 363) සම්බන්ධයෙන් සහ 1995 අංක 22 දරණ දණ්ඩ නීති සංග්‍රහ (සංශෝධන) පනතේ 364 වන වගන්තිය (ව්‍යභිචාරය) යන අපරාධය යටතේ ජුලි 23 දින දක්වා රක්ෂිත බන්ධනාගාරගත කර ඇත.

ළමයින් පවුල් තුළදී තම ඥාතීන්ගෙන් අපයෝජනයට ලක්වීම් වාර්තා වන බැවින්, තම දරුවන් පිළිබඳ විශේෂ අවධානයෙන් පසුවන ලෙසත්, බාල වයස්කාර දියණියන් ආරක්ෂා කරගැනීම පවුලේ සියලු දෙනාගේ මූලික වගකීමක් ලෙස සලකා කටයුතු කළ යුතු බවත් ජාතික ළමා ආරක්ෂක අධිකාරියේ සභාපති මහාචාර්ය මුදිත විදානපතිරණ දන්වා සිටී.

ජාතික ළමා ආරක්ෂක අධිකාරියේ සභාපති මහාචාර්ය මුදිත විදානපතිරණ, නියෝජ්‍ය සභාපති විශ්‍රාම ලත් මහාධිකරණ විනිසුරු නීතිඥ සුජාතා අලහප්පෙරුම ගේ මග පෙන්වීම හා අධීක්ෂණය යටතේ, ජාතික ළමා ආරක්ෂක අධිකාරියේ විශේෂ පොලිස් විමර්ශන ඒකකයේ ස්ථානාධිපති එන්. කදිරගාමර්, උ.පො.ප. සරත්, කා.උ.පො.ප. චිත්‍රා නන්දනී, පො.සැ. (48877) නිහාල්, පො.සැ. (61837) උදිත, පො.කො.රි (75531) බංඩාර යන නිලධාරී මෙම සිද්ධියට අදාළව විමර්ශන කටයුතු සිදු කරන බව ජාතික ළමා ආරක්ෂණ අධිකාරිය වැඩි දුරටත් සදහන් කරයි.

පැමිණිලි දොලොස් දහස පනී

ජාතික ළමා ආරක්ෂක අධිකාරියේ සභාපති මහාචාර්ය මුදිත විදානපතිරණ පසුගිය සතියේ මාධ්‍ය වෙත පවසා තිබුනේ ළමා අපයෝජන සම්බන්ධයෙන්වු පැමිණිලි දොළොස් දහස් එකසිය හැට පහක් ගත වු වසර එක හමාරේදී ලැබී ඇති බවයි.

එම අධිකාරිය පවසන පරිදි ළමා අපයෝජන සම්බන්ධයෙන් මේ වසරේ මුල් මාස පහේදී ලැබී ඇති පැමිණිලි සංඛ්‍යාව 4000 කි.

ළමා අපයෝජන සම්බන්ධයෙන් දැනුම් දීම සඳහා 1929 කෙටි දුරකථන ඇමතුම් අංකය අමතන ලෙස ජාතික ළමා ආරක්ෂණ අධිකාරිය ඉල්ලා සිටී.

අපරාධ සහ සංවිධානාත්මක අපරාධ දිසාව භාර නියෝජ්‍ය පොලිස්පති ප්‍රියන්ත ජයකොඩි 2019 වසරේ අපරාධ සංඛ්‍යා ලේඛන උපුටා දක්වමින් 2020 වසරේ හෙළි කර තිබුනේ ශ්‍රී ලංකාවේ සෑම පැය දෙකකට වරක්ම කුඩා දරුවකු අපචාරයට ගොදුරු වන අතර දිනකට අඩුම වශයෙන් ස්ත්‍රී දූෂණ හතරක් වාර්තා වන බවයි.