දෙනුන් කවන තණබිම් මුදා හරින ලෙස ඉල්ලා නැගෙනහිර විරෝධයක්

ගෝඨාභය රාජපක්ෂ පාලන සමයේ පිටතින් ගෙනවිත් පදිංචි කළ සිංහල ගොවීන් විසින් අත්පත්කරගෙන සිටින දෙමළ කිරි ගොවීයන් වසර ගණනාවක සිට ගවයන්ට කැවීම සඳහා භාවිත කළ තණ බිම් වහා නිදහස් කරන ලෙස බල කරමින් නැගෙනහිර පළාතේ අඛන්ඩ විරෝධතාවයක් ආරම්භ කර තිබේ.

මඩකලපුව සිත්තාන්ඩි පාසල ඉදිරිපිටදී සැප්තැම්බර් 15 වැනි සිකුරාදා දෙමළ කිරි ගොවීන් ආරම්භ කළ විරෝධතාවය මේ වන විටත් දියත් වන බවයි පළාත් බද වාර්තාකරුවන් පවසන්නේ.

සැප්තැම්බර් 13 වැනිදා මඩකලපුව දිස්ත්‍රික් ලේකම් කාර්යාලයේ පැවැති ගොවි කමිටු රැස්වීමේදී කිරි ගොවීන් මුහුණ දී සිටින ගැටළුවට විසදුම් ලබා දීමට තමන්ට නොහැකි බව දිස්ත්‍රික් ලේකම් කමලාවතී පද්මරාජා පැවසීමෙන් පසු කිරි ගොවීන් මෙම විරෝධතාවයට අවතිරණය වී තිබේ.

විරෝධතාවයේ නිරත කිරි ගොවියන් පෙන්වා දෙන්නේ සිය ගවයන් තණකොළ කෑම සදහා භාවිත කළ ඉඩම් අක්කර දෙදාස් පන්සීයක් පමණ භුමි භාගයක් සිංහල ගොවීන් විසින් හේන් කටයුතු වෙනුවෙන් මේ වන අත්පත්කරගෙන තිබීම නිසා කිරී ගොවීන් දැඩි අර්බුදයකට මුහුණ දී සිටින බවයි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.

කිරි ගොවීන් පෙන්වා දෙන්නේ ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සිංහල ගොවියන් බලහත්කාරයෙන් අල්ලා ගෙන සිටින්නේ සරුසාරෙට තෘණ වැවෙන අක්කර 2500 ක ප්‍රදේශයක් බවයි.

ප්‍රදේශයේ කිරි ගොවීන් 900 දෙනකුට පමණ අයත් කිරි ගවයන් දෙලක්ෂ පනස් දාහකට අධික ප්‍රමාණයක් සිටින බව පෙන්වා දෙන ඔවුන් අවධාරණය කරන්නේ ඒ ආශ්‍රිතව 2500 ක පමණ පිරිසක් ජීවන වෘත්තියේ නිරතව සිටින බවයි.

විරෝධතායේ නිරත කිරි ගොවියකු, පිටතින් පැමිණි සිංහල ගොවීන් නිසා සිය ගවයන් ආහාර ප්‍රශ්නයකට මුහුණ දී සිටින ආකාරය පැහැදිලි කළේ පහත අයුරිනි.

“1972 ඉදන් මේ ප්‍රදේශයේ කිරි ගොවීන් තමන්ගේ දෙනුන්ට කන්න දීලා තමන්ගේ ජීවනෝපාය කරගෙන ශ්‍රී ලංකාවේ ආර්ථිකයට ලොකු ශක්තියක් උනා. පිට පළාත් වලින් ආපු ගොවීන් තමන්ට ගොවිතැන් කරන්න අවශ්‍යයි කියලා එතනින් හරකුන් අයින් කරනවා කියන්නේ මේ දිස්ත්‍රික්කයේ ලක්ෂ ගාණක ගවයන්ට ආහාර ප්‍රශ්නයක් ඇති වෙනවා. ”

කිරි ගවයන්ට දෛනික ආහාර සොයා ගැනීමේ අපහසුතාවය නිසා පසුගිය කාලයේ අවස්ථා කිහිපයකදීම කිරි ගවයන් සැලකිය යුතු ප්‍රමාණයක් මිය ගිය බව පළාත් බද මාධ්‍යවේදීන් විසින් වාර්තා කර තිබුනි.

ගව පාලනයේ යෙදෙන පාරම්පරික ගොවීන් විසින් ඔක්තෝම්බර් සිට පෙබරවාරි දක්වා කාලය තුළ ගවයන්ට ආහාර සඳහා භාවිත කළ මයිලත්තමඩු තෘණ භූමි නීතිවිරෝධී ලෙස ආක්‍රමණය කිරීමට හේන් ගොවියන්ට ඉඩ ලබා දුන් බවට දෙමළ ජාතික සන්ධානයේ පාර්ලිමේන්තු මන්ත්‍රී ෂානක්‍යන් රාජපුත්තිරන් රාසමාණික්කම් මීට ඉහත දී රජයට චෝදනා කර තිබුනි.