‘දෙමළ ජනතා ශාපය සිංහල ජනයාගේ කෝපය බවට හැරිලා’

0

දශක ගනනාවක දෙමළ ජනයාගේ ශාපය සිංහල ජනයාගේ කෝපයට හැරී ඉහලින් වැජඹුණු රාජපක්ෂලා අවලංගු කාසි බවට පත්ව ඇතැයි නැගෙනහිර පළාතේ දෙමළ ජනතා සංවිධානයක් පෙන්වා දී තිබේ.

“රාජපක්ෂලාට එරෙහි දෙමළ ජනයාගේ ශාපය සිංහලයාගේ කෝපය බවට පත්වීමෙන් අවලංගු කාසියක් වුනු රාජපක්ෂලා අද රටේ කැත සංකේතයක් වෙලා,“යැයි දෙමළ සංවේදනා සංවිධානයේ ප්‍රධානී ගණපතිපිල්ලේ මෝහන් පවසයි.

නැගෙනහිර මාධ්‍යවේදීන්ව මඩකලපුව, චෙංකල් අඩි පිහිටි කාර්යාලයට කැඳවූ ගනපතිපිල්ලේ මොහාන් හෙවත් `තියටර් මෝහන් ` කියා සිටියේ ත්‍රස්තවාදය වැළැක්වීමේ පනතට සංශෝධන එක් කළද දෙමළ දේශපාලන සිරකරුවන් නිදහස් නොකොට තවමත් සිරගත කර සිටින බවයි.

ත්‍රස්තවාදය වැළැක්වීමේ පනත යටතේ වසරකට වැඩි කාලයක් සිරගතව සිටී තියටර් මොහාන් මීට දින කිහිපයකට පෙර ඇප මත මුදා හැරිණි.

එරාවුර් පොලිසිය මගින් මොහු 2021 වසරේ මැයි මාසයේදී අත්අඩංගුවට ගෙන තිබුනේ විමුක්ති කොටි නායක ප්‍රභාකරන්ගේ සේයාරුවක් සමාජ මාධ්‍ය මගින් හුවමාරු කිරීම මගින් කොටි සංවිධානයේ මතවාදය ප්‍රවර්ධනය කරන බවට චෝදනා කරමින්.

“ත්‍රස්තවාදය වැළැක්වීමේ පනත ලංකාවෙන් සම්පූර්ණයෙන්ම අහෝසි කරන්න කියලා දෙමළ සංවේදනා සංවිධානය හැටියට අපි අලුත් ජනාධිපති රනිල් වික්‍රමසිංහ ගෙන් ඉල්ලීමක් කරනවා.“

“ත්‍රස්තවාදය වැළැක්වීමේ පනත අහෝසි කරන ලෙස ඉල්ලා දෙමළ ජාතික සන්ධානය රටපුරා අත්සන් කිරීමේ ව්‍යාපාරයක් දියත් කරා. දැන් ඒකට මොකද වුණේ කියලා කවුරුත් දන්නේ නැහැ.“

මෙම ත්‍රස්ත මර්දන නීතිය ඉවත් කර ගැනීම සඳහා දෙමළ ජනතාව ගැන හිතන සියලුම දේශපාලනඥයන් එකට එක් විය යුතු බව පවසන තියටර් මෝහන් සමාජයට වැඩදායි නොවන පුද්ගලයන් පාර්ලිමේන්තු මන්ත්‍රීවරුන් ලෙස පත් නොකළ යුතු බව අවධාරණය කරයි.

“ ඊළඟ පියවර හැටියට අපි ගමට ගමට ගිහින් ජනතාවට පැහැදිලි කරනවා ඡන්දය දීමෙන් කළ හැකි දේවල් ගැන.“

“දෙමළ ජාතික සංධානයේ දේශපාලන ස්ථාවරයට අපි එකඟ නොවුණත් අද දෙමළ ජනතාවගේ ප්‍රමුඛතම පක්ෂය ලෙස එය සැලකෙනවා.“

දෙමළ ජනයා තම අයිතිවාසිකම් සම්බන්ධ කාරණාවලදී පසු නොබැසිය යුතු යැයි සඳහන් කරන දෙමළ සංවේදනා සංවිධානයේ ප්‍රධානියා අවධාරණය කරන්නේ උතුරු-නැගෙනහිර පළාත් ඒකාබද්ධ කර නැගෙනහිර පළාත අද්විතීය තත්වයට පත් කිරීම තම අපේක්ෂාව බවයි.

Facebook Comments