ගෝඨා අත්අඩංගුවට ගන්නැයි සිංගප්පුරුට පැමිණිල්ලක්

සිංගප්පුරුවට ගොස් සිටින ශ්‍රී ලංකාවේ හිටපු ජනාධිපතිවරයා වහාම අත් අඩංගුවට ගන්නා ලෙස ඉල්ලමින් ජාත්‍යන්තර සත්‍ය සහ යුක්තිය ව්‍යාපෘතිය (ITJP – International Truth and Justice Project) සිංගප්පූරුවේ නීතිපතිවරයා වෙත පැමිණිල්ලක් ගොනු කර තිබේ.

හිටපු ජනාධිපති ගෝඨාභය රාජපක්ෂ ආරක්ෂක ලේකම්වරයා ලෙස කටයුතු කළ කාලයේ ජිනීවා සම්මුතිය උල්ලංඝනය කරමින් යුද අපරාධ සිදු කළා යැයි චෝදනා කරමින් පිටු 63 කින් යුත් පැමිණිල්ල ගොනු කර ඇත.

අදාළ පැමිණිල්ලේ පිටපතක අඩංගු කරුණු උපුටා දක්වමින් රොයිටර්ස් පුවත් සේවය මේ බව වාර්තා කර තිබේ.

එමෙන් ම විශ්වීය අධිකරණ බලය මත පදනම්ව, එම චෝදනා සඳහා සිංගප්පූරුවේදී නඩු පැවරීමට හැකියාවක් පවතින බවට දකුණු අප්‍රිකාව පදනම් කරගත් ITJP සංවිධානය පෙන්වා දි ඇත.

හිටපු ජනාධිපති ගෝඨාභය රාජපක්ෂ ජූලි 13 වන දා අලුයම මාලදිවයින් වෙත පළා ගොස් තිබුණු අතර පසුව ඔහු සිංගප්පූරුව බලා ගොස් තිබිණි.