නාවික වධකාගාරයකින් අතුරුදහන් වූවකු ගැන පොලිස් නිලධාරියකු රහස් පොලිසියට

දහතුන් වසරකට ඉහතදී එක්දරු පියකු පැහැරගෙන ගොස් අතුරුදහන් කිරීම සම්බන්ධයෙන් මීරිගම පොලීසියේ පාලන අංශයේ ස්ථානාධිපතිවරයා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.

අපරාධ පරීක්ෂණ දෙපාර්තමේන්තුව විසින් ප්‍රධාන පොලිස් පරීක්ෂක සමන් කුමාර දිසානායක අත්අඩංගුවට ගෙන ඇත්තේ ඔහු 2010 වසරේ අලව්ව පොලීසියේ අපරාධ අංශයේ ස්ථානාධිපතිවරයා ලෙස කටයුතු කළ සමයේ පුද්ගලයකු පැහැරගෙන ගොස් අයුතු ලෙස රඳවා තබාගැනීමේ චෝදනාවටය.

අතුරුදහන් කරනු ලැබූ ගනේරාලලාගේ ශාන්ත සමරවීර ඒ සමයේ ත්‍රිකුණාමල නාවික හමුදා කඳවුරේ ගන්සයිට් භූගත වධකාගාරයේ සිරකොට සිටි බව සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) 2019 දී එළිදැක්වූ වාර්තාවකින් අනාවරණය කර තිබුණි.

“ශ්‍රී ලංකා නාවික හමුදාව: සාමුහිකව ඇස් පියා ගැනීම” නම් එම වාර්තාව සම්පාදනය කර තිබුනේ ගන්සයිට් සිරකඳවුරේ සිට අතුරුදහන් වූ කොළඹ සහ ඒ අවටින් පැහැරගන්නා ලද පිරිමි 11 දෙනකු පිළිබඳ පොලිස් පරීක්ෂණ සටහන්, අධිකරණ වාර්තා ඇතුළු සාක්ෂි ගවේෂණයෙනි.

කෑගල්ලේ ඇකිරියගල පදිංචිව සිටි ශාන්ත සමරවීරගේ වැඩිමහල් සහෝදරියක් වන ලලිතා ජයසිංහ ශ්‍රී ලංකා මානව හිමිකම් කොමිසමට පැමිණිලි කර තිබුනේ 2010 වසරේ ජුලි මස 22 වැනිදා අලව්ව පොලීසිය මගින් අත්අඩංගුවට ගන්නා ලද සිය සහෝදරයා ඉන් දින කීපයකට පසු අතුරුදහන් වූ බවයි.

මහත් පරිශ්‍රමයකින් අනතුරුව ජුලි 25 වැනිදා නීතිඥ චූලා සංජීව අධිකාරි සමග අලව්ව පොලිසියට ගිය ඇයට සිය මල්ලී කූඩුවේ රඳවා සිටින අයුරු දැක ගන්නට ලැබී තිබුණි. පසුදින ඔහු උසාවි ගෙන එන බව පොලිසිය කියා සිටියත් එය සිදුවී නැත.

ඇය 28 දාත් නැවත උසාවි ගියත් ශාන්ත ගෙනැවිත් තිබුනේ නැත. පොලිසියේත් ඔහු සිටියේ නැත.

හිසේ වේදනාවකට ශාන්ත සමරවීර රෝහල් ගත කරනු ලැබූ බවට පොලිසියෙන් ලැබුණු දැනුම් දීමකට අනුව රෝහලට ගිය ඥාතීන්ට එහි කාර්ය මණ්ඩලය පවසා ඇත්තේ ඔහු වැසිකිලි කවුළුවකින් පලා ගොස් ඇති බවයි.

සිය බාල සහෝදරයා අතුරුදහන් කිරීම සම්බන්ධයෙන් කළ පැමිණිල්ල ශ්‍රී ලංකා මානව හිමිකම් කොමිෂන් සභාව විසින් විභාග කරන ලද්දේ පොලීසියට වාසි සහගත ආකාරයෙන් බවට ලලිතා ජයසිංහ 2018 වසරේදී ජනමාධ්‍ය හමුවේ චෝදනා කර තිබුණි.

අවුරුද්දකට ආසන්න කාලයක් ගන්සයිට් කඳවුරේ රඳවා සිටි නාවික හමුදා බුද්ධි අංශයේ බස්නායක මුදියන්සේලාගේ විජයකාන්ත් 2008-09 සමයේ කොළඹ හා තදාසන්න පෙදෙස්වලින් පිරිමි 11 දෙනකු පැහැරගැනීම ගැන පරීක්ෂණ පවත්වන රහස් පොලිස් නිලධාරීන්ට පවසා තිබුනේ ශාන්ත සමරවීර තමන් සමගම සිරගතකොට සිටි බවයි.

ඔහුගේ අතුරුදහන් කිරීම සම්බන්ධයෙන් අපරාධ පරීක්ෂණ දෙපාර්තමේන්තුවට ලැබුන පැමිණිල්ලක් සම්බන්ධයෙන් විමර්ශන පවත්වා සමන් කුමාර දිසානායක නමැති ප්‍රධාන පොලිස් පරීක්ෂක අත්අඩංගුවට ගන්නා ලද බව ඉහල පොලිස් නිලධාරියෙක් කොළඹින් පලකෙරෙන මාධ්‍යයට පවසා තිබේ.

දහතුන් අවුරුද්දකට ඉහතදී ලැබුණු පැමිණිල්ල ගැන ශ්‍රී ලංකා මානව හිමිකම් කොමිසමේ පරීක්ෂණ ප්‍රතිපල හෝ කරන ලද නිර්දේශ හෝ ප්‍රසිද්ධියට පත් කළ බවක් දැනගන්නට නැත.

තරුණයන් ඇතුළු පුද්ගලයන් එකොලොස් දෙනකු බලහත්කාරයෙන් පැහැර ගෙන ගොස් ත්‍රිකුණාමලයේ ගන්සයිට් කඳවුරේ සිරකොට, වධහිංසා පමුණුවා අතුරුදහන් කිරීම ගැන හිටපු නාවික හමුදාපතිවරයකු ඇතුළු නිලධාරීන් කිහිප දෙනකුටම බරපතල චෝදනා නගා නඩු පැවරීම සඳහා පරීක්ෂණ පැවැත්වූ නිශාන්ත ද සිල්වා පොලිස් පරීක්ෂකවරයා ගෝඨාභය රාජපක්ෂ බලයට පත්වූ විගස ජීවිතාරක්ෂාව සඳහා රට හැර පලා ගියේය.