දිගින් දිගටම සිදු කෙරෙන පොලිස් ප්‍රශ්න කිරීමේ හමුවේ තමන් අත්අඩංගුවට ගැනීමේ උත්සාහයක් ක්‍රියාත්මක වෙමින් තිබෙන බවට ඇගවෙන්නේයැයි මාධ්‍යයට ප්‍රකාශ කළ නැගෙනහිර දෙමළ මාධ්‍යවේදියකුගෙන් පොලීසිය නැවතත් ප්‍රශ්න කර තිබේ.
සැප්තැම්බර් 14 වැනි අගහරුවාදා මඩකලපුව ජ්‍යෙෂ්ඨ පොලිස් අධිකාරි කාර්යාලයේ ස්ථාපිත කර තිබෙන විශේෂ අපරාධ විමර්ශන ඒකකයකට කැදවා පැයකට ආසන්න කාලයත් තමාගෙන් ප්‍රකාශ සටහන් කරගත් බව මඩකලපුව මාධ්‍ය සමාජයේ භාණ්ඩාගාරික ද වන මාධ්‍යවේදී පුන්‍යමුර්ති සසිකරන් පළාත් බද මාධ්‍ය සගයන් සමග පවසා තිබේ.
එහිදී පොලීසිය මාධ්‍යවේදියාගෙන් ප්‍රශ්න කර ඇත්තේ ඔහු අත්අඩංගුවට ගැනීමේ සුදානමක් පවතින බවට සිලෝන් නිවුස් වෙබ් අඩවියේ පුවතක් පළ කර තිබෙන අතර එම වෙබ් අඩවිය ඔහුගෙන් සම්මුඛ සාකච්ඡාවක් ලබාගත්තේද යන්නයි.
මාධ්‍යවේදී පුන්‍යමුර්ති සසිකරන් එහිදී පොලීසියට පවසා ඇත්තේ දිගින් දිගටම පොලීසිය තමාගෙන් සිදු කෙරෙන ප්‍රශ්න කිරීම් හමුවේ තමන් අත්අඩංගුවට ගැනීමේ සුදානමක් ඇති බවට ඇගවෙන්නේනැයි පසුගිය මාසයේ පොලීසියට ප්‍රකාශ ලබා දීමෙන් පසු පොලීසියෙන් පිටත රැදී සිටි පළාත්බද මාධ්‍යවේදීන්ට තමන් පැවසු බවයි.
එම මාධ්‍යවේදීන් සිලෝන් නිවුස් වෙබ් අඩවියට පුවත් සපයන්නේද යන්න තමන් නොදන්නා බව පවසා ඇති මාධ්‍යවේදී පුන්‍යමුර්ති සසිකරන් එහිදී පොලීසියට වැඩි දුරටත් පවසා ඇත්තේ ශ්‍රී ලංකාවේ මාධ්‍යවේදීන්ටත් මාධ්‍ය ආයතන වලටත් සිදු වන හිරිහැර සම්බන්ධයෙන් තමන් මාධ්‍ය ආයතන දැනුවත් කර ඇති බවයි.
වත්මන් රජය බලයට පත් වීමෙන් පසු මාධ්‍යවේදීන්ට සිදු වන හිරිහැර වැඩි වී ඇති බවත් ජනාධිපතිවරයා, අගමැතිවරයා මෙන්ම ජනමාධ්‍ය අමාත්‍යවරයා මැදිහත් වී ඒ සම්බන්ධයෙන් සොයා බැලිය යුතු බවට තමන් මාධ්‍ය සගයන් වෙත ප්‍රකාශයක් ලබා දුන් බව මාධ්‍යවේදී පුන්‍යමුර්ති සසිකරන් එහිදී වැඩි දුරටත් ප්‍රකාශ සටහන් කරගත් පොලිස් නිලධාරීන්ට පවසා තිබේ.
පොලීසිය එහිදී මාධ්‍යවේදියාගෙන් ප්‍රශ්න කර ඇත්තේ ඔහු කවුරුන් විසින් අත්අඩංගුවට ගැනීමේ සුදානමක් පවතිද යන්නයි.
