විත්තිකරුවන්ට එරෙහිව අධිකරණයේ ගොනු කොට ඇති අධි චෝදනා ඉවත්කර ගන්නා බවට ජනාධිපති ගෝඨාභය රාජපක්‍ෂ පත් කළ නීතිපතිට එරෙහිව විරෝධය එල්ල වී තිබේ.
නීතිපති සංජය රාජරත්නම් වෙනුවෙන් පෙනී සිටී අතිරේක සොලිස්ටර් ජනරාල් නෙරින් පුල්ලේ ඊයේ [01] අභියාචනාධිකරණයට දැනුම් දුන්නේ නීතිපති දෙපාර්තමේන්තුවේ අතිරේක සොලිස්ටර් ජෙනරාල්වරයකුගේ ‘රහස්‍ය වාර්තාවක්’ පදනම් කරගෙන, තරුණයන් ඇතුළු පුද්ගලයන් එකොලොස් දෙනකු බලහත්කාරයෙන් පැහැර ගෙන ගොස් අතුරුදහන් කිරීමේ චූදිත හිටපු නාවික හමුදාපතිට එරෙහිව අධි චෝදනා ඉවත් කරගැනීමට නීතිපතිවරයා පියවර ගත් බවයි.
එම රහස්‍ය වාර්තාව අද, 02 වැනිදා අභියාචනාධිකරණයට ඉදිරිපත් කෙරුණු අතර ඒ පිලිබඳ තීන්දුවක් නොවැම්බර් 08 වැනිදා ලබා දීමට සෝභිත රාජකරුණා සහ ධම්මික ගනේපොල යන අභියාචනාධිකරණ විනිසුරු මඩුල්ල තීරණය කළේය.
එම වාර්තාවේ සඳහන් තොරතුරු දැනගැනීම අයිතිය ඉල්ලා සිටින පීඩිතයන්ගේ නෑ දෙමාපියන් සමග එක්ව මානව හිමිකම් ක්‍රියාධාරීන් හා නීතිඥවරුන් උද්ඝෝෂණයක් දියත් කර තිබේ.
“රහස්‍ය වාර්තාවක් වුවත් නඩුවේ දෙපාර්ශවයටම එය ලබා දිය යුතුයි. නැත්නම් අපි කොහොමද උත්තර බඳින්නේ? මේ ගැන කතා කරන්න අපි නීතිපතිවරයාගෙන් වෙලාවක් ඉල්ලුවත් ඒ ගැන උනන්දුවක් දැක්වුයේ නැහැ,“ යැයි නීතිපති දෙපාර්තමේන්තුව ඉදිරිපිට විරෝධතාවක නිරත වෙමින්, අතුරුදහන් වූවන්ගේ පවුල් එකතුවේ සභාපති බ්‍රිටෝ ප්‍රනාන්දු පැවසුවේය.
අතුරුදහන් කළවුන්ගේ ඥාතින් ඇතුළු හතලිහකට ආසන්න පිරිසක් එක් ව සිටී මෙම උද්ඝෝෂණයේදී විත්තිකාර හිටපු නාවික හමුදාපතිගේ අධි චෝදනා ඉවත් කිරීමට එරෙහිව නීතිපති සංජය රාජරත්නම්ට එරෙහිව විරෝධය එල්ලවිණි.
2019 නොවැම්බර් 19 වැනිදා මේ දක්වා කෙතරම් අධි චෝදනා ප්‍රමාණයක් නීතිපතිවරයා විසින් ඉවත් කරගෙන ඇත්ද, එසේ ඉවත් කර ගත් චුදිතයන්ගේ නම්, නඩු අංක සහ අධි චෝදනා ගොනු කළ දින මොනවාද, යන්න විමසා සමගි ජනබලවේගයේ පාර්ලිමේන්තු මන්ත්‍රී මුජිබර් රහුමාන් නීතිපතිවරයාගෙන් ලිඛිත විමසීමක් කර තිබේ.
පසුගිය පාර්ලිමේන්තු සැසියේදී රහුමාන් මන්ත්‍රීවරයා සඳහන් කළේ රාජපක්‍ෂ සභාග ආණ්ඩුවේ දේශපාලඥයින්ගේ හා හිතවතුන්ට අදාළ නඩු 20 ක් නීතිපති සංජය රාජරත්නම් විසින් ඉල්ලා අස්කරගෙන ඇති බවයි.
යහපාලන ආණ්ඩු සමයේ සිදු වූයේ යැයි කියන දේශපාලන පලිගැනීම් විමර්ශනයට පත් කළ උපාලි අබේරත්න කොමිසම මගින්ද මෙසේ අධි චෝදනා ලැබූ රාජපක්‍ෂ පවුලේ හා ආණ්ඩුවේ හිතවතුන් රැසක් නිදොස් කොට නිදහස් කරන්නට නිර්දේශ කර තිබිණි. ඒ අතර හිටපු නාවික හමුදාපති කරන්නාගොඩ ද වේ.
