ජනාධිපති කොමිසමක් හමුවේ ලබා දුන් සාක්ෂි ප්‍රකාශයක් සිංහලෙන් සටහන් කිරීම නිසා ඊට අත්සන් තැබීම දෙමළ දේශපාලනඥයෙක් ප්‍රතික්ෂේප කොට තිබේ.
දෙමළ ප්‍රගතිශීලි පෙරමුණේ නායක, පාර්ලිමේන්තු මන්ත්‍රී මනෝ ගනේෂන් විසින් ප්‍රතික්ෂේප කොට ඇත්තේ යහපාලන ආණ්ඩු සමයේ සිදුවූ යැයි කියන වංචා හා දුෂණ සෙවීම සඳහා පිහිටවූ ජනාධිපති විශේෂ විමර්ශන කොමිසම ඉදිරියේ ඊයේ [12] දෙන ලද සාක්ෂි සටහනට අත්සන් තැබීමයි.
“කොමිසම සාක්ෂි ලබා ගනිද්දී සිංහලෙන් දෙමළටත්, දෙමළෙන් සිංහලටත් පරිවර්තන ලබා දුන්නත්, සාක්ෂි සටහන් කරගෙන තිබුනේ සිංහලෙන්. ඉතිං ඒ සිංහල පිටපතට අත්සන් කළේ නැහැ. මම ඒක දෙමළෙන් ඉල්ලුවා,“යැයි මනෝ ගනේෂන් මන්ත්‍රීවරයා අනතුරුව මාධ්‍ය හමුවේ පැවසීය.
ජනාධිපති කොමිසමට එම අවස්ථාවේ දෙමළ භාෂා සටහනක් ලබා දීමට හැකියාවක් නොතිබූ බැවින්, වෙනත් දිනයක කැඳවන බව රාජ්‍ය භාෂා ප්‍රතිපත්තිය භාර හිටපු රාජ්‍ය අමාත්‍යවරයකු වන මන්ත්‍රීවරයාට පවසා තිබේ.
මෙම විශේෂ ජනාධිපති කොමිසම හමුවේ පෙනී සිටින ලෙස දන්වා දෙමළ ප්‍රගතිශීලි පෙරමුණේ නායකයාට නොතීසි නිකුත් කර තිබුනේ ද සිංහල බසිනි.
දෙමළ බසින් ලියවුනු නොතීසියක් ලබා දෙන තෙක් නොතීසි බාර නොගන්නා බවත්, කොමිසම හමුවේ පෙනී නොසිටින බවත් ඔහු දෙමළ බසින් ඊමේල් පණිවිඩයකින් දන්වා තිබුණි.
අනතුරුව දෙමළ බසින් සකස් කළ සිතාසියක් මනෝ ගනේෂන් වෙත බාර දී තිබේ.
ශ්‍රී ලංකා ප්‍රජාතන්ත්‍රවාදී,සමාජවාදී ජනරජයේ ආණ්ඩු ක්‍රම ව්‍යවස්ථාව මගින් සිංහල හා දෙමළ රාජ්‍ය භාෂා ලෙස සහතික කොට ඇත.
Facebook Comments
