ගැසට් නිවේදනයක් මගින් මුතුරාජවෙල පාරිසරික සංවේදී කලාපයේ ඉඩම් නීතිවිරෝධී ලෙස නාගරික සංවර්ධන අධිකාරිය වෙත පවරා ගැනීම නිසා ප්‍රදේශයේ ජනතාවගේ මානව හිමිකම් කඩවී ඇති බවට ධීවර සංවිධානයක් ශ්‍රී ලංකා මානව හිමිකම් කොමිෂන් සභාව වෙත පැමිණිල්ලක් ඉදිරිපත් කර තිබේ.
නොවැම්බර් 09 වැනි අගහරුවාදා එම පැමිනිල්ල ඉදිරිපත් කර ඇත්තේ සමස්ත ලංකා ධිවර ජනතා වෘත්තීය සංගමය විසිනි.
පැමිණිල්ල ඉදිරිපත් කිරීමෙන් පසු මාධ්‍යවෙත අදහස් දක්වමින් සමස්ත ලංකා ධිවර ජනතා වෘත්තීය සංගමයේ සභාපති අරුණ රොෂාන්ත අවධාරණය කළේ ඉඩම් පවරා ගැනිමේ අවසාන ප්‍රතිළුලය වන්නේ එහි ජීවත් වන ධීවර ජනතාවට එම ප්‍රදේශවලින් ඉවත්වීමට සිදු වීම බවයි.
” අපේ පරම්පරාගත ඉඩම් අහිමි කිරීමේ කුමන්ත්‍රණකාරී වැඩ පිළිවෙලක් නීත්‍යානුකුලව කර ගන්න ආන්ඩුව මේ වෙලාවේ ගැසට් පත්‍රයක් දාලා තියනවා. ඒ නිසා අපි කියන්නේ වහාම මේ ගැසට් පත්‍රය අකුලා ගන්න. ” ඔහු ඉල්ලා සිටියේය.
ජාත්‍යන්තර පිළිගැනීමක් සහිත අගනා පාරිසරික කලාපයක් ද ඇතුළු බටහිර වෙරළ තීරය අගමැති යටතේ ඇති අධිකාරියකට පවරා ගැනීමට එරෙහිව මෙන්ම සංවර්ධනයේ මුවාවෙන් පෞද්ගලික ඉඩම් අත්පත් කරගෙන විදේශ සමාගම්වලට විකිණීමේ ගැසට් පත්‍රය හකුලා ගන්නා ලෙස ආණ්ඩුවට බලකෙරෙන උද්ඝෝෂණ මාලාවක් මුහුදුබඩ බිම් තීරය සුරැකීමේ සංවිධානය මේ වන විට දියත් කරමින් සිටි.
මුතුරාජවෙල පාරිසරික සංවේදී කලාපයේ ඉඩම් නීතිවිරෝධී ලෙස නාගරික සංවර්ධන අධිකාරිය වෙත පවරා ගැනීමට ගෙන තිබෙන තීරණය හරහා ආණ්ඩුක්‍රම ව්‍යවස්ථාව තුළින් ස්ථාපිත කර තිබෙන මූලික මිනිස් අයිතිවාසිකම් උල්ලංඝනය වීමක් සිදුවන බවට තීන්දුවක් ලබාදෙන ලෙස, සමගි ජන බලවේගයේ ගම්පහ දිස්ත්‍රික් පාර්ලිමේන්තු මන්ත්‍රී කාවින්ද ජයවර්ධන සහ මිගමුව ප්‍රදේශයේ පදිංචි ධීවරයකු වන කේ. එස්. එන්. ප්‍රනාන්දු මුලික අයිතිවාසිකම් පෙත්සමක් ද පසුගියදා ඉදිරිපත් කර තිබුනි.
“ඉකුත් ඔක්තෝබර් මස 07 වනදා ජනාධිපතිවරයා විසින් නිකුත් කළ ගැසට් නිවේදනයක් මගින් මුතුරාජවෙල පාරිසරික සංවේදී කලාපයේ පිහිටි ඉඩම් නාගරික සංවර්ධන අධිකාරිය යටතට පවරාගෙන ඒවා “රැම්සා” තෙත් බිමක් ලෙස සංවර්ධනය කිරීමට අවසර ලබාදී ඇති බවත්, රැම්සා තෙත්බිම සංවර්ධනය කිරීමේ කාර්යය නාගරික සංවර්ධන අධිකාරියට ඉටු කළ නොහැකි බවත්, එය සිදු කළ යුත්තේ වන සංරක්ෂණ දෙපාර්තමේන්තුව යටතේ බව,“පෙත්සම්කරුවෝ පෙන්වා දෙති.
“රැම්සා තෙත්බිමක්` නම් කළ පසු ඊට මහජනතාව ඇතුළුවීම තහනම් කෙරෙන අතර මේ හරහා අදාළ ප්‍රදේශයේ ලක්ෂ තුනක් වන පදිංචිකරුවන්ටත්, එයින් පන්දහසක් වූ තෙත් බිම ආශ්‍රිතව ධිවර රැකියාවේ හා වගාවේ නිරතවුවනටත් අසාධාරණයක් වන බව එම මුලික අයිතිවාසිකම් පෙත්සමේ සඳහන්වේ.
එබැවින් පෙත්සම්කරුවෝ ශ්‍රේෂ්ඨාධිකරණයෙන් ඉල්ලා ඇත්තේ “පරිසර සංවේදී කලාපයක්“ වශයෙන් නම්කර එය “රැම්සා” තෙත්බිමක් ලෙස සංවර්ධනය කිරීමේ අරමුණින් නිකුත් කරන ලද මෙම ගැසට් නිවේදනය බලරහිත කිරීමේ නියෝගයක් නිකුත් කරන්න ලෙසයි.
අගමැති මහින්ද රාජපක්ෂ, රාජ්‍ය ඇමති නාලක ගොඩහේවා, නාගරික සංවර්ධන සහ නිවාස අමාත්‍යාංශ ලේකම්වරයා, වනජීවී අධ්‍යක්ෂ ජනරාල් චන්දන සූරියබණ්ඩාර, වත්තල, මීගමුව, ජා-ඇළ ප්‍රාදේශීය ලේකම්වරු, නීතිපති සංජය රාජරත්නම් ඇතුළු 14 දෙනෙකු මෙහි වගඋත්තරකරුවන් ලෙස නම් කර තිබේ.
Facebook Comments