හිටපු නාවික හමුදාපතිවරයාට එරෙහිව කොළඹ ත්‍රිපුද්ගල මහාධිකරණ විනිසුරු මඩුල්ල හමුවේ ගොනුකර තිබෙන අධි චෝදනා ඉවත් කර ගැනීමට නීතිපතිවරයා ගත් තීරණය බලරහිත කරන ලෙස ඉල්ලා නීතිඥ අචලා සෙනෙවිරත්න මගින් සරෝජා ගෝවින්ද සාමි නාගනාදන් හෙවත් එම්.සරෝජනී පෙරේරා, ජමාල්ඩීන් ජෙනී ෆස්ලීන්ජෙනිෆර් වීරසිංහ, දොන් මර්වින් ප්‍රේමලාල් වීරසිංහ, අමීන්තුල් ජිෆ්රියා සාබ්දීන් යන අතුරුදන් කළවුන්ගේ ඥාතීන් සිව් දෙනකු ගොනු කළ රිට් පෙත්සමේ වගඋත්තරකරුවන් ලෙස නම් කර ඇත්තේ නීතිපති සංජය රාජරත්නම් සහ හිටපු නාවික හමුදාපති, අද්මිරාල් ඔෆ් ද ෆ්ලීට් වසන්ත කරන්නාගොඩ යි.
නාවික හමුදාපතිවරයාගේ අධි චෝදනා ඉවත් කර ගැනීමට නීතිපතිවරයා ගත් තීරණය ක්‍රියාත්මක වීම අත්හිටුවන අතුරු තහනම් නියෝගයක් කරන ලෙස ද විත්තිකාර හිටපු නාවික හමුදාපතිට එරෙහිව ගොනු කර ඇති නඩුව තවදුරටත් පවත්වාගෙන යන ලෙස නීතිපතිවරයා ට බල කරන රිට් ආඥාවක් නිකුත් කරන ලෙස ද පෙත්සම්කරුවෝ අභියාචනාධිකරණයෙන් ඉල්ලා සිටිති.
යුද්ධය උත්සන්නව පැවති 2008-2009 වසර වල සිසුන් ඇතුළු පිරිමින් 11 දෙනෙක් කොළඹ හා ඒ අවටදී පැහැර ගෙන යාම, කප්පම් ගැනීම සහ අතුරුදන් කිරීම ට එරෙහිව චෝදනා 667 ක් සාක්ෂිකරුවන් 126 ක් සහ නඩු ලේඛන 64 ක් ඇතිව අධි චෝදනා ගොනු කරමින් හිටපු නාවික හමුදාපති, අද්මිරාල් ඔෆ් ද ෆීලීට් වසන්ත කුමාර ජයදේව කරන්නාගොඩට එරෙහිව පවරා තිබෙන අදාළ නඩුව තවදුරටත් ඉදිරියට පවත්වාගෙන නොයන බව නීතිපතිවරයා විසින් කොළඹ මහාධිකරණයට හා අභියාචනාධිකරණයට දැනුම් දී තිබිණි.
කස්තුරි ආරච්චිලාගේ ජෝන් රීට්, ඇන්ටනි කස්තුරි ආරච්චි,රාජීව් නාගනාදන්, ප්‍රදීප් විශ්වනාදන්,මොහොමඩ් සාජීත්, තිලකේශ්වරම් රාමලිංගම්, ජමාල්ඩින් ඩිලාන්, අමලන් ලියෝන්, රෝෂාන් ලියෝන්,කනකරාජා ජේගන්, සහ මොහොමඩ් අලි අන්වර් පැහැරගෙන ගොස් අතුරුදන් කර තිබේ. අදාළ පරීක්ෂණ වලදී හෙළිවුයේ නාවික හමුදා නිලධාරින් විසින් පැහැරගත් තරුණයන් නිදහස් කිරීම සඳහා ඔවුන්ගේ දෙමාපියන්ගෙන් කප්පම් මුදල් ලබා ගෙන ඇති බවය. අපරාධ පරීක්ෂණ දෙපාර්තමේන්තුව සිය පරීක්ෂණ වාර්තා මගින් කියා සිටියේ පැහැරගත් අයගෙන් කිහිපදෙනෙක් කොළඹදීත් තවත් පිරිසක් නාවික හමුදාවට අයත් ත්‍රිකුණාමල ගන් සයිඩ් කඳවුරේදී මරා දමා ඇති බවය.
Facebook Comments
