අලි සබ්රිගේ ‘යුක්තියට ප්‍රවේශය’හමුවට ගිය දෙමළ අම්මලාට පොලිස් හිරිහැර

0

බලහත්කාරයෙන් අතුරුදහන් කරනු ලැබුවන්ට යුක්තිය සලසා දෙන බව පවසමින් ජිනීවා මානව හිමිකම් සමුළුව ඇරඹීමට ආසන්නයේ අධිකරණ අමාත්‍යංශය උතුරේ ආරම්භ කළ වැඩසටහනකට විරෝධය පෑ දෙමළ මව්වරුන් පොලිස් අඩන්තේට්ටමට ගොදුරු වී තිබේ.

අධිකරණ අමාත්‍යවරයාගේ සහභාගිත්වයෙන් ‘යුක්තියට ප්‍රවේශයක්’ නමින් උතුරේ පවත්වන්නට නියමිත ජංගම සේවාවක් වව්නියාව දිස්ත්‍රික් ලේකම් කාර්යාලයෙන් 26 බදාදා ආරම්භ කරද්දී ඊට විරෝධය පෑ අතුරුදහන් කළවුන්ගේ ඥාතීන් පසුබස්වන්නට පොලිසිය බලහත්කාරය යොදන අයුරු මාධ්‍යවේදීන්ගේ වීඩියෝ දර්ශනවලින් දැකගන්නට හැකිය.

එහිදී ක්ලාන්තය සැදී වැටී සිටින එක් මාතාවකට කිහිප දෙනකු පැන් ඉස සාත්තු කරනු මේ සමග ඇති වීඩියෝවේ පෙනෙන්නට තිබේ.

“අපි හැමෝටම පණ නහගන්නද කියන්නේ,” යි සිය අතුරුදහන් ඥාතියාගේ ඡායාරූපයක් අතැතිව සිටින කාන්තාවක් උද්වේගකර ලෙසින් පොලිස් භටයන්ගෙන් ඒ අවස්ථාවේ විමසා සිටියාය.

“අපි ඉල්ලන්නේ යුක්තිය. අපේ නෑයන් හොයාගන්නට පාරවල් දිගේ අව්ව වැස්ස නොබලා සටන් කරන්නේ වෙන වැඩක් නැති හින්දද?”

විරෝධතාවට එක්ව සිටි අතුරුදහන් කළවුන්ගේ ඥාතීන් අධිකරණ අමාත්‍යංශය නියෝජනය කරමින් පැමිණි නිලධාරීන් හමුවීමට උත්සාහ කළ අවස්ථාවේ එය වලක්වා ලූ පොලිසිය හා බහින් බස් වීමක් සිදුවූ බව වව්නියාවේ මාධ්‍යවේදියෝ පවසති.

අතුරුදහන් වු පුද්ගලයන්ගේ පවුල් සදහා “යම් අසාධාරණයක් වී ඇත්නම්” ඒ සදහා වන්දි ලබාදීමට මෙවර අය වැයෙන් මුල්‍ය ප්‍රතිපාදන වෙන්ව ඇති බවත්, විශේෂයෙන් ජාතීන් අතර සාමය, සංහිදියාව ගොඩනැංවීම උතුරු පළාතේ පැවැත්වෙන ජංගම සේවයේදී වැඩි අවධානයක් යොමු කරන බවත්, සංහිදියාව සම්බන්ධව විශ්ව විද්‍යාල ශිෂ්‍ය ප්‍රජාව සහ තරුණ පිරිස් සමග සාකච්ඡා කරන බවත්, අධිකරණ අමාත්‍යවරයා කොළඹදී මාධ්‍යවේදීන් අමතා පවසා තිබුණි.

“ විශේෂයෙන් අතුරුදහන් වුවන්ගේ පවුල් සදහා පවතින ගැටළු විසදීමට හා සංහිදියාවට මෙහිදී ප්‍රමුඛතාවයක් ලබා දෙනවා,” යි අමාත්‍ය අලි සබ්රි ප්‍රකාශ කළේය.

ආණ්ඩුව ජිනීවා සමුළුව ආසන්නයේ ‘යුක්තියට ප්‍රවේශයක්’ කියාගෙන ක්‍රියාත්මක කරන්නේ මේතාක් වසන් කළ යුක්තිය තව දුරටත් තමන්ට අහිමි කිරීමේ රැවටිල්ලක් බවට පීඩිතයෝ චෝදනා කරති.