පුන්‍යමුර්ති සසිකරන් එහිදි පවසා ඇත්තේ මඩකලපුව ජ්‍යෙෂ්ඨ පොලිස් අධිකාරි කාර්යාලයේ ස්ථාපිත කර තිබෙන විශේෂ අපරාධ විමර්ශන ඒකකයක මීට පෙර අවස්ථා දෙකකදි තමා කැදවා ප්‍රශ්න කර ඇති බැවින් ඔවුන් විසින් තමන් අත්අඩංගුවට ගනු ඇති බවට තමන් තුළ භියක් පවතින බවයි.
මාස දෙකකට දෙවතාවක්
මළවුන්ගේ අනුස්මරණයක් වාර්තා කිරීම පදනම් කරගනිමින් ප්‍රශ්න කිරීම සඳහා 2021 ජුලි මස මුලදී ත් අගෝස්තු මස 23 වැනි සඳුදා දිනයේත් මාධ්‍යවේදී පුන්‍යමුර්ති සසිකරන් මඩකලපුව ජ්‍යෙෂ්ඨ පොලිස් අධිකාරි කාර්යාලයේ ස්ථාපිත කර තිබෙන විශේෂ අපරාධ විමර්ශන ඒකකයකට කැදවා තිබුනි.
ඒ සම්බන්ධයෙන් ප්‍රශ්න කිරීම සදහා දිගින් දිගටම තමන් පොලීසියට කැඳවීම තර්ජනයක් වී ඇති බව මාධ්‍යවේදී පුන්‍යමුර්ති සසිකරන් එහිදි පලාත් බද මාධ්‍යවේදීන් සමග පවසා තිබුනි.
ඔහු එහිදි මාධ්‍ය සගයන් සමග වැඩි දුරටත් පවසා තිබුනේ අසත්‍ය චෝදනාවක් එල්ල කරමින් තමන් අත්අඩංගුවට ගැනිමේ උත්සාහයක් පොලීසිය විසින් ක්‍රියාත්මක කරමින් සිටින බවට තමන්ට ඇගවෙන බවයි.
ඒ හරහා සිය මාධ්‍ය ජීවිතය නැවැත්වීමේ උත්සාහයක් ක්‍රියාත්මක වන බවටත් මාධ්‍යවේදී පුන්‍යමුර්ති සසිකරන් බිය පළ තිබුනි.
ශ්‍රී ලංකා නාවික හමුදාවට චෝදනා එල්ල වන ඝාතනයකට ලක්වූ ඉන්දීය ධීවරයන් වෙනුවෙන් පැවැති අනුස්මරණ රැස්වීමක් සංවිධානය කළේ මාධ්‍යවේදී පුන්‍යමුර්ති සසිකරන් යන්න මඩකලපුව ජ්‍යෙෂ්ඨ පොලිස් අධිකාරි කාර්යාලයේ ස්ථාපිත කර තිබෙන විශේෂ අපරාධ විමර්ශන ඒකකයක ජුලි, අගෝස්තු මාසවලදි මාධ්‍යවේදියාගෙන් දිගින් දිගටම ප්‍රශ්න කර තිබුනි.
එම රැස්වීම තමන් සංවිධානය නොකළ බව මාධ්‍යවේදියා පොලිසියට අවධාරණය කර තිබුනි.
ශ්‍රී ලංකා මානව හිමිකම් කොමිෂන් සභාවේ මඩකලපුව ශාඛාවට 2021 ජුලි 15 බ්‍රහස්පතින්දා සිදු කළ පැමිණිල්ලක් මගින් මාධ්‍යවේදී පුන්‍යමුර්ති සසිකරන් අවධාරණය කර තිබුනේ පොලීසියේ ක්‍රියා කලාපය තමන්ගේ මාධ්‍යකරණයට මහත් සේ අනිටු බලපෑම් එල්ල කරන බවයි.
මෙවැනි කැඳවීම් නියෝග, මාධ්‍යවේදීන් නිතර විමර්ශනවලට ලක්කිරීම හා හිරිහැර කිරීම මඩකලපුව දිස්ත්‍රික් දෙමළ මාධ්‍යවේදීන්ගේ සංගමය විසින් පසුගිය සමයේ දැඩි ලෙස හෙළා දැක තිබුණි.
Facebook Comments
