ඖෂධ හිඟයෙන් බැටකන මහරගම පිළිකා මර්ධන රෝහල ජනතාවගේ පරිත්‍යාග අපේක්ෂාවෙන් පසුවන බව නිවේදනය කර තිබේ.
“ලෝක ළමා පිළිකා දිනය” නිමිත්තෙන් 15 බදාදා සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවකට එක්වෙමින් ළමා පිළිකා විශේෂඥ වෛද්‍ය සංජීව ගුණසේකර සිටියේ සෙසු රෝහල්වල මෙන්ම මහරගම අපේක්ෂා රෝහල තුළ ද මේ වනවිට ඖෂධ හිඟයක් පැවතියද ජනතාවගේ පරිත්‍යාග හේතුවෙන් එය කළමනාකරණය කර ගනිමින් සිටින බවයි.
“මහරගම පිළිකා රෝහලේ අනෙක් රෝහල්වල වගේම යම් බෙහෙත්වල අඩුපාඩුවක් තියෙනවා. හැබැයි අපි විශේෂයෙන්ම මතක් කරන්න ඕනේ, ළමා පිළිකා වාට්ටු සමග පරිත්‍යාගශීලීන් රාශියක් වැඩකරනවා. අපිට ඔවුන්ගේ උපකාර නිසා බොහෝදුරට මෙම අවශ්‍යතාවයන් පියවා ගැනීමට හැකියාව ලැබී තිබෙනවා.”
පරිත්‍යාග භාරගැනීමට විශේෂ ඒකකයක් රෝහල තුල පිහිටුව ඇති බව කී වෛදවරයා පුද්ගලයෙක් හෝ ආයතනයක් බෙහෙත් පරිත්‍යාග කිරීමට කැමත්තෙන් සිටිනම් රෝහලේ අධ්‍යක්ෂවරයා අමතන මෙන් ඉල්ලා සිටියේය.
වැඩිවන ළමා රෝගීන්
රට තුල ළමා පිළිකා රෝගීන් වැඩිවෙමින් පවතින බවට අනතුරු ඇඟවු වෛද්‍ය සුරාජ් පෙරේරා වසරකට ළමුන් 900ක් පමණ පිළිකා රෝගීන් ලෙස හඳුනාගන්නා බව පෙන්වා දුනි.
2020 සංඛ්‍යා ලේඛන අනුව පිරිමි දරුවන් 472කුත් ගැහැණු දරුවන් 457කුත් ලෙස වාර්තා වී ඇතැයි ද පැවසු වෛද්‍යවරයා, බොහෝ ළමා පිළිකා සම්පූර්ණයෙන් සුව කළ හැකි තත්ත්වයේ පවතින බවයි පවසන්නේ.
මේ අතර වසරකට ළමා පිළිකා රෝගීන් 250ක් පමණ ජීවිතක්ෂයට පත්වෙන බව පැවසු වෛද්‍ය සුරාජ් පෙරේරා එය අවම කරගැනීමට කටයුතු කළ යුතු බව ද අවධාරණය කළේය.
Facebook Comments
