වසර නමයකට ඉහතදී උතුරේ පැවති යුද්ධයෙන් මියගියවුන් අනුස්මරණය කල හැටන් නැෂනල් බැංකු සේවයන් දෙදෙනෙකුගේ වැඩ තහනමට ලක් කර තිබේ.
මුල්ලිවයික්කාල් සැමරුම යෙදී ඇති මැයි 18 වනදා පුෂ්පදීප දල්වා මියගියවුන් අනුස්මරණයක් කිලිනොච්චි HNB සේවකයන් විසින් පවත්වනු ලැබ ඇත.
කෙසේ වෙතත් මෙම සැමරුමෙන් පසුව කොළඹ සිට කිලිනොච්චි බලා ගිය HNB ප්‍රධානින් කිහිප දෙනෙකු කිලිනොච්චි ශාඛාවේ සහකාර කළමනාකාර යාපනයේ උඩුවිල් හි සසිවර්නන් පරිපූර්ණනන්දසර්මාගේ සහ අධුනික සේවකයෙකු වන අම්පාරේ ජෙයතුසන්ගේ වැඩ තහනම් කිරීමට පියවර ගෙන ඇත.
ඔවුන් දෙදෙනා ඇතුළුව අනෙකුත් සේවකයන් පිලිබඳව ද විනය පරීක්ෂණයක් ආරම්භ කර ඇති බවයි HNB කොළඹ ශාඛාවේ නම හෙළි නොකරන ලෙස ඉල්ලා සිටි සේවකයෙකු සිලෝන් නිවුස් වෙත කියා සිටියේ.
“ශ්‍රී ලාංකිකයින්ගේ අභිමානය කෙරෙහි තර්ජනයක් විය හැකි හෝ සමාජ සම්මතයන් උල්ලංඝනය කරන කිසිදු හැඟීමක් හෝ ක්‍රියාවක් හැටන් නැෂනල් බැංකුව ලෙස අපි කිසිදු ලෙසකින් පිලිනොගන්නා අතර එවැනි තත්වයන් කෙරෙහි අපගේ දැඩි අවධානය යොමු කරන බව අවධාරණයෙන් පවසන්නෙමු. සියලූ ශ්‍රී ලාංකිකයින් වෙත සමානාත්මතාවයෙන් සේවා සපයන අපගේ ආයතනික ඉලක්ක සහ ලැදියාවන් හැම විටම ශ්‍රී ලංකාවේ ගුණාත්මක වර්ධනය සමග එකාත්මිකව පවතී.”
“හැටන් නැෂනල් බැංකුව විසින් වඩාත් ගෞරවාන්විතව පවත්වාගෙන යන අපගේ වෘත්තීය භාවයට පටහැනි අනවසර ක්‍රියාවක් අපගේ යම් ශාඛාවක සිදුව ඇති බැවින් ඒ පිළිබඳව අපගේ බලවත් කණගාටුව පළ කෙරෙන අතරම එබඳු ක්‍රියාවක් කිසිදු ලෙසකින් බැංකුවේ හරයාත්මක වටිනාකමක් ලෙස අරුත් ගැන්විය නොහැකි බවද තරයේ කියා සිටින්නෙමු. එම සිදුවීම පිළිබඳව පරීක්ෂණයක් පවත්වා අවශ්‍ය ක්‍රියාමාර්ගයන් දැනටමත් ගෙන ඇති බව දන්වනු කැමැත්තෙමු.” යි තම බැංකු සේවකයන්ගේ වැඩ තහනම් කිරිමෙන් අනතුරු හැටන් නැෂනල් බැංකුවේ නිල ෆේස්බුක් ගිණුම හරහා නිවේදනයක් නිකුත් කරමින් කියා ඇත.
ගිණුම් අත්හිටුවයි
කෙසේ වෙතත් තම ජනයා අනුස්මරණය කිරීමට එරෙහිව බැංකුව තම සේවකයන් දෙදෙනෙකුගේ වැඩ තහනමක් කිරීමට විරෝධය පල කරමින් උතුරේ වැසියන් තම බැංකු ගිණුම් අත්හිටුවීමට පියවර ගෙන තිබේ.
දෙමළ ජනතාවගේ ශෝකය සංකේතවත් කරන අනුස්මරනයකට එරෙහිව ගන්නා ලද පියවර නිසා දෙමළ ජනතාව HNB බැංකුව කෙරේ තැබූ විශ්වාසය බිඳ වැටී ඇතැයි පවසන කිලිනොච්චි පුරවැසි සමාජය වැඩ තහනම් කළ දෙදෙනාම වහාම ආපසු සේවයට බඳවා ගන්නා ලෙස බලකර සිටී.
Facebook Comments
