රගර් ක්‍රීඩක වසීම් තාජුඩීන්ගේ සිරුරේ අස්ථි කොටස් මාලඹේ පෞද්ගලික වෛද්‍ය විද්‍යාලය වෙත ගෙන ගොස් ඇතැයි හෙළි වූ බව රහස් පොලීසිය අද (21) අධිකරණයට දැනුම්දී තිබේ.
තාජුඩීන්ගේ මරණය සම්බන්ධයෙන් විභාග වන නඩුව අද විභාගයට ගත් අවස්ථාවේදී රහස් පොලිසිය මේ බව දැනුම් දුන්නේය.
අස්ථි කොටස් අතුරුදහන්වීම සම්බන්ධව කොළඹ අධිකරණ වෛද්‍ය කාර්යාලයේ සේවකයින් කිහිපදෙනෙකුගෙන් ප්‍රකාශ ලබාගත් බව සඳහන් කළ පොලිසිය එම ප්‍රකාශවලදී වෛද්‍ය ආනන්ද සමරසේකර විශ්‍රාම යාමට දින කිහිපයකට පෙර ශීතාගාරයේ තිබූ අස්ථි කොටස් අඩංගු පාර්සල් 15 ක් පමණ වාහනයකින් වෙනත් ස්ථානයකට රැගෙන ගොස් ඇති බවට අනාවරණය වී ඇත.
ඒ අනුව සිදුකළ විමර්ශනයේ දී එම අස්ථි කොටස් මාලඹේ පෞද්ගලික වෛද්‍ය විද්‍යාලය වෙත රැගෙන ගොස් ඇති බවට අනාවරණය වූ බව අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.
වසීම් තාජුඩීන්ගේ අස්ථි කොටස් කිහිපයක් අතුරුදන්වීම සම්බන්ධයෙන් කොළඹ හිටපු ප්‍රධාන අධිකරණ වෛද්‍ය නිලධාරී ආනන්ද සමරසේකර පිළිබඳව ද පරීක්ෂණ පවත්වන බවද අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබේ.
රගර් ක්‍රීඩක වසීම් තාජුඩීන්ගේ මරණය සම්බන්ධයෙන් අධිකරණයට ඉදිරිපත් කෙරුණු හිටපු ජ්‍යෙෂ්ඨ නියෝජ්‍ය පොලිස්පති අනුර සේනානායක සහ නාරාහේන්පිට පොලිසියේ අපරාධ අංශයේ හිටපු ස්ථානාධිපති සුමිත් පෙරේරා තවදුරටත් රක්ෂිත බන්ධනාගාර ගත කර ඇත.
සැකකරුවන් ඔක්තෝබර් මස 05 වන දින දක්වා රක්ෂිත බන්ධනාගාර ගත කිරීමට කොළඹ අතිරේක මහේස්ත්‍රාත් නිශාන්ත පීරිස් නියෝග කළේය.
Facebook Comments