“අපේ දරුවෝ බලහත්කාරයෙන් අතුරුදහන් කරලා දැන් අවුරුදු 12 ක් විතර ගතවෙලා. අපේ සත්‍යග්‍රහයටත් දැන් අවුරුදු පහක්. කොමිෂන් ගනනාවක් පත් කළත් කිසිම සාධාරණයක් ඉටු කළේ නැහැ. නීතියක් නැති රටේ මොන අධිකරණ අමාත්‍යංශ ද? ජංගම සේවා කියලා අපිව රවට්ටන්න හදන්නේ,“ බලහත්කාරයෙන් අතුරුදහන් කරනු ලැබුවන්ගේ ඥාතීන්ගේ සංගමය පවසයි.

අධිකරණ අමාත්‍යංශය හා අතුරුදහන් කළ තැනැත්තන්ගේ කාර්යාලය [OMP] ඒකාබද්ධව උතුරු නැගෙනහිර නියෝජනය කර දිස්ත්‍රික් පහ පුරා පවත්වන බව OMP උතුරු නැගෙනහිර සම්බන්ධිකාරක කේ.සෙල්වකුමාර් පවසයි.

ජාතික සමගිය හා සංහිදියා කාර්යාලය, හානි පුර්ණ කාර්යාලය, ශ්‍රී ලංකා නීතිඥ සංගමය සහ ශ්‍රී ලංකා නීති ආධාර සංගමයත් ඊට හවුල් වන බව අධිකරණ අමාත්‍යාංශය නිවේදනය කර තිබුණි.

“මේ ආණ්ඩුව තමයි අපේ දරුවන් බලෙන් අරන් ගිහින් අතුරු දහන් කළේ. ඒවා හොයන්න මෙච්චර කල් පත්කරාපු කොමිෂන් වලට මොකද වුනේ. අපේ දරුවන්ගේ මරණ සහතිකවත්, වන්දි මුදල් වත් අපිට එපා.ඒවා අපිට බලෙන් දෙන්න හදන්න එපා. ඕ. ඇම්. පී. අපිට ඕනේ නැහැ.ඒ හින්දා ආයේ මෙහෙ එන්න එපා,“යැයි අතුරුදහන් කළවුන්ගේ ඥාතින් ඉමහත් වේදනාවෙන් හා ආවේගයෙන් යුතුව පැවසූ බව ද මාධ්‍යවේදියෝ සඳහන් කරති.

මේ අතර අධිකරණ අමාත්‍යංශයේ කිලිනොච්චි දිස්ත්‍රික් ජංගම සේවය ජනවාරි 27 හා 28 දෙදින තුල කිලිනොච්චි මාධ්‍ය විද්‍යාලයේදී පැවැත්වීමට නියමිතය.

“මෙම ජංගම සේවාව තුලින් අතුරුදහන් කළවුන්ගේ ඥාතීන්ට අවශ්‍ය සේවා සහ ඔවුන්ගේ ඥාතින් ගැන විමර්ශනයක් ලෙස දෙයාකාරයක කාර්යන් කෙරෙනවා. අතුරුදහන් කළවුන්ගේ විමර්ශන සඳහා උතුරු පළාතේ 400 දෙනෙකුට අපි ඇරයුම් කර තිබෙනවා.“යැයි කිලිනොච්චියේ දී ඊයේ [26] පැවති මාධ්‍ය හමුවකට එක්වෙමින් OMP සම්බන්ධිකාරක කේ.සෙල්වකුමාර් පැවසීය.

OMP කාර්යාලය හෝ එහි හිටපු සභාපති නායකත්වය උසුලන නීතිඥ සංගමය හෝ වව්නියාවේ පොලිස් අඩන්තේට්ටම ගැන මේතාක් කිසිදු ප්‍රකාශයක් කළ බවක් දැනගන්නට නැත.

“වැරදිකරුවන්ට දඩුවම් දෙන්නේ නැතිව පොදු සමාව දීලා, බේරාගන්න රටේ අපිට සාධාරණයක් වෙයි කියලා හිතන්න පුලුවන්ද. අපි ඒ බලාපොරොත්තු අත්හැර අපේ හඬ ජාත්‍යන්තරයට ගෙනියනවා,“ වව්නියාවේ විරෝධතාවට එක්ව සිටි මාතාවක් පැවසුවාය.

Facebook Comments

wedding people